ເດັກປະຖົມ 64 ພັນຄົນ ຈະໄດ້ຮັບໂພຊະນາການທີ່ດີຈາກອາຫານທ່ຽງໃນໂຮຮຽນ

ນັກຮຽນຊັ້ນປະຖົມຈຳນວນ 64.000 ຄົນ ໃນ707 ໂຮງຮຽນຢູ່ 17 ເມືອງ ເປົ້າໝາຍບູລິມະສິດຂອງ 11 ແຂວງ, ຈະໄດ້ຮັບອາຫານທີ່ມີໂພຊະນາການຜ່ານໂຄງການອາຫານທ່ຽງ. ຊຶ່ງມີສ່ວນປະສົມຈາກເຂົ້າ, ແກ່ນຖົ່ວແຫ້ງ ແລະນໍ້າມັນພືດໂດຍຈະນຳມາປຸງແຕ່ງໃສ່ກັບວັດຖຸດິບປະເພດຊີ້ນ, ປາ, ໄຂ່, ຜັກ ແລະອື່ນໆເພື່ອເພີ່ມຕື່ມຄຸນຄ່າສານອາຫານທີ່ຈະຊ່ວຍໃຫ້ເດັກມີພັດທະນາການທາງສະໝອງ ແລະຮ່າງກາຍດີຂຶ້ນ.

ໂດຍອົງການອາຫານໂລກ,ໄດ້ຈັດພິທີເປີດໂຄງການອາຫານທ່ຽງໃນໂຮງຮຽນໄລຍະໃໝ່ຢ່າງເປັນທາງການເມື່ອວັນທີ 22 ມີນາ 2022 ທີ່ເມືອງສັງທອງ ນະຄອນຫຼວງວຽງຈັນ, ຂົ້າຮ່ວມໂດຍທ່ານນາງ ຂັນທະລີ ສິລິພົງພັນ ຮອງລັດຖະມົນຕີກະຊວງສຶກສາທິການ ແລະ ກີລາ ພ້ອມດ້ວຍທ່ານ ປີເຕີຣ໌ ເຮຍ໌ມອນດ໌ ເອກອັກຄະລັດຖະທູດສະຫະລັດອະເມຣິກາປະຈຳ ສປປ ລາວ. ໂຄງການດັ່ງກ່າວໄດ້ຮັບການສະໜັບສະໜູນຈາກລັດຖະບານສະຫະລັດອະເມຣິກາ, ຈັດຕັ້ງປະຕິບັດໂດຍອົງການອາຫານໂລກ.

ໂດຍຮອງລັດຖະມົນຕີກະຊວງສຶກສາທິການ ແລະ ກີລາ ໄດ້ກ່າວວ່າ “ແຜນງານສົ່ງເສີມອາຫານທ່ຽງໃນໂຮງຮຽນແມ່ນໜຶ່ງໃນແຜນພັດທະນາການສຶກສາ ແລະກີລາ, ຜ່ານການຈັດຕັ້ງປະຕິບັດນັບເປັນເວລາເກືອບ 20 ປີມາແລ້ວ, ສາມາດເຫັນໄດ້ຜົນສຳເລັດເຊັ່ນອັດຕາເຂົ້າຮຽນຢູ່ຫຼາຍເມືອງຫຼາຍແຂວງ, ໃນນັ້ນອັດຕາປະລະການຮຽນ, ອັດຕາຄ້າງຫ້ອງຂອງເດັກອະນຸບານ ແລະເດັກຊັ້ນປະຖົມມີການປ່ຽນແປງທີ່ດີຂຶ້ນ. ອີກທັງໄດ້ຊ່ວຍແກ້ໄຂບັນຫາໂພຊະນາການ, ບັນຫາສຸຂະພາບ, ຊ່ວຍປັບປຸງການຮຽນຮູ້ຂອງເດັກ ແລະຊ່ວຍແບ່ງເບົາພາລະຂອງຄອບຄົວທຸກຍາກຈາກການຫຼຸດຜ່ອນພາລະຈັດຫາອາຫານທ່ຽງໃຫ້ລູກຫຼານ, ຈິ່ງເຮັດໃຫ້ຜູ້ປົກຄອງມີເວລາຫຼາຍຂຶ້ນໃນການສ້າງຖະກິດຄອບຄົວ”.

ຂະນະທີ່ທ່ານ ຢານ ເດລບາເຣີ ຜູ້ອຳນວຍການ ແລະຜູ້ຕາງໜ້າຂອງອົງການອາຫານໂລກປະຈຳ ສປປ ລາວ ກໍ່ໃຫ້ຮູ້ວ່າ ” ໃນຕໍ່ໜ້າໂຄງການນີ້ຈະຖືກມອບໂອນໃຫ້ໂຄງການອາຫານທ່ຽງໃນໂຮງຮຽນແຫ່ງຊາດ, ເປົ້າໝາຍຫຼັກກໍ່ເພື່ອຊ່ວຍລັດຖະບານສະໜອງອາຫານທ່ຽງປະຈຳວັນໃຫ້ເດັກນ້ອຍໃນທຸກໂຮງຮຽນຂອງ ສປປ ລາວ,ຊຶ່ງສອດຄ່ອງກັບເປົ້າໝາຍຂອງອົງການອາຫານໂລກທີ່ແນໃສ່ວຽກງານຫຼຸດຜ່ອນການຂາດສານອາຫານ ແລະຊ່ວຍໃນການຮຽນຮູ້ຂອງເດັກ”.

ທັງນີ້, ໂຄງການແມັກກາວັນໂດຂອງກະຊວງກະສິກຳສະຫະລັດອະເມຣິກາ, ໄດ້ລົງທຶນໃຫ້ອົງການອາຫານໂລກສຳລັບສະໜັບສະໜູນໂຄງການອາຫານທ່ຽງໃນໂຮງຮຽນຂອງລັດຖະບານມາຕັ້ງແຕ່ປີ 2008. ລວມມູນຄ່ານັບມາເຖິງປັດຈຸບັນປະມານ85ລ້ານໂດລາສະຫະລັດ, ນອກນັ້ນອົງການອາຫານໂລກຍັງໄດ້ຮ່ວມມືກັບລັດຖະບານໃນການສົ່ງເສີມບາງກິດຈະກຳໃນຊຸມຊົນເປັນຕົ້ນແມ່ນສວນຄົວໂຮງຮຽນ, ກິດຈະກຳລ້ຽງສັດຂະໜາດນ້ອຍ ແລະໜອງປາເພື່ອເພີ່ມຄວາມຫຼາກຫຼາຍໃນລາຍການອາຫານທ່ຽງໃຫ້ແກ່ເດັກນັກຮຽນ.

 

แชร์