ຮອງຫົວໜ້າ ຄອສພ ຢ້ຽມຢາມເຂື່ອນໄຟຟ້ານໍ້າງື່ມ 3

 

ໃນໂອກາດທີ່ ທ່ານ ລາວປາວຊົ່ງ ນະວົງໄຊ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ (ຄອສພ), ເຄື່ອນໄຫວຊຸກຍູ້ວຽກງານໂຄສະນາອົບຮົມ ຢູ່ແຂວງໄຊສົມບູນ. ຊຶ່ງເມື່ອຕອນບ່າຍຂອງວັນທີ 17 ມີນາ 2022, ກໍໄດ້ໄປຢ້ຽມຢາມໂຄງການກໍ່ສ້າງເຂື່ອນນໍ້າງື່ມ 3 ຕາມຄຳເຊີນຄະນະຮັບຜິດຊອບໂຄງການດັ່ງກ່າວ, ໂດຍໄດ້ຮັບການຕ້ອນຮັບຈາກ ທ່ານ ໂກ້ມົນຈັນ ເພັດອາສາ ຫົວໜ້າໂຄງການກໍ່ສ້າງເຂື່ອນໄຟຟ້ານໍ້າງື່ມ 3.

ເຂື່ອນນໍ້າງື່ມ 3 ເປັນໂຄງການຂອງລັດຖະບານ ຕັ້ງຢູ່ເມືອງລ່ອງແຈ້ງ ແຂວງໄຊສົມບູນ, ເລີ່ມລົງມືກໍ່ສ້າງ ໃນປີ 2015 ມາຮອດປັດຈຸບັນສໍາເລັດແລ້ວ 84%, ຄາດໝາຍໃຫ້ສໍາເລັດໃນ ປີ 2023. ໃນນັ້ນ, ລັດວິສາຫະກິດໄຟຟ້າລາວ ຖືຫຸ້ນ 20%, ບໍລິສັດ CSE 31%, ບໍລິສັດ Egate 25% ແລະ ບໍລິສັດ Guft 24%, ມີກໍາລັງຕິດຕັ້ງ 480 MW ສາມາດຜະລິດພະລັງງານໄດ້ 2.345 Gwh/ປີ, ມີມູນຄ່າການກໍ່ສ້າງ 1.290 ລ້ານໂດລາສະຫະລັດ, ກໍ່ສ້າງຕາມມາດຕະຖານສາກົນ, ຮັບເໝົາການກໍ່ສ້າງໂດຍ ບໍລິສັດ SHC ຂອງ ສປ ຈີນ ແລະ ບໍລິສັດ ART ຂອງປະເທດຝຣັ່ງເປັນທີ່ປຶກສາ. ເຂື່ອນໄຟຟ້ານ້ຳງື່ມ 3 ເປັນປະເພດເຂື່ອນຖົມດ້ວຍຫີນອັດແໜ້ນປົກດ້ວຍຄອນກຣີຕ, ມີຄວາມສູງ 210 ແມັດ, ຄວາມຍາວຂອງສັນເຂື່ອນ 518,5 ແມັດ, ມີບໍລິມາດເກັກເກັບນໍ້າໄດ້ 1.411 ລ້ານແມັດກ້ອນ, ເນື້ອທີ່ອ່າງເກັບນໍ້າ 27,5 Km, ມີອຸມົງສົ່ງນໍ້າໄປຫາເຮືອນຈັກ 10.657 ແມັດ.

ໂຄງການກໍ່ສ້າງເຂື່ອນໄຟຟ້ານໍ້າງື່ມ 3 ເປັນໂຄງການທີ່ສົ່ງຜົນກະທົບຕໍ່ປະຊາຊົນໜ້ອຍທີ່ສຸດ, ຜູ້ທີ່ໄດ້ຮັບຜົນກະທົບມີພຽງ 1 ບ້ານຄື: ບ້ານຊຽງແດດ ເມືອງພູກູດ ແຂວງຊຽງຂວາງ, ຈໍານວນ 158 ຫຼັງຄາເຮືອນ, 161 ຄອບຄົວ, ໄດ້ຮັບການຊົດເຊີຍ ແລະ ຈະຖືກຍົກຍ້າຍໄປຢູ່ບ້ານຈັດສັນທີ່ໂຄງການປຸກສ້າງໃຫ້ ເຊິ່ງການກໍ່ສ້າງບ້ານຈັດສັນສໍາເລັດແລ້ວ 99,85%. ພາຍຫຼັງການກໍ່ສ້າງເຂື່ອນໄຟຟ້ານ້ຳງື່ມ 3 ສຳເລັດ, ກໍ່ຄາດວ່າຈະສ້າງລາຍຮັບໃຫ້ປະເທດເຮົາປະມານ 100-150 ລ້ານໂດລາຕໍ່ປີ, ສໍາລັບກະແສໄຟຟ້າທີ່ຜະລິດໄດ້ແມ່ນຈະສົ່ງໄປຂາຍໃຫ້ປະເທດໄທ.

ພາບ-ຂ່າວ: ດາວທະວີສຸກ

แชร์