ມີ 7 ສະໂມສອນຮ່ວມຊີງໄຊ ເຕະບານ ເປບຊີ ລາວລີກ 1 ປະຈໍາປີ 2022

 

ການແຂ່ງຂັນເຕະບານ ເປບຊີ ລາວລີກ 1 ເປັນການແຂ່ງຂັນກີລາເຕະບານລະດັບສູງສຸດຂອງສະໂມສອນກີລາເຕະບານໃນ ສປປ ລາວ ທີ່ຖືກຮັບຮອງຈາກສະຫະພັນບານເຕະເອເຊຍ (AFC) ແລະ ສະຫະພັນບານເຕະນາໆຊາດ ຫຼື FIFA ເລີ່ມຈັດການແຂ່ງຂັນນັບແຕ່ປີ 2013 ເປັນຕົ້ນມາ, ແຕ່ໃນປີ 2021 ຖືກໂຈະການແຂ່ງຂັນ ເນື່ອງຈາກການລະບາດຂອງພະຍາດໂຄວິດ-19. ສຳລັບການແຂ່ງຂັນປີນີ້ ແມ່ນກຳລັງເປີດສະໜາມຊີງໄຊ, ໃນນັ້ນ ມີ 7 ສະໂມສອນເຂົ້າຮ່ວມ.

ທ່ານ ຄຳໄພ ປຣະເສີດ ຮອງປະທານສະຫະພັນບານເຕະແຫ່ງຊາດລາວ, ທັງເປັນຫົວໜ້າອະນຸກຳມະການຈັດການແຂ່ງຂັນສະຫະພັນບານເຕະແຫ່ງຊາດ ຫຼື ສຕລ, ໄດ້ເປັນປະທານຖະແຫຼງຂ່າວການແຂ່ງຂັນເຕະບານ ເປບຊີ ລາວລີກ 1 ປະຈໍາປີ 2022 ເມື່ອຕອນບ່າຍວັນທີ 18 ມີນາ ທີ່ Studio Indee Record ບ້ານໂພນສະຫວາດໃຕ້ ເມືອງຈັນທະບູລີ ນະຄອນຫຼວງວຽງຈັນ.

ການແຂ່ງຂັນຄັ້ງນີ້ ມີ 7 ສະໂມສອນກີລາເຕະບານເຂົ້າຮ່ວມແຂ່ງຂັນຄື: ສະໂມສອນ ຊ້າງນ້ອຍ, ສະໂມສອນ ກອງທັບ, ສະໂມສອນ ວຽງຈັນ, ສະໂມສອນ ເອສະຣາ, ສະໂມສອນ ມາສເຕີ້ ເຊເວັ້ນ, ສະໂມສອນ ຫຼວງພຣະບາງ ແລະ ສະໂມສອນ ຈຳປາສັກ. ຊຶ່ງນໍາໃຊ້ 5 ສະໜາມແຂ່ງຂັນຄື: ສະໜາມກີລາແຫ່ງຊາດຫຼັກ 16, ສະໜາມກີລາກອງທັບ ຫຼັກ 5, ສະໜາມກີລາມະຫາວິທະຍາໄລແຫ່ງຊາດລາວ, ສະໜາມກີລາແຂວງຈຳປາສັກ ແລະ ສະໜາມກີລາແຂວງຫຼວງພຣະບາງ. ສ່ວນຮູບແບບການແຂ່ງຂັນແມ່ນພົບກັນໝົດຈໍານວນ 3 ຮອບ (ຮອບ 3: ສະໂມສອນທີ່ມີຜົນງານດີກວ່າພົບກັນຮອບທີ 1 ແລະ 2 ຫຼື Head to Head ຊຶ່ງຈະໄດ້ສິດລົງແຂ່ງຂັນເປັນທີມເຈົ້າບ້ານໃນຮອບ 3).

ການແຂ່ງຂັນເຕະບານ ເປບຊີ ລາວລີກ 1 ປະຈໍາປີ 2022 ໄດ້ເປີດສາກຂຶ້ນຢ່າງເປັນທາງການໃນລະຫວ່າງວັນທີ 12 ມີນາ ຫາ 4 ກັນຍາ 2022. ຊຶ່ງມີທັງໝົດ 63 ນັດ, ມີເງິນລາງວັນລວມທັງໝົດ 630 ລ້ານກີບ ຄື: ຊະນະເລີດ ໄດ້ຮັບ 300 ລ້ານກີບ, ຮອງຊະນະເລີດ ໄດ້ຮັບ 150 ລ້ານກີບ, ອັນດັບ 3 ໄດ້ 80 ລ້ານກີບ, ອັນດັບ 4 ໄດ້ 40 ລ້ານກີບ, ອັນດັບ 5 ໄດ້ 30 ລ້ານກີບ, ອັນດັບ 6 ໄດ້ 20 ລ້ານກີບ ແລະ ອັນດັບສຸດທ້າຍ ໄດ້ 10 ລ້ານກີບ.

ໃນພິທີຖະແຫຼງຂ່າວຄັ້ງນີ້, ກໍມີການມອບ-ຮັບການອຸປະຖໍາຈາກບໍລິສັດຜູ້ໃຫ້ການສະໜັບສະໜູນຈໍານວນໜຶ່ງ.

แชร์