ກຽມເປີດສາກເວທີອອສກາຣ໌ ຄັ້ງທີ 94

ການປະກາດລາງວັນ ອອສກາຣ໌ ຄັ້ງທີ 94, ນະເວລານີ້ນັບວ່າເປັນຂັ້ນຕອນສຸດທ້າຍກ່ອນທີ່ທົ່ວໂລກຈະໄດ້ຮັບຊົມບັນຍາກາດຈັດງານຊຶ່ງຫວນຄືນສູ່ພາວະປົກກະຕິທີ່ເຕັມໄປດ້ວຍຄວາມຫຼຸຫຼາຕາມສະໄຕລ໌ຮໍລລີວູດ. ຫຼັງຈາກທີ່ປີຜ່ານມາ, ວາລະດຳເນີນງານເປັນໄປຢ່າງງຽບເຫງົາ.

ສຳນັກຂ່າວຕ່າງປະເທດໄດ້ລາຍງານເມື່ອວັນທີ 23 ມີນາ 2022 ວ່າງານອອສກາຣ໌ຄັ້ງນີ້, ຈະເປີດສາກຂຶ້ນໃນເວລາ20:00ໂມງຂອງວັນອາທິດທີ 27 ມີນາ 2022 ຊຶ່ງກົງກັບເວລາ 7:00 ໂມງຂອງວັນຈັນທີ 28 ມີນາ (ຕາມເວລາບ້ານເຮົາ)ທີ່ໂຮງລະຄອນດອລບີ, ນະຄອນລອສແອງເຈລິສ ແລະ ຈະມີການຖ່າຍທອດສົດຜ່ານທາງສະຖານີ ເອບີຊີ ຂອງອະເມຣິກາ.

ທັງນີ້, ວິລ ແພຄເກີຣ໌ ຊຶ່ງເປັນໂປຣດິວເຊີ້ ( Producer ຜູ້ຢູ່ເບື້ອງຫຼັງ ຫຼື ຜູ້ຄວບຄຸມການຜະລິດລາຍການ ) ກໍ່ໃຫ້ຮູ້ວ່າ ເຣຈິນ້າ ຮອລລ໌, ເອມີ ຊູເມີຣ໌ ແລະ ແວນດ້າ ໄຊກ໌ສ ຈະຂຶ້ນເວທີເຮັດໜ້າທີ່ພິທີກອນຮ່ວມໃນງານ, ຊຶ່ງທັງ 3 ສາວຈະມາສ້າງຄວາມແຕກຕ່າງໃຫ້ກັບເວທີນີ້. ນອກນັ້ນ, ຍັງມີດາລາດັງເກືອບ 40 ຄົນທີ່ຈະມາຮ່ວມຂຶ້ນເວທີໃນຖານະຜູ້ເຊີນລາງວັນ.

ຜົນງານທີ່ໄດ້ຮັບການສະເໜີຊື່ເຂົ້າຊີງລາງວັນສາຂາ ຮູບເງົາດີເດັ່ນໃນປີນີ້ປະກອບມີ 1.Belfast 2.CODA 3.Don’t Look Up 4.Drive My Car 5.Dune 6.King Richard 7.Licorice Pizza 8.Nightmare Alley 9.The Power of the Dog ແລະ 10.West Side Story. ໃນນີ້, ຮູບເງົາເລື່ອງ The Power of the Dog ເປັນຕົວເກງທີ່ຈະຄວ້າອອສກາຣ໌ໃນສາຂາຮູບເງົາດີເດັ່ນ ແລະ ສາຂາຜູ້ກຳກັບດີເດັ່ນ(ເຈນ ແຄມປຽນ) ແຕ່ກໍ່ມີຄວາມເປັນໄປໄດ້ທີ່ CODA ຈະຄວ້າລາງວັນໄດ້ເຊັ່ນກັນ ຫຼັງຈາກທີ່ຮູບເງົາເລື່ອງນີ້ສາມາດຄ້ວາລາງວັນ ທີມນັກສະແດງດີເດັ່ນປະເພດຮູບເງົາ ຈາກເວທີກິລດ໌ ອະວອຣ໌ດສ໌ ຫຼື ແຊກ ອະວອຣ໌ດສ໌ ມາແລ້ວ.

ສຳລັບນັກສະແດງທີ່ເປັນຕົວເກງໄດ້ແກ່ ວິລ ສະມິທ ຊຶ່ງຮັບບົດນຳໃນ King Richard, ເຈສສິກ້າ ເຊສເທນ ຈາກ The Eyes of Tammy Faye, ທຣອຍ ຄອຕເຊີຣ໌ ຈາກ CODA ແລະ ອາເຣຍນາ ເດີໂບສ ຈາກ West Side Story. ສ່ວນຜູ້ທີ່ໄດ້ເຂົ້າຊີງລາງວັນເພງດີເດັ່ນໄດ້ແກ່ ບີຢອນເຊ້,ແວນ ມໍຣ໌ຣິສັນ ແລະ ບິລລີ້ ໄອລິຊ ຊຶ່ງພວມຢູ່ລະຫວ່າງການເຈລະຈາໃຫ້ຮ່ວມສະແດງເທິງເວທີ.

ຢ່າງໃດກໍດີ, ເມື່ອວັນທີ 7 ມີນາ 2022 ກໍ່ໄດ້ມີການຈັດງານລ້ຽງອາຫານທ່ຽງສຳລັບຜູ້ເຂົ້າຊີງລາງວັນອອສກາຣ໌, ຈາກທີ່ຕ້ອງໂຈະງານດັ່ງກ່າວເມື່ອປີຜ່ານມາ. ຊຶ່ງໃນປີນີ້ກໍ່ໄດ້ຍ້າຍຈາກສະຖານທີ່ຈັດປະຈຳ, ນັ້ນກໍຄືຫ້ອງ Ray Dolby Ballroom ທີ່ Hollywood &Highland Center ໄປຈັດທີ່ໂຮງແຮມ Fairmont Century Plaza.

แชร์