ໂຄດາ ຄ້ວາອອສກາຣ໌ຮູບເງົາດີເດັ່ນ

ໂຄດາ (CODA)”ຫົວໃຈໄຮ້ສຽງ”ເລື່ອງລາວຂອງສາວນ້ອຍໄວ17ທີ່ມີພໍ່ແມ່ ແລະ ອ້າຍ ເປັນຄົນຫູໜວກ,ສາມາດຄ້ວາລາງວັນໃຫຍ່ຂອງເວທີ  ອອສກາຣ໌(Oscars) ສາຂາຮູບເງົາດີເດັ່ນ.

ອອກມາແລ້ວ,ລາຍງານການປະກາດຜົນລາງວັນ ອະຄາເດມີ ອະວອຣດສ໌ ຫຼື ອອສກາຣ໌ ຄັ້ງທີ94 ຂອງສະຖາບັນວິທະຍາການ ແລະ ສິລະປະຮູບເງົາ.ເວທີດັ່ງກ່າວຈັດຂຶ້ນເມື່ອຕອນຄ່ຳວັນອາທິດ ທີ27ມີນາ2022 ຊຶ່ງກົງກັບເຊົ້າວັນຈັນ ທີ28ມີນາ(ຕາມເວລາບ້ານເຮົາ)ທີ່ໂຮງລະຄອນ ດອລບີ ເທຍເຕີຣ໌ ນະຄອນລອສແອງເຈລິສ,ລັດແຄລິຟໍຣ໌ເນຍ,ສະຫະລັດອະເມຣິກາ.ຊຶ່ງ”ໂຄດາ” ຫຼື “ຫົວໃຈໄຮ້ສຽງ”ສາມາດຍາດໄດ້ລາງວັນໃຫຍ່ໄປຄອງ.

ສຳລັບຮູບເງົາເລື່ອງ ໂຄດາ,ຂຽນບົດ ແລະ ກຳກັບໂດຍ Sian Heder ຊຶ່ງບອກເລົ່າເລື່ອງລາວຂອງ ຣູບີ້ ຣອສຊີ້ (ເອມິເລຍ ໂຈນສ໌) ນັກຮຽນມັດທະຍົມທຳມະດາໆຄົນໜຶ່ງ,ທີ່ເຕີບໂຕມາໃນຄອບຄົວຜູ້ພິການທາງສຽງ ຊຶ່ງພໍ່,ແມ່ ແລະ ອ້າຍຂອງນາງລ້ວນເປັນຄົນຫູໜວກ.

ອະລຸນວັນໃໝ່ຂອງນາງຕ້ອງເລີ່ມຕົ້ນຕອນ3ໂມງເຊົ້າ,ຣູບີ້ ຣອສຊີ້ ຕ້ອງໄດ້ຕື່ນໄປເຮັດໜ້າທີ່ເປັນກະລາສີ(ກຳມະກອນເທິງເຮືອ)ທີ່ດາດຟ້າເຮືອຫາປາຂອງຄອບຄົວ,ຮ່ວມກັບອ້າຍ ລີໂອ (ແດນຽລ ດູເຣນທ໌). ນອກນັ້ນ,ນາງຍັງເຮັດໜ້າທີ່ເປັນຄົນແປພາສາປະຈຳຄອບຄົວ ແລະ ຄອຍປົກປ້ອງແຟຣງຄ໌ (ທຣອຍ ຄອຕເຊີຣ໌)ຜູ້ເປັນພໍ່ ແລະ ແຈ໊ຄກີ້ (ມາຣ໌ລີ ແມຕລິນ)ຜູ່ເປັນແມ່.ຄວາມສຸກໜຶ່ງດຽວທີ່ຊ່ວຍປົດປ່ອຍນາງຈາກທຸກຢ່າງກໍຄືສຽງເພງ ແລະ ນາງມັກຈະເປັ່ງສຽງຮ້ອງຢູ່ເທິງດາດຟ້າຂອງເຮືອເພື່ອລະບາຍຄວາມໃນໃຈອອກມາ.

ຢ່າງໃດກໍຕາມ,ເມື່ອທຸລະກິດປະມົງຂອງຄອບຄົວຖືກຄຸກຄາມ.;ຣູບີ້ ກໍ່ແຍກບໍ່ອອກລະຫວ່າງການໄລ່ຕາມຄວາມຮັກໃນສຽງເພງ ກັບ ຄວາມຢ້ານກົວທີ່ຈະຕ້ອງປະຖິ້ມພໍ່ແມ່…?

ແລະນີ້ກໍຄືເລື່ອງລາວໂດຍຫຍໍ້ຂອງຮູບເງົາທີ່ສາມາດຄ້ວາໄດ້ລາງວັນ ໃຫຍ່ຂອງເວທີອອສກາຣ໌ ສາຂາ ຮູບເງົາດີເດັ່ນ ປະຈຳປີ2022.

แชร์