ລັດຖະບານເຜີຍວຽກງານຈຸດສຸມປະຈຳເດືອນເມສາ

ກອງປະຊຸມລັດຖະບານ ສະໄໝສາມັນ ປະຈຳເດືອນມີນາ 2022 ໄຂຂຶ້ນເມື່ອລະຫວ່າງວັນທີ 21-22 ມີນາ 2022 ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ມີບັນດາຮອງນາຍົກລັດຖະມົນຕີ, ສະມາຊິກລັດຖະບານ ແລະຜູ້ຕາງໜ້າຈາກບັນດາກະຊວງ ເຂົ້າຮ່ວມ.

ກອງປະຊຸມໄດ້ຮັບຟັງການລາຍງານ, ຄົ້ນຄວ້າ, ປຶກສາຫາລື, ພ້ອມທັງໄດ້ຕົກລົງ ແລະມີທິດຊີ້ນຳຕໍ່ບັນດາເອກະສານສຳຄັນເຊັ່ນ: ຮ່າງບົດສະຫຼຸບຕີລາຄາການປະຕິບັດວຽກງານຈຸດສຸມປະຈຳເດືອນມີນາ ແລະ ທິດທາງແຜນວຽກຈຸດສຸມ ປະຈຳເດືອນເມສາ 2022 ຂອງລັດຖະບານ, ຊຶ່ງກອງປະຊຸມໄດ້ ເຫັນດີດ້ານຫຼັກການຮັບຮອງເອົາຮ່າງບົດສະຫຼຸບລາຍງານດັ່ງກ່າວ ແລະ ມອບໃຫ້ຫ້ອງວ່າການສໍານັກງານນາຍົກລັດຖະມົນຕີປັບປຸງເນື້ອໃນຕາມການປະກອບຄໍາເຫັນຂອງສະມາຊິກລັດຖະບານໃຫ້ຄົບຖ້ວນ ແລະສົມບູນຂຶ້ນຕື່ມ.

ໄດ້ຮັບຮອບຮ່າງກົດໝາຍວ່າດ້ວຍການຄຸ້ມຄອງອາວຸດ ແລະວັດຖຸລະເບີດ (ສ້າງໃໝ່) ແລະ ຮ່າງກົດໝາຍວ່າດ້ວຍນໍ້າ ແລະ ຊັບພະຍາກອນນໍ້າ (ປັບປຸງບາງມາດຕາ), ຮ່າງລັດຖະ ບັນຍັດ ວ່າດ້ວຍລາຍການສິນຄ້າ ແລະ ອັດຕາພາສີຂາອອກ (ສະບັບປັບປຸງ) ແລະ ຮ່າງດໍາລັດ ວ່າດ້ວຍໃບເກັບເງິນ (ສະບັບປັບປຸງ). ຮ່າງດໍາລັດວ່າດ້ວຍ ພົນລະເມືອງກິດຕິມະສັກ. ຮ່າງດຳລັດວ່າດ້ວຍຫ້ອງການໄກ່ເກ່ຍຂໍ້ຂັດແຍ່ງທາງດ້ານເສດຖະກິດເອກະຊົນ. ຮ່າງດໍາລັດວ່າດ້ວຍຄ່າແຮງງານຂອງຜູ້ແກ້ໄຂຂໍ້ຂັດແຍ່ງທາງດ້ານເສດຖະກິດ ແລະ ຮ່າງຍຸດທະສາດແຫ່ງຊາດວ່າດ້ວຍການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ. ຊຶ່ງກອງປະຊຸມເຫັນດີດ້ານຫຼັກການ ຮັບຮອງຮ່າງດຳລັດດັ່ງກ່າວໂດຍໄດ້ຊີ້ນຳໃຫ້ພາກສ່ວນກ່ຽວຂ້ອງນຳໄປປັບປຸງຄືນຕາມຄຳເຫັນຂອງສະມາຊິກລັດຖະບານ.

ສໍາລັບແຜນວຽກຈຸດສຸມປະຈຳເດືອນເມສາ 2022 ຊຶ່ງແມ່ນໄລຍະບຸນປີໃໝ່ລາວ ແລະໃນສະພາບການລະບາດຂອງພະຍາດໂຄວິດ-19 ທີ່ຍັງມີທ່າອຽງສູງຂຶ້ນ, ໂດຍລັດຖະບານຈະສືບຕໍ່ສຸມທຸກກໍາລັງແຮງຂອງທຸກພາກສ່ວນໃນສັງຄົມເພື່ອເລັ່ງຟື້ນຟູເສດຖະກິດຂອງປະເທດເຮົາໃຫ້ຄືນສູ່ສະພາບປົກກະຕິໂດຍໄວ. ປັບປຸງຊີວິດການເປັນຢູ່ຂອງປະຊາຊົນລາວໃຫ້ດີຂຶ້ນ, ໄປຄຽງຄູ່ກັບການຈັດຕັ້ງປະຕິບັດ 2 ວາລະແຫ່ງຊາດໃຫ້ເປັນຮູບປະທຳ ແລະປະສົບຜົນສຳເລັດຕາມແຜນທີ່ກຳນົດໄວ້, ໂດຍສະເພາະສຸມໃສ່ປະຕິບັດດຳລັດວ່າດ້ວຍລົດຂອງລັດ, ແກ້ໄຂລົດນຳ ເຂົ້າບໍ່ຖືກກົດໝາຍ, ການຄຸ້ມຄອງ ແລະ ຮັກສາສະຖຽນລະພາບດ້ານເງິນຕາ ໃຫ້ມີຄວາມໝັ້ນທ່ຽງ ແລະ ເໜັງຕີງໃນລະດັບທີ່ກໍານົດໄວ້, ຄຸ້ມຄອງລາຄານໍ້າມັນເຊື້ອໄຟທີ່ສົ່ງຜົນກະທົບທາງກົງ ແລະ ທາງອ້ອມຕໍ່ການພັດທະນາເສດຖະກິດ-ສັງຄົມ ຂອງປະເທດເຮົາຢ່າງໜັກໃຫ້ຜ່ອນຄາຍລົງ.

ສໍາລັບແຜນວຽກລະອຽດໃນຂົງເຂດປ້ອງກັນຊາດ-ປ້ອງກັນຄວາມສະຫງົບ, ສືບຕໍ່ຈັດຕັ້ງປະຕິບັດແຜນງານໂຄງການຂອງສອງກໍາລັງ ປກຊ-ປກສ ໂດຍຕິດພັນຢ່າງສະໜິດແໜ້ນກັບການຈັດຕັ້ງປະ ຕິບັດວາລະແຫ່ງຊາດ ວ່າດ້ວຍການ ແກ້ໄຂຢາເສບຕິດດ້ວຍມາດຕະການ ຕ່າງໆໃຫ້ແຂງແຮງກວ່າເກົ່າ. ຂົງ ເຂດເສດຖະກິດ, ສືບຕໍ່ສົ່ງເສີມ ແລະ ອໍານວຍຄວາມສະດວກໃນການລົງທຶນ ທັງພາຍໃນ ແລະ ຕ່າງປະເທດ ໃຫ້ເພີ່ມ ຂຶ້ນ, ຊຸກຍູ້ການຈັດເກັບລາຍຮັບດ້ວຍມາດຕະການຕ່າງໆ ລວມທັງການຕິດ ຕັ້ງອຸປະກອນຈັດເກັບລາຍຮັບແບບທັນ ສະໄໝໃຫ້ສຳເລັດ. ສືບຕໍ່ອອກໃບຕາດິນໃຫ້ບັນລຸຕາມແຜນຕິດພັນກັບການສ້າງຖານລາຍຮັບໃຫ້ຫຼາຍຂຶ້ນ, ສືບຕໍ່ເອົາໃຈໃສ່ຄຸ້ມຄອງລາຍຈ່າຍງົບປະ ມານຂອງລັດຕາມທິດປະຢັດ ແລະຕ້ານການຟຸມເຟືອຍໃຫ້ເປັນຮູບປະທໍາຫຼາຍຂຶ້ນ. ສືບຕໍ່ເອົາໃຈໃສ່ໃນການຄຸ້ມຄອງ ແລະຮັກສາສະຖຽນລະພາບດ້ານເງິນຕາໃຫ້ມີຄວາມໝັ້ນທ່ຽງດ້ວຍມາດຕະການຕ່າງໆທີ່ກໍານົດໄວ້, ປັບປຸງກົນໄກການຊໍາລະສະສາງໃນຂະແໜງການຕ່າງໆແບບທັນສະໄໝໂດຍຜ່ານລະບົບ ທະນາຄານໃຫ້ຫຼາຍຂຶ້ນ. ສືບຕໍ່ຊຸກຍູ້ ການຜະລິດໃນລະດູແລ້ງ ເພື່ອຮັບປະກັນການສະໜອງສະບຽງອາຫານໃຫ້ ແກ່ສັງຄົມໄດ້ຕາມຄວາມຕ້ອງການ ແລະ ເປັນສິນຄ້າສົ່ງອອກຕາມເງື່ອນ ໄຂຂອງແຕ່ລະທ້ອງຖິ່ນ ໂດຍຕິດພັນກັບການແກ້ໄຂຄວາມຫຍຸ້ງຍາກໃນ ການສົ່ງອອກສິນຄ້າຢູ່ບັນດາດ່ານຊາຍແດນໃນທົ່ວປະເທດ, ສືບຕໍ່ຄຸ້ມ ຄອງລາຄາສິນຄ້າ ລວມທັງນໍ້າມັນເຊື້ອໄຟທຸກປະເພດຕາມກົດໝາຍ ແລະລະບຽບການກ່ຽວຂ້ອງຢ່າງເຂັ້ມງວດ. ສືບຕໍ່ຄຸ້ມຄອງການຂຸດຄົ້ນ-ສົ່ງອອກ ແຮ່ທາດຕ່າງໆໃນຮູບແບບປົກກະຕິ ແລະໃນຮູບແບບທົດລອງໃຫ້ມີປະສິດທິຜົນສູງຂຶ້ນ, ສືບຕໍ່ຕິດຕາມ ແລະ ຊຸກຍູ້ໂຄງການກໍ່ສ້າງທາງລົດໄຟ ລາວ-ໄທ ໄລຍະທີ 2, ການກໍ່ສ້າງທາງ ດ່ວນ, ໂຄງການໂລຈິສຕິກສ໌ ແລະໂຄງການອື່ນໆ ໃຫ້ສໍາເລັດຕາມແຜນການ, ລວມທັງຊຸກຍຸ້ພາກສ່ວນກ່ຽວຂ້ອງປັບປຸງການບໍລິການລົດໄຟລາວ-ຈີນ ໃຫ້ມີຄວາມສະດວກຂຶ້ນ, ສືບຕໍ່ຜັນຂະຫຍາຍນະໂຍບາຍການພັດທະນາເສດຖະກິດດິຈີຕອລ ໃຫ້ເປັນຮູບປະທໍາໃນບາງຂົງເຂດໃຫ້ໄດ້ຮັບຜົນດີຂຶ້ນ. ຂົງເຂດວັດທະນະທໍາ-ສັງຄົມ, ສືບຕໍ່ເປີດການຮຽນ-ການສອນທຸກສາຍແບບເຊິ່ງໜ້າ ແລະຮູບແບບຕ່າງໆໃນສະຖານການສຶກສາ, ລວມທັງປຸກລະດົມນັກຮຽນ-ນັກສຶກສາຕາມເກນອາຍຸທີ່ກະຊວງສາທາລະນະສຸກກຳນົດໄວ້ໃຫ້ໄປຮັບວັຄຊີນປ້ອງກັນ ໂຄວິດ-19 ຕາມແຜນການ. ນອກ ນັ້ນ, ກໍ່ໃຫ້ກະກຽມຄວາມພ້ອມດ້ານຕ່າງໆ ເພື່ອເຂົ້າຮ່ວມງານມະຫາກໍາກີ ລາຊີເກມສ໌ ຄັ້ງທີ 35 ທີ່ຈະຈັດຂຶ້ນຢູ ສສ ຫວຽດນາມ, ເພີ່ມທະວີການຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດ ມາດຕະການປ້ອງກັນ, ຄວບຄຸມ ແລະ ແກ້ໄຂການແພ່ລະບາດຂອງພະຍາດໂຄວິດ-19, ສືບຕໍ່ເອົາໃຈໃສ່ຊຸກຍູ້ ແລະ ຕິດຕາມການປະຕິບັດບົດບາດຂອງຂະແໜງການຖະແຫຼງຂ່າວ, ວັດທະ ນະທໍາ ແລະທ່ອງທ່ຽວໃຫ້ແຂງແຮງກວ່າເກົ່າຕິດພັນກັບການໂຄສະນາເຜີຍແຜ່ແນວທາງ, ນະໂຍບາຍຂອງພັກ-ລັດ ແລະ ຕອບໂຕ້ສະພາບຫາງສຽງຂອງສັງຄົມທີ່ເຄື່ອນໄຫວໂຄສະນາໂຈມຕີບິດເບືອນຕໍ່ແນວທາງ ແລະນະໂຍບາຍຂອງພັກ-ລັດເຮົາໃຫ້ທັນກັບສະພາບການ. ຂົງເຂດການປົກຄອງ ແລະຍຸຕິທໍາ, ໃຫ້ຮີບຮ້ອນປັບປຸງ ຮ່າງກົດໝາຍສ້າງໃໝ່ ແລະສະບັບປັບປຸງທີ່ຂະແໜງການຕົນຮັບຜິດຊອບເພື່ອສະເໜີຄະນະປະຈຳສະພາແຫ່ງຊາດນຳເຂົ້າພິຈາລະນາໃນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ຕາມແຜນທີ່ວາງໄວ້, ສືບຕໍ່ກະກຽມການສະຫຼຸບຕີລາຄາການປະຕິບັດວຽກງານ 3 ສ້າງ, ການແຂ່ງຂັນຮັກຊາດ ແລະ ພັດທະນາໃຫ້ສໍາເລັດຕາມແຜນການທີ່ກໍານົດໄວ້, ສືບຕໍ່ເອົາໃຈໃສ່ກວດກາ ແລະປະຕິບັດຄໍາຕັດສິນຂອງສານໃຫ້ຖືກຕ້ອງ ແລະ ບັນລຸຕາມແຜນການທີ່ໄດ້ກໍານົດໄວ້. ວຽກງານການຕ່າງປະເທດ, ສືບຕໍ່ຕິດຕາມສະພາບການຂອງໂລກທີ່ມີການຜັນແປຢ່າງສັບສົນ ແລະເຄັ່ງຮ້ອນຢ່າງໃກ້ຊິດໂດຍມີການວິເຄາະວິໄຈຢ່າງເລິກເຊິ່ງກ່ຽວກັບຄວາມສ່ຽງ ແລະທ່າອຽງຜົນກະທົບທາງການເມືອງ, ເສດຖະກິດ ແລະສັງຄົມຕໍ່ປະເທດເຮົາໃຫ້ເປັນລະບົບ. ນອກນັ້ນ, ກໍໃຫ້ຂຶ້ນແຜນການເຄື່ອນໄຫວວຽກງານການ ຕ່າງປະເທດຂອງການນໍາໃຫ້ສອດຄ່ອງກັບສະພາບການຜັນແປໃນແຕ່ລະໄລຍະ, ສືບຕໍ່ຜັນຂະຫຍາຍ ແລະຈັດຕັ້ງປະຕິບັດຜົນຂອງການພົບປະລະຫວ່າງການນໍາຂອງພັກ-ລັດເຮົາ ກັບບັນດາປະເທດເພື່ອນມິດ ແລະກອງປະຊຸມທີ່ສໍາຄັນຕ່າງໆທີ່ພົວພັນເຖິງປະເທດພວກເຮົາໃຫ້ຖືກຕ້ອງ-ທັນການ ແລະໄດ້ຮັບຜົນດີ.

แชร์