ວິກິດດ້ານການສຶກສາຈາກບັນຫາໂຄວິດ

ນັບເປັນເວລາກວ່າ 2 ປີແລ້ວ, ທີ່ໂລກຜະເຊີນກັບສະພາບລະບາດຂອງພະຍາດໂຄວິດ-19. ໄວຣັສຮ້າຍນີ້, ສ້າງຄວາມສູນເສຍຕໍ່ທຸກຂະແໜງການ; ໜຶ່ງໃນນັ້ນແມ່ນກໍ່ໃຫ້ເກີດວິກິດດ້ານການສຶກສາ, ຊຶ່ງຈະສົ່ງຜົນດ້ານລົບຕໍ່ໂອກາດໃນການເຮັດວຽກ ແລະຄວາມອາດສາມາດໃນການຫາລາຍໄດ້ໃນອະນາຄົດຂອງເດັກອີກດ້ວຍ.

ອີງຕາມລາຍງານຂອງສຳນັກຂ່າວຕ່າງປະເທດ ເມື່ອວັນທີ 17 ມີນາ 2022 ໄດ້ລະບຸວ່າ:ມູນນິທິ ທອມສັນຣອຍເຕີຣ໌ສ ທີ່ເປັນອົງກອນການກຸສົນ, ໄດ້ຮວບຮວມຂໍ້ມູນຄວາມຈິງກ່ຽວກັບວິກິດດ້ານການສຶກສາທີ່ເຍົາວະຊົນລຸ້ນນີ້ກຳລັງຜະເຊີນຈາກຜົນກະທົບຂອງພະຍາດໂຄວິດ-19.ໂດຍໄດ້ມີການອ້າງອີງຂໍ້ມູນຈາກຫຼາຍແຫຼ່ງ; ເປັນຕົ້ນແມ່ນ ອົງການການສຶກສາ ວິທະຍາສາດ ແລະວັດທະນະທຳ ແຫ່ງ ສະຫະປະຊາຊາດ (ຢູເນສໂກ) ຫຼື ອົງການຢູນິເຊຟ ແລະ ທະນາຄານໂລກ (ເວີລດ໌ແບງກ໌) ລ້ວນລະບຸເປັນສຽງດຽວກັນວ່າ “ການປິດໂຮງຮຽນເພື່ອຄວບຄຸມໂຣກລະບາດ ໂຄວິດ-19 ໄດ້ສົ່ງຜົນກະທົບຕໍ່ເດັກເປັນຈຳນວນຫຼາຍເຖິງ 1.600 ລ້ານຄົນ, ຊຶ່ງສ່ວນໃຫຍ່ແມ່ນຢູ່ໃນປະເທດທີ່ມີລາຍໄດ້ໜ້ອຍ ແລະປານກາງ.

ການປິດໂຮງຮຽນຍັງສົ່ງຜົນໃຫ້ເດັກນັກຮຽນໃນເຈເນີເຣຊັ້ນນີ້ ຫຼືຄົນຮຸ່ນນີ້, ສ່ຽງທີ່ຈະສູນເສຍລາຍໄດ້ຕະຫຼອດຊີບ, ນັບມູນຄ່າເສຍຫາຍລວມກັນເປັນປະມານ 17 ລ້ານລ້ານໂດລາສະຫະລັດ ຫຼືຄິດເປັນ 14% ຂອງລວມຍອດຜະລິດຕະພັນພາຍໃນ (ຈີດີພີ) ທົ່ວໂລກໃນປັດຈຸບັນ.

ລາຍງານດຽວກັນໃຫ້ຮູ້ຕື່ມວ່າ: ເດັກໃນກຸ່ມອາຍຸ 10 ປີ ຈຳນວນຫຼາຍກວ່າເຄິ່ງໜຶ່ງໃນປະເທດທີ່ມີລາຍໄດ້ໜ້ອຍ ແລະ ປານກາງ, ບໍ່ສາມາດອ່ານຂໍ້ຄວາມງ່າຍໆ ໄດ້ກ່ອນເກີດໂຣກລະບາດ ແລະອາດຈະເພີ່ມສູງຂຶ້ນເປັນ 70%. ໃນນີ້, ຕົວເລກເດັກໃນເອເຊຍໃຕ້, ລາຕິນອະເມຣິກາ ແລະ ແຄຣິບບຽນ ທີ່ຕ້ອງຂາດຮຽນໄດ້ພຸ່ງຂຶ້ນເກືອບ3ເທົ່າເມື່ອທຽບກັບເດັກໃນຢຸໂຣປຕາເວັນຕົກ.

ເຖິງແມ່ນວ່າການຮຽນອອນໄລນ໌ເປັນວິທີການຕອບສະໜອງທີ່ພົບເຫັນຫຼາຍທີ່ສຸດສຳລັບການຮຽນທາງໄກ, ແຕ່ບັນຫາກໍຄື ເດັກໄວຮຽນທີ່ມີຈຳນວນປະມານ 1.300 ລ້ານຄົນທົ່ວໂລກ ບໍ່ມີອິນເຕີຣ໌ເນ໊ຕໃຊ້ໃນເຮືອນ; ຂະນະທີ່ເດັກເກືອບເຄິ່ງໜຶ່ງໃນພູມີພາກ ຊັບຊາຮາຣາແອຟຣິກາ ຍັງບໍ່ມີໄຟຟ້າໃຊ້. ອີກທັງເດັກນັກຮຽນເກືອບ 500 ລ້ານຄົນ ຍັງບໍ່ສາມາດເຂົ້າເຖິງການຮຽນທາງໄກໃດໆ, ທັງສື່ສິ່ງພິມສ່ວນໃຫຍ່ກໍບໍ່ເຂົ້າເຖິງຄອບຄົວທຸກຍາກໃນຊົນນະບົດ.

ການສຳຫຼວດຄັ້ງນີ້ຊີ້ໃຫ້ເຫັນວ່າ: ເດັກຈຳນວນຫຼາຍອາດບໍ່ມີວັນໄດ້ກັບໄປຮຽນໜັງສືອີກເລີຍ, ໂດຍມີຫຼັກຖານຢັ້ງຢືນໄດ້ວ່າ ເກືອບ 1 ໃນ 3 ຂອງເດັກໃນປະເທດ ຢູກັນດາ ແມ່ນຢຸດຕິການຮຽນໄປແລ້ວ. ສ່ວນ 1 ໃນ 10 ຂອງເດັກນັກຮຽນທີ່ມີອາຍຸລະຫວ່າງ 10-15 ປີໃນປະເທດບຣາຊິລ ກໍ່ບອກວ່າ “ພວກເຂົາບໍ່ມີແຜນຈະກັບໄປຮຽນຕໍ່”. ນອກນັ້ນ, ຍັງມີເດັກອີກປະມານ 9 ລ້ານຄົນ ຢູ່ທົ່ວໂລກບໍ່ໄດ້ຮັບອາຫານຄາບທ່ຽງວັນໃນໂຮງຮຽນ; ທັງທີ່ປັນແຫຼ່ງອາຫານສຳຄັນຕໍ່ພັດທະນາການເຕີບໂຕຂອງເດັກໆ.

ທີ່ໜ້າເປັນຫ່ວງກໍຄື ການປິດໂຮງຮຽນໄລຍະໂຄວິດ-19 ລະບາດ, ສົ່ງຜົນໃຫ້ເດັກຍິງປະມານ 10 ລ້ານຄົນຜະເຊີນກັບຄວາມສ່ຽງທີ່ຈະແຕ່ງດອງ ຫຼືສ້າງຄອບຄົວກ່ອນໄວອັນຄວນ ແລະມີຄວາມສ່ຽງຫຼາຍຂຶ້ນທີ່ຈະຢຸດຕິການຮຽນ. ທັງນີ້, ອົງກອນ ເວີລດ໌ວິຊັ້ນ ກໍ່ໄດ້ມີການປະເມີນໄວ້ໃນໄລຍະທຳອິດຂອງການລະບາດວ່າ: ເດັກຍິງປະມານ 1 ລ້ານຄົນໃນ ຊັບຊາຮາຣາແອຟຣິກາ ອາດຢຸດຕິການຮຽນຫຼັງຈາກທີ່ມີພາວະຖືພາໃນຊ່ວງລ໊ອກດາວນ໌.

แชร์