ຍົກສູງຄວາມຮັບຜິດຊອບເພື່ອບັນລຸການແກ້ໄຂຄວາມທຸກຍາກ

ທ່ານ ເພັດ ພົມພິພັກ ລັດຖະມົນຕີກະຊວງກະສິກຳ ແລະປ່າໄມ້ (ກປ) ໄດ້ກ່າວຕໍ່ກອງປະຊຸມສະຫຼຸບວຽກງານພັດທະນາຊົນນະບົດ ແລະລຶບລ້າງຄວາມທຸກຍາກ ປະຈຳປີ 2021 ແລະທິດທາງແຜນການ ປະຈຳປີ 2022 ວ່າ: ການພັດທະນາຊົນນະບົດ ແລະແກ້ໄຂຄວາມທຸກຍາກໃນສະພາບເງື່ອນໄຂທີ່ມີຄວາມຫຍຸ້ງຍາກໃນປັດຈຸບັນ, ແມ່ນມີຄວາມຈໍາເປັນທີ່ສຸດທີ່ພວກເຮົາຕ້ອງໄດ້ຍົກສູງຄວາມຮັບຜິດຊອບການເມືອງ ແລະມີກົນໄກວິທີການໃນການຈັດຕັ້ງປະຕິບັດທີ່ຖືກຕ້ອງ, ສອດຄ່ອງ ແລະຕ້ອງກຳນົດຈຸດສຸມລະອຽດ.

ວາລະປະຊຸມຄັ້ງນີ້, ຈັດຂຶ້ນເມື່ອວັນທີ 24 ມີນາ, ທີ່ກະຊວງກະສິກຳ ແລະປ່າໄມ້, ທັງໃນຮູບແບບປົກກະຕິ ແລະລະບົບທາງໄກ, ໂດຍມີນັກວິຊາການກ່ຽວຂ້ອງ ເຂົ້າຮ່ວມຢ່າງພ້ອມພຽງ.

ທັງນີ້, ລັດຖະມົນຕີກະຊວງ ກປ, ໄດ້ສະແດງຄວາມຊົມເຊີຍຕໍ່ບັນດາກະຊວງ, ຂະແໜງການ ແລະອົງການປົກຄອງທ້ອງຖິ່ນທຸກພາກສ່ວນທີ່ໄດ້ປະກອບສ່ວນເຮັດໃຫ້ວຽກງານພັດທະນາຊົນນະບົດ ແລະລຶບລ້າງຄວາມທຸກຍາກໃນໄລຍະຜ່ານມາມີຜົນສຳເລັດເປັນກ້າວໆ. ຂະນະດຽວກັນ, ທ່ານກໍໄດ້ເນັ້ນໃຫ້ເອົາໃຈໃສ່ປັບປຸງແກ້ໄຂບາງບັນຫາ, ເປັນຕົ້ນແມ່ນຄວາມແຕກໂຕນທາງດ້ານການພັດທະນາລະຫວ່າງຊົນນະບົດ ແລະຕົວເມືອງບ່ອນທຸກຍາກ, ການພັດທະນາຊົນນະບົດ ແລະ ແກ້ໄຂຄວາມທຸກຍາກຍັງບໍ່ໄດ້ຕິດພັນກັບການສ້າງຊັບພະຍາກອນມະນຸດ, ຕິດພັນກັບການສ້າງກຳລັງແຮງເທົ່າທີ່ຄວນ. ການຈັດສັນພູມລຳເນົາຄົງທີ່ ແລະບ່ອນທຳມາຫາກິນຖາວອນຍັງບໍ່ທັນດຳເນີນຕາມຮູບແບບ ແລະຂັ້ນຕອນຕາມກົດໝາຍກຳນົດ, ຊີວິດການເປັນຢູ່ຂອງປະຊາຊົນໃນບໍລິເວນທີ່ມີການຈັດສັນໃໝ່ນັ້ນບໍ່ໄດ້ຮັບການປັບປຸງໃຫ້ດີຂຶ້ນ, ການຢຸດຕິການເຄື່ອນຍ້າຍພູມລຳເນົາແບບຊະຊາຍກໍບໍ່ທັນບັນລຸໄດ້ຄາດໝາຍທີ່ວາງອອກ.

“ການທີ່ຈະບັນລຸເປົ້າໝາຍມັນແມ່ນໜ້າທີ່ ແລະຄວາມຮັບຜິດຊອບຂອງທຸກພາກສ່ວນ ແລະທຸກຄົນ,ບວກກັບການມີຄວາມພ້ອມໃນດ້ານຕ່າງໆ ແລະມີກົນໄກ, ວິທີການ ແລະ ຍຸດທະ ວິທີທີ່ຖືກຕ້ອງສອດຄ່ອງທີ່ສຸດ. ໂດຍ ສະເພາະການພັດທະນາຊົນນະບົດ ແລະ ແກ້ໄຂຄວາມທຸກຍາກໃນສະພາບເງື່ອນໄຂທີ່ມີຄວາມຫຍຸ້ງຍາກສັບສົນຄືໃນປັດຈຸບັນນີ້, ມັນຍິ່ງມີຄວາມຈໍາເປັນທີ່ສຸດທີ່ພວກເຮົາຕ້ອງໄດ້ຍົກສູງຄວາມຮັບຜິດຊອບການເມືອງ ແລະ ມີກົນໄກວິທີການໃນການຈັດຕັ້ງປະຕິບັດທີ່ຖືກຕ້ອງ ແລະ ສອດຄ່ອງ. ດັ່ງນັ້ນ, ພວກເຮົາຕ້ອງຮີບຮ້ອນກວດກາ ແລະປັບປຸງຄືນພາລະບົດບາດ, ໜ້າທີ່ ແລະລະບອບແບບແຜນວິທີເຮັດວຽກຂອງພວກເຮົາຄືນໃໝ່ໃຫ້ຖືກຕ້ອງ ແລະສອດຄ່ອງໃນສະພາບເງື່ອນໄຂໃໝ່” ທ່ານ ເພັດ ພົມພິພັກ ກ່າວ.

ສໍາລັບຂະແໜງກະສິກໍາ ແລະປ່າໄມ້, ແມ່ນຈະເຮັດໜ້າທີ່ໃນການພົວພັນປະສານງານກັບຂະແໜງການກ່ຽວຂ້ອງທັງຂັ້ນສູນກາງ ແລະທ້ອງຖິ່ນຕິດພັນກັບການປະຕິບັດໜ້າທີ່ວິຊາສະເພາະເພື່ອສ້າງໃຫ້ປະຊາຊົນຢູ່ເຂດຊົນນະບົດມີຊີວິດການເປັນຢູ່ທີ່ດີຂຶ້ນ. ໃນເງື່ອນໄຂທີ່ສະພາບການຂອງໂລກ ແລະພາກພື້ນມີບັນຫາທາງການເມືອງ, ຄວາມຫຍຸ້ງຍາກທາງດ້ານເສດຖະກິດ, ບວກກັບພາຍໃນປະເທດມີໜີ້ສິນຄຸມເຄືອ. ຊຶ່ງການພັດທະນາຊົນນະບົດ ແລະແກ້ໄຂຄວາມທຸກຍາກຂອງປະຊາຊົນໃນຕໍ່ໜ້ານີ້, ຕ້ອງເຮັດຢ່າງມີແຜນການ ແລະມີຈຸດສຸມ. ໂດຍເລີ່ມຈາກກໍາລັງແຮງກັບທີ່, ມີສົມທົບກັບການປະກອບສ່ວນຂອງທຸກພາກສ່ວນເສດຖະກິດ ແລະ ປະຊາຊົນ, ຕ້ອງຄົ້ນຄວ້າກໍານົດຈຸດສຸມອອກມາ ເພື່ອສ້າງເປັນຕົວແບບລະຫວ່າງສູນກາງ ແລະທ້ອງຖິ່ນ,ໃຫ້ແຕ່ລະຂະແໜງການ ແລະທ້ອງຖິ່ນຊ່ວຍເປັນເຈົ້າການໃນການຄົ້ນຄວ້າກໍານົດຈຸດສຸມ ແລະວາງແຜນພັດທະນາຈຸດສຸມຮ່ວມກັນໃຫ້ລະອຽດຈະແຈ້ງ ແລະກົມກຽວໄປລວງດຽວກັນ. ວຽກງານຈັດສັນພູມລຳເນົາ ແລະອາຊີບຕ້ອງປະຕິບັດຕາມກົດໝາຍ ແລະມີການກຳນົດຈຸດສຸມພັດທະນາທີ່ເປັນບຸລິມະສິດລະຫວ່າງສູນກາງ ແລະທ້ອງຖິ່ນຢ່າງຄັກແນ່.

แชร์