ແມ່ນ້ຳຂອງ-ແມ່ນ້ຳລ້ານຊ້າງ ສ້າງອະນາຄົດດີງາມແກ່ປະຊາຊົນໃນພາກພື້ນ

ການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ໄດ້ກຳເນີດຂຶ້ນ ແລະ ຈະເລີນຮຸ່ງເຮືອງຂຶ້ນເພາະມີສາຍນ້ຳຕິດຈອດກັນ.ພາຍໃຕ້ການສະໜັບສະໜູນຈາກກອງທຶນສະເພາະຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ໂດຍລັດຖະບານ ສປ ຈີນ,ຊຶ່ງກົນໄກການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ໄດ້ນຳໃຊ້ງົບປະມານເກືອບ300ລ້ານຢວນ(ສະກຸນເງິນຈີນ)ດຳເນີນໂຄງການຮ່ວມມືຕົວຈິງເກືອບ30ໂຄງການ.ໂດຍໄດ້ສ້າງສູນຂໍ້ມູນຊັບພະຍາກອນນ້ຳ,ສູນອຸທົກກະສາດ50ກວ່າແຫ່ງໃຫ້ແກ່ປະເທດເຂດລ່ອງແມ່ນ້ຳຂອງ,ພ້ອມທັງໄດ້ດຳເນີນໂຄງການແບບຢ່າງຄວາມປອດໄພດ້ານນ້ຳດື່ມ-ນ້ຳໃຊ້ໃນຊົນນະບົດຫຼາຍກວ່າ30ແຫ່ງ.ຊຶ່ງນັ້ນເປັນພຽງສ່ວນໜຶ່ງຂອງໂຄງການພັດທະນາອັນເກີດຈາກຄວາມຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ.

ເມື່ອອາທິດທີ່ຜ່ານມາ,ແມ່ນສັບປະດາແມ່ນ້ຳລ້ານຊ້າງ-ແມ່ນ້ຳຂອງ ປີ2022.ຊຶ່ງໃນວັນທີ23ມີນາຜ່ານມານີ້,ກອງປະຊຸມຜູ້ນຳການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ຄັ້ງທຳອິດ ໄດ້ຈັດຂຶ້ນທີ່ນະຄອນ ຊ່ານຢ້າ,ແຂວງໄຫຫຼຳ,ສປ ຈີນ.ຊຶ່ງເປັນການເລີ່ມຕົ້ນກົນໄກການຮ່ວມມືໃນອະນຸພາກພື້ນແບບໃໝ່ຢ່າງເປັນທາງການ ໂດຍຜ່ານຄວາມພະຍາຍາມຂອງ6ປະເທດ(ຈີນ,ລາວ,ຫວຽດນາມ,ກຳປູເຈຍ,ໄທ,ມຽນມາ)ໃນເຂດລ່ອງແມ່ນ້ຳລ້ານຊ້າງ-ແມ່ນ້ຳຂອງ.ຂົງເຂດການຮ່ວມມືດັ່ງກ່າວໄດ້ຂະຫຍາຍຕົວອອກຢ່າງບໍ່ຢຸດຢັ້ງ ແລະ ພະລັງຂັບເຄື່ອນພາຍໃນກໍ່ໄດ້ເພີ່ມຂຶ້ນຢ່າງຕໍ່ເນື່ອງ.ມາຮອດປັດຈຸບັນ,ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ໄດ້ກາຍເປັນກົນໄກການຮ່ວມມືໃນອະນຸພາກພື້ນທີ່ມີຊີວິດຊີວາ ແລະ ມີທ່າແຮງບົ່ມຊ້ອນຫຼາຍທີ່ສຸດ,ອັນໄດ້ກາຍເປັນພະລັງຂັບເຄື່ອນໃຫ້ແກ່ການພັດທະນາປະເທດຕ່າງໆ ແລະ ກາຍເປັນແບບຢ່າງທີ່ດີໃຫ້ແກ່ການສ້າງປະຊາຄົມຮ່ວມຊາຕາກຳຂອງມວນມະນຸດ.

ໃນໄລຍະ6ປີຜ່ານມາ,ມີຫຼາຍໝາກຜົນທີ່ພົ້ນເດັ່ນສົມບູນອັນເກີດຈາກການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ,ຊຶ່ງໃນວັນທີ3ທັນວາ2021 ທາງລົດໄຟລາວ-ຈີນ ໄດ້ເປີດນຳໃຊ້ຢ່າງເປັນທາງການ,ຫາກນັບມາຮອດ100ວັນຂອງການໃຫ້ບໍລິການ ທາງລົດໄຟລາວ-ຈີນໄດ້ຂົນສົ່ງຜູ້ໂດຍສານຫຼາຍກວ່າ1,8ລ້ານເທື່ອຄົນ ແລະ ຂົນສົ່ງສິນຄ້າຫຼາຍກວ່າ1,2ລ້ານໂຕນ.ໃນນັ້ນ ເປັນການຂົນສົ່ງສິນຄ້າຂ້າມຊາຍແດນຫຼາຍກວ່າ2,8ແສນໂຕນ.ການເປີດນຳໃຊ້ເສັ້ນທາງລົດໄຟລາວ-ຈີນ ຢ່າງເປັນທາງການ ໄດ້ສະແດງໃຫ້ເຫັນເຖິງຄວາມຮ່ວມມືລະຫວ່າງ6ປະເທດໃນເຂດລ່ອງແມ່ນ້ຳລ້ານຊ້າງ-ແມ່ນ້ຳຂອງ ໃນຂົງເຂດການເຊື່ອມໂຍງເຊື່ອມຈອດທີ່ເລິກເຊິ່ງ ແລະ ກ້າວໄປຂ້າງໜ້າຢ່າງບໍ່ຢຸດຢັ້ງ.

ໃນດ້ານການຮ່ວມມືຕ້ານລະບາດພະຍາດໂຄວິດ-19,ໂດຍປະເທດໃນເຂດລ່ອງແມ່ນ້ຳລ້ານຊ້າງ-ແມ່ນ້ຳຂອງ ກໍ່ໄດ້ຮ່ວມມືກັນຢ່າງກົມກຽວ ແລະ ແຂງແຮງ.ຊຶ່ງ ສປ ຈີນ ກໍໄດ້ໃຫ້ການຊ່ວຍເຫຼືອລ້າດ້ານຢາກວດຫາເຊື້ອ,ຜ້າອັດປາກ,ຊຸດປ້ອງກັນພະຍາດ ແລະ ວັດຖຸອຸປະກອນທີ່ຈຳເປັນອື່ນໆຫຼາຍງວດໃຫ້ແກ່5ປະເທດໃນເຂດລ່ອງແມ່ນ້ຳຂອງ.ພ້ອມຈັດກອງປະຊຸມແລກປ່ຽນບົດຮຽນຕ້ານການລະບາດພະຍາດ ແລະ ແຕ່ງຕັ້ງໜ່ວຍງານຜູ້ຊ່ຽວຊານການແພດມາຊ່ວຍເຫຼືອທັງ5ປະເທດດັ່ງກ່າວ,ສ້າງຫ້ອງທົດລອງກວດຫາ ນິວຄລີອິກ( Nucleic) ແລະ ໂຮງໝໍຊົ່ວຄາວ,ມາຮອດທ້າຍປີ2021ຈີນໄດ້ສະໜອງວັຄຊີນຕ້ານພະຍາດໂຄວິດ-19ຈຳນວນ190ລ້ານຫຼອດໃຫ້ແກ່5ປະເທດໃນເຂດລ່ອງແມ່ນ້ຳຂອງ ທັງດ້ວຍຮູບແບບການຊ່ວຍເຫຼືອ ແລະ ຈັດຊື້ທາງທຸລະກິດ.

ເຖິງແມ່ນໄດ້ຮັບຜົນກະທົບຈາກການລະບາດຂອງພະຍາດໂຄວິດ-19;ແຕ່ ສປຈີນ ແລະ ປະເທດເຂດລ່ອງແມ່ນ້ຳຂອງ ກໍ່ໄດ້ພ້ອມກັນຜ່ານຜ່າຄວາມຫຍຸ້ງຍາກຕ່າງໆ,ໄດ້ລົງເລິກການຮ່ວມມືດ້ານເສດຖະກິດ-ການຄ້າ ທີ່ກວ້າງຂວາງ ແລະ ສູງຂຶ້ນຢ່າງບໍ່ຢຸດຢັ້ງ,ເພື່ອຮ່ວມກັນຊຸກຍູ້ ແລະ ພັດທະນາເສດຖະກິດ.ຊຶ່ງໃນປີ2021 ຍອດມູນຄ່າການຄ້າລະຫວ່າງຈີນ ກັບ ປະເທດລ່ອງແມ່ນ້ຳຂອງ ໄດ້ບັນລຸເຖິງ398ຕື້ໂດລາສະຫະລັດ ຊຶ່ງເພີ່ມຂຶ້ນ23%ເມື່ອທຽບໃສ່ໄລຍະດຽວກັນຂອງປີຜ່ານມາ.

ຢ່າງໃດກໍດີ,ໃນໄລຍະ6ປີຜ່ານມາ ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ໄດ້ຜ່ານການທົດສອບຈາກການປ່ຽນແປງຂອງສະຖານະການໂລກທີ່ສັບສົນ,ອີກທັງໄພພິບັດທາງທຳມະຊາດ,ການປ່ຽນແປງຂອງດິນຟ້າອາກາດ,ໄພຄຸກຄາມຄວາມໝັ້ນຄົງແບບໃໝ່,ກາດລະບາດຂອງພະຍາດໂຄວິດ-19 ແລະອື່ນໆ.ຊຶ່ງທັງ6ປະເທດກໍ່ໄດ້ຊຸກຍູ້ການພັດທະນາພາຍໃຕ້ສະພາບຄວາມຫຍຸ້ງຍາກ ແລະ ສິ່ງທ້າທາຍນານັບປະການ.ທັງນີ້,ຄວາມຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ໄດ້ສ້າງສະພາບການໃໝ່ພາຍໃຕ້ສະຖານະການທີ່ປ່ຽນແປງ,ໂດຍໄດ້ດຳເນີນໂຄງການທີ່ມີຜົນປະໂຫຍດຕໍ່ປະຊາຊົນຫຼາຍກວ່າ500ໂຄງການ ແລະ ໃນອະນາຄົດ ສປ ຈີນ ຈະປະຕິບັດຕາມແນວທາງດ້ານການທູດ ທີ່ມີຄວາມຮັກແພງ,ຈິງໃຈ,ອະນຸເຄາະຕໍ່ກັນ,ໂອບເອື້ອອາລີກັບປະເທດອ້ອມຂ້າງ ແລະ ເພີ່ມທະວີຄວາມຮ່ວມມືກັບປະເທດເຂດລ່ອງແມ່ນ້ຳຂອງ ເພື່ອສ້າງອະນາຄົດທີ່ດີງາມຍິ່ງໆຂຶ້ນໃຫ້ແກ່ປະຊາຊົນຂອງປະເທດໃນພາກພື້ນນີ້.

 

 

แชร์