ສະຫາຍ ລາວປາວຊົ່ງ ນະວົງໄຊ ຊີ້ນໍາວຽກງານໂຄສະນາອົບຮົມ ທີ່ຫົວພັນ

ເມື່ອລະຫວ່າງ ວັນທີ 19-22 ມີນາ 2022, ສະຫາຍ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ (ຄອສພ) ພ້ອມດ້ວຍຄະນະ. ໄດ້ເດີນທາງຈາກແຂວງຊຽງຂວາງໄປແຂວງຫົວພັນເພື່ອສືບຕໍ່ເຄື່ອນໄຫວຊີ້ນໍາວຽກງານໂຄສະນາອົບຮົມຢູ່ແຂວງຫົວພັນ ເຊິ່ງເປັນແຂວງທີ 3 ພາຍຫຼັງເຄື່ອນໄຫວວຽກງານຢູ່ແຂວງໄຊສົມບູນ ແລະແຂວງຊຽງຂວາງ.

ໃນວາລະພົບປະ ກັບ ຄະນະໂຄສະນາອົບຮົມແຂວງຫົວພັນ, ໂດຍການເຂົ້າຮ່ວມຂອງ ສະຫາຍ ນາງ ລ້ອງຄໍາ ພອນມີໄຊ ກໍາມະການປະຈໍາພັກແຂວງ, ຫົວໜ້າຄະນະຈັດຕັ້ງແຂວງ.ຊຶ່ງໄດ້ລາຍງານສະພາບການພັດທະນາເສດຖະກິດ-ສັງຄົມທີ່ພົ້ນເດັ່ນຂອງແຂວງ, ຫຼັງຈາກນັ້ນ ສະຫາຍ ຕົງລີ ເຕັ່ງ ກໍາມະການພັກແຂວງ, ຫົວໜ້າຄະນະໂຄສະນາອົບຮົມແຂວງກໍ່ໄດ້ລາຍງານສະພາບການເຄື່ອນໄຫວວຽກງານໂຄສະນາອົບຮົມໃນໄລຍະຜ່ານມາ ນັບທັງດ້ານຕັ້ງໜ້າ ແລະ ດ້ານຄົງຄ້າງ. ພ້ອມນີ້, ກໍໄດ້ແລກປ່ຽນຄວາມຄິດຄວາມເຫັນເພື່ອຖອດຖອນບົດຮຽນລະຫວ່າງສູນກາງກັບທ້ອງຖິ່ນກ່ຽວກັບວິຊາສະເພາະແຕ່ລະດ້ານໃນເຊີງວິຊາການ, ເພື່ອພ້ອມກັນສ້າງການຫັນປ່ຽນໃໝ່ໃຫ້ມີຄຸນນະພາບດີຂຶ້ນກວ່າເກົ່າ.

ໃນວາລະສຳຄັນນີ້, ສະຫາຍຮອງຫົວໜ້າ ຄອສພ ກໍ່ໄດ້ໃຫ້ກຽດໂອ້ລົມໂດຍສະແດງຄວາມຊົມເຊີຍຄະນະໂຄສະນາອົບຮົມແຂວງ ແລະເມືອງທີ່ໄດ້ເອົາໃຈໃສ່ຜ່ານຜ່າຄວາມຫຍຸ້ງຍາກຕ່າງໆ ຈົນສາມາດເຮັດສໍາເລັດໜ້າທີ່ໄດ້ເປັນຢ່າງດີ. ໃນໂອກາດດຽວກັນ, ທ່ານກໍ່ໄດ້ໃຫ້ທິດຊີ້ນຳຕໍ່ຄະນະພັກແຂວງ, ເມືອງ ແລະຄະນະໂຄສະນາອົບຮົມແຂວງ, ເມືອງສືບຕໍ່ເອົາໃຈໃສ່ໃກ້ຊິດຕິດແທດ, ຊີ້ນໍາ-ນໍາພາ ແລະສ້າງເງື່ອນໄຂໃຫ້ຄະນະໂຄສະນາອົບຮົມແຂວງ ແລະຄະນະໂຄສະນາອົບຮົມເມືອງໄດ້ເຄື່ອນໄຫວວຽກງານຢ່າງເປັນປົກກະຕິ ແລະ ມີຄຸນນະພາບດີຂຶ້ນກວ່າເກົ່າ.

ເອົາໃຈໃສ່ຕິດຕາມເກັບກໍາສະພາບແນວຄິດຫາງສຽງສັງຄົມທີ່ມີຕໍ່ການນໍາພາຂອງພັກ ແລະການຄຸ້ມຄອງຂອງລັດໂດຍສະເພາະໃນໄລຍະການແຜ່ລະບາດຂອງພະຍາດ ໂຄວິດ-19 ຮອບທີ 3, ສະຖານະການໂລກ, ການເໜັງຕີງຂອງລາຄານໍ້າມັນ, ລາຄາສິນຄ້າ, ບັນຫາເງິນເຟີ້ ແລະອື່ນໆ ເພື່ອລາຍງານໃຫ້ຄະນະປະຈໍາພັກມີທິດຊີ້ນໍາໃນການແກ້ໄຂ; ນອກນັ້ນກໍຕ້ອງໄດ້ເອົາໃຈໃສ່ຕອບແກ້ ແລະອະທິບາຍບັນຫາພົ້ນເດັ່ນຕ່າງໆທີ່ເກີດຂຶ້ນເຊິ່ງກະທົບຕໍ່ແນວຄິດຂອງພະນັກງານ, ສະມາຊິກພັກ ແລະ ປະຊາຊົນຢ່າງທັນການ.

ຫັນເອົາແຜນພັດທະນາວຽກງານໂຄສະນາອົບຮົມຮອດປີ 2025 ມາສ້າງເປັນແຜນວຽກ, ແຜນງົບປະມານໃນແຕ່ລະປີຢ່າງລະອຽດ ແລະ ເຄື່ອນໄຫວຕາມແຜນຢ່າງມີຈຸດສຸມ,ທັງສອດຄ່ອງກັບສະພາບຄວາມເປັນຈິງໃນແຕ່ລະໄລຍະ. ພ້ອມເອົາໃຈໃສ່ປັບປຸງເນື້ອໃນ, ຮູບການ ແລະວິທີການເຄື່ອນໄຫວວຽກງານໂຄສະນາສຶກສາອົບຮົມໃຫ້ເລິກເຊິ່ງ, ມີຫຼາຍຮູບຫຼາຍສີ, ແທດເໝາະກັບແຕ່ລະເປົ້າໝາຍເພື່ອເຮັດໜ້າທີ່ເປັນເສນາທິການໃຫ້ຄະນະພັກຂັ້ນຂອງຕົນໃຫ້ດີ ແລະມີຄຸນນະພາບ.

ດ້ານພາລະບົດບາດຂອງຄະນະໂຄສະນາອົບຮົມແຂວງ ແລະເມືອງນັ້ນ, ໃຫ້ສືບຕໍ່ປະຕິບັດຕາມອັນເກົ່າໄປກ່ອນ, ພາຍຫຼັງພາລະບົດບາດຂອງຄະນະໂຄສະນາອົບຮົມສູນກາງພັກປັບປຸງສໍາເລັດຈຶ່ງຈະຮ່າງພາລະບົດບາດຂອງຄະນະໂຄສະນາອົບຮົມທ້ອງຖິ່ນຄືນໃໝ່ເພື່ອໃຫ້ເປັນເອກະພາບກັນໃນທົ່ວປະເທດ.

ເອົາໃຈໃສ່ການໂຄສະນາ ແລະຊຸກຍູ້ການຈັດຕັ້ງປະຕິບັດ 2 ວາລະແຫ່ງຊາດໃຫ້ເລິກເຊິ່ງ, ທົ່ວເຖິງ ແລະເພື່ອໃຫ້ມີຜົນສໍາເລັດຕາມກໍານົດໝາຍ.

- ສ້າງແຜນການຈັດຕັ້ງການສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ ປີ 2022 ໃຫ້ຟົດຟື້ນ ແລະມີຄວາມໝາຍເລິກເຊິ່ງໂດຍແທດເໝາະກັບເງື່ອນໄຂ ແລະຈຸດພິເສດຂອງແຂວງຕົນ.

ໃນໂອກາດດັ່ງກ່າວສະຫາຍຮອງຫົວໜ້າ ຄອສພ ຍັງໄດ້ມອບປຶ້ມເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ປຶ້ມຄັດຈ້ອນມະຕິກອງປະຊຸມໃຫຍ່ ຄັ້ງທີ XIX ຂອງພັກກອມມູນິດຈີນ, ເຈລລ້າງມື ແລະເງິນຈໍານວນໜຶ່ງໃຫ້ຄະນະໂຄສະນາອົບຮົມແຂວງ; ພ້ອມດຽວກັນນີ້ຍັງໄດ້ນໍາພາຄະນະໄປຢ້ຽມຢາມ ແລະ ເຮັດວຽກຢູ່ເມືອງສົບເບົາ ແລະໄດ້ພົບປະໂອ້ລົມພະນັກງານໂຄສະນາອົບຮົມເມືອງ, ພ້ອມທັງມອບເຈລລ້າງມື, ຄອມພິວເຕີຣ໌ 1 ໜ່ວຍ ແລະເງິນຈໍານວນໜຶ່ງ ໃຫ້ແກ່ຄະນະໂຄສະນາອົບຮົມເມືອງສົບເບົາອີກດ້ວຍ.

ຂ່າວ-ພາບ: ດາວທະວີສຸກ

แชร์