ຊົມຫຸ່ນເຟືອງແສນງາມ ທີ່ບ້ານໜອງບົວທອງ

ນີ້ແມ່ນສິລະປະດ້ານການປະດິດຫຸ່ນເຟືອງ ເພື່ອບອກເລົ່າຄວາມອຸດົມສົມບູນ ແລະ ວິຖີຊີວິດຊາວກະສິກຳ ຜ່ານເທສະການງານຫຸ່ນເຟືອງທົ່ງນາແຊງບ້ານນາ, ຊຶ່ງຈັດຂຶ້ນໃນລະຫວ່າງວັນທີ 21-27 ມີນາ 2022 ທີ່ບ້ານໜອງບົວທອງ ເມືອງສີໂຄດຕະບອງ ນະຄອນຫຼວງວຽງຈັນ.

ໂດຍທ່ານ ນາງ ວົງຈັນ ບົວແພງ ຮອງປະທານໂຮງແຮມລາວເທລ ໃນນາມປະທານຈັດງານໄດ້ກ່າວເຖິງຈຸດປະສົງຂອງເທສະການຫຸ່ນເຟືອງ,ແມ່ນເພື່ອສ້າງເງື່ອນໄຂໃຫ້ປະຊາຊົນໃນເຂດໃກ້ຄຽງໄດ້ນຳເອົາສິນຄ້າມາແລກປ່ຽນຊື້-ຂາຍ ແນໃສ່ສ້າງສີສັນບັນຍາກາດມ່ວນຊື່ນແກ່ຊາວເມືອງ. ໂດຍການຈັດສະແດງຫຸ່ນເຟືອງຫຼາກຫຼາຍຮູບແບບ ທີ່ເຂົ້າກັບການຈັດສະຖານທີ່ແບບບ້ານໆຢ່າງວິຖີຊາວນາ, ນອກນັ້ນຍັງມີບໍລິການເຄື່ອງຫຼິ້ນສຳລັບເດັກ,ມີການສະແດງຂອງບັນດາສິລະປິນ ແລະມີການຈັດສະແດງລົດ ໂດຍບໍລິສັດລາວຟອດຊິຕີ.

ຂະນະທີ່ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວນະຄອນຫຼວງວຽງຈັນ ກໍ່ໄດ້ກ່າວວ່າການຈັດງານເທສະການຫຸ່ນເຟືອງທົ່ງນາແຊງບ້ານນາເປັນໜຶ່ງໃນກິດຈະກຳຂອງແຜນວຽກຊຸກຍູ້ສົ່ງເສີມການທ່ອງທ່ຽວລາວ, ກໍຄືການສ້າງກິດຈະກຳ ”ລາວທ່ຽວລາວ” ເພື່ອສ້າງສີສັນດ້ານການທ່ອງທ່ຽວຢູ່ນະຄອນຫຼວງວຽງຈັນ, ພາຍໃຕ້ເງື່ອນໄຂ ແລະນະໂຍບາຍຂອງລັດຖະບານ.

ໂດຍທ່ານ ທົງ ຫົດທິລາດ ຮອງເຈົ້າເມືອງສີໂຄດຕະບອງ ກໍ່ໄດ້ກ່າວໃນໂອກາດດຽວກັນວ່າເທສະການນີ້ຈັດຂຶ້ນພາຍໃຕ້ລະບຽບການດ້ານສາທາລະນະສຸກເພື່ອປ້ອງກັນພະຍາດໂຄວິດ-19, ລວມທັງການປະຕິບັດໂມງເວລາ, ການຄວບຄຸມເຄື່ອງສຽງ, ເພື່ອຮັບປະກັນທັງຄວາມເບີກບານມ່ວນຊື່ນ, ການສ້າງໂອກາດຄ້າຂາຍ ແລະຄວາມເປັນລະບຽບຮຽບຮ້ອຍໃນສັງຄົມ.

แชร์