ປະຕິບັດການມ້າງຄະດີຢາເສບຕິດຢູ່ນະຄອນໄກສອນ ພົມວິຫານ

ເມື່ອວັນທີ 10 ມີນາ2022, ເຈົ້າໜ້າທີ່ ຕຳຫຼວດໜ່ວຍງານສະກັດກັ້ນ-ຕ້ານຢາເສບຕິດ ປກສ ນະຄອນໄກສອນ ພົມວິຫານ ແຂວງສະຫວັນນະເຂດ, ເຂົ້າກັກຕົວເປົ້າໝາຍຄ້າ-ຂາຍຢາເສບຕິດໄດ້ 2 ຄົນຊື່ ທ້າວ ສຸກດາວັນ ຫຼື ໄກ່ ອາຍຸ 26 ປີ, ອາຊີບກຳມະກອນ ບ້ານໂນນສະຫວາດ ນະຄອນ ໄກສອນ ພົມວິຫານ ພ້ອມຂອງກາງຢາບ້າ 1 ມັດ ເທົ່າກັບ 2.000 ເມັດ, ຈຸດກັກຕົວຢູ່ເຂດບ້ານນາເລົ່າ ນະຄອນໄກສອນ ພົມວິຫານ. ຜ່ານການສອບສວນຜູ້ກ່ຽວຮັບສາລະພາບວ່າ: ຢາບ້າດັ່ງກ່າວຊື້ມາຈາກນາງ ປາດຖະໜາ ຫຼືຕິກນາ ອາຍຸ 26 ປີ ຫວ່າງງານ ຢູ່ບ້ານສອນໄຊ ນະຄອນ ໄກສອນພົມວິຫານ .

ຮອດເວລາ18:00 ໂມງຂອງວັນດຽວກັນ, ຕຳຫຼວດຈິ່ງເຂົ້າກັກຕົວນາງ ປາດຖະໜາ ຫຼື ຕິກນາ ໄດ້ຢູ່ເຮືອນຜູ້ກ່ຽວ, ຈາກນັ້ນເຈົ້າໜ້າທີ່ວິຊາສະເພາະກໍ່ສົມທົບກັບອຳນາດການປົກຄອງບ້ານສອນໄຊ ແລະ ເຈົ້າໜ້າທີ່ ປກສ ກຸ່ມບ້ານທີ 6 ດຳເນີນການກວດຄົ້ນເຄຫາສະຖານ. ຜ່ານການກວດຄົ້ນຫ້ອງນອນຜູ້ກ່ຽວ ພົບເຫັນຢາບ້າ 13 ມັດ ກັບ 49 ຖົງ ເທົ່າກັບ 35.772 ເມັດ ຊຸກເຊື່ອງໄວ້ໃນລີ້ນຊັກຕູ້, ໂທລະສັບຊຳຊຸງສີດຳ 1 ເຄື່ອງ, ຈາກນັ້ນຈິ່ງໄດ້ນຳຕົວພວກກ່ຽວ ພ້ອມຂອງກາງເຂົ້າໄປກອງບັນຊາການ ປກສ ນະຄອນ ໄກສອນ ພົມວິຫານ ເພື່ອທຳການສອບສວນ.

ມາໃນວັນທີ 11 ມີນາ2022, ເວລາ 6:30 ໂມງ, ເຈົ້າໜ້າທີ່ ກໍ່ໄດ້ກັກຕົວເປົ້າໝາຍຄ້າ-ຂາຍຢາບ້າໄດ້ 4 ຄົນຄື ທ້າວ ຈັນທະວີສຸກ ຫຼື ແຂກ ອາຍຸ 36 ປີ ຫວ່າງງານ ບ້ານໂພນຊາຍ ນະຄອນ ໄກສອນ ພົມວິຫານ ພ້ອມຂອງກາງຢາບ້າ 79 ເມັດ. ຜ່ານການສອບສວນຜູ້ກ່ຽວຮັບສາລະພາບວ່າ: ຢາບ້າດັງກ່າວຊື້ມາຈາກທ້າວ ອຸດຕະມະ (ກິ) ອາຍຸ 44 ປີ ເຮັດນາ ຢູ່ບ້ານນາເຊັງ ນະຄອນ ໄກສອນ ພົມວິຫານ. ມາຮອດເວລາ 10:00 ໂມງຂອງວັນດຽວກັນ, ຕຳຫຼວດຈິ່ງເຂົ້າກັກຕົວທ້າວ ອຸດຕະມະ (ກິ) ໄດ້ຢູ່ເຮືອນຂອງຜູ້ກ່ຽວ ພ້ອມຢາບ້າ 2 ຖົງ ເທົ່າກັບ 400 ເມັດ. ຜ່ານການສອບສວນ, ຜູ້ກ່ຽວຮັບສາລະພາບວ່າ: ຢາບ້າດັ່ງກ່າວຊື້ມາຈາກທ້າວ ຈັນທະວີສຸກ (ຫຳ) ອາຍຸ 39 ປີ ເຮັດນາ ຢູ່ບ້ານໂພນສະອາດ ນະຄອນໄກສອນ ພົມວິຫານ, ຮອດເວລາ 11:40 ໂມງຂອງວັນດຽວກັນ ຕຳຫຼວດຈິ່ງເຂົ້າກັກຕົວທ້າວ ຈັນທະວີສຸກ (ຫໍາ) ໄດ້ຢູ່ຖຽງນາຂອງຜູ້ກ່ຽວຢູ່ບ້ານນາເຊັງ ພ້ອມຢາບ້າ 10 ຖົງ ເທົ່າກັບ1.988 ເມັດ, ປືນສະເກາະ 1 ກະບອກ ພ້ອມກະສຸນ 12 ລູກ, ລູກປືນອາກາ 7 ລູກ, ຜ່ານການສອບສວນ ຜູ້ກ່ຽວຮັບສາລະພາບວ່າ: ຢາບ້າດັ່ງກ່າວຊື້ມາຈາກທ້າວ ສົງການ (ແຫຼ້) ອາຍຸ 26 ປີ ຫວ່າງງານ ຢູ່ບ້ານສອນໄຊ ນະຄອນໄກສອນ ພົມວິຫານ.

ມາຮອດເວລາ 14:00 ໂມງຂອງວັນດຽວກັນ, ເຈົ້າໜ້າທີ່ໄດ້ກັກຕົວທ້າວ ສົງການ (ແຫຼ້) ໄດ້ຢູ່ເຂດບ້ານນາເຊັງ ພ້ອມຢາບ້າ 1 ມັດ ເທົ່າກັບ 2.000 ເມັດ, ດັ່ງນັ້ນ ເຈົ້າໜ້າທີ່ວິຊາສະເພາະຈິ່ງໄດ້ສົມທົບກັບອຳນາດການປົກຄອງບ້ານສອນໄຊ ແລະ ເຈົ້າໜ້າທີ່ ປກສ ກຸ່ມບ້ານທີ 6 ເຂົ້າກວດຄົ້ນເຄຫາສະຖານຂອງຜູ້ກ່ຽວ. ຜ່ານການກວດຄົ້ນໃນຫ້ອງນອນພົບເຫັນຢາບ້າ 2 ມັດ ກັບ 17 ຖົງ ເທົ່າກັບ 7.586 ເມັດ ແລະ ຢາໄອສ 1 ຖົງໃຫຍ່ ທີ່ຜູ້ກ່ຽວນຳມາຊຸກເຊື່ອງໄວ້ໃນຕູ້, ຈາກນັ້ນຕຳຫຼວດກໍໄດ້ນຳຕົວພວກກ່ຽວ ພ້ອມຂອງກາງຢາບ້າ ເຂົ້າໄປ ປກສ ນະຄອນໄກສອນ ພົມວິຫານ ເພື່ອທຳການສອບສວນ ແລະ ດຳເນີນຄະດີຕາມກົດໝາຍ.

แชร์