ການເດີນທາງເຂົ້າ-ອອກ ສປປ ລາວ ໄລຍະໂຄວິດລະບາດ

ກະຊວງການຕ່າງປະເທດ, ໄດ້ອອກຄໍາແນະນໍາເລກທີ2143/ຕປທ.ສພກ ກ່ຽວກັບຂັ້ນຕອນລະອຽດໃນການປະກອບເອກະສານຂໍອະນຸຍາດເຂົ້າ-ອອກ ສປປ ລາວ ໃນໄລຍະມີການລະບາດຂອງພະຍາດໂຄວິດ-19.

ກ່ອນເດີນທາງເຂົ້າ ສປປ ລາວ, ທຸກຄົນຕ້ອງມີໃບຢັ້ງຢືນຜົນກວດຫາເຊື້ອພະຍາດໂຄວິດ-19 ດ້ວຍເຄື່ອງ RT-PCR ພາຍໃນ 72 ຊົ່ວໂມງ ກ່ອນເຂົ້າມາ ສປປ ລາວ ແລະ ມີໃບຢັ້ງຢືນການສັກວັຄຊີນຄົບຖ້ວນ, ສຳລັບນັກການທູດ, ພະນັກງານຂອງສະຖານທູດ ແລະ ສະຖານກົງສູນຕ່າງປະເທດ, ຜູ້ຕາງໜ້າອົງການຈັດຕັ້ງສາກົນ ທີ່ນອນຢູ່ໃນເຄືອຂ່າຍຂອງອົງການສະຫະປະຊາຊາດ, ອົງການຈັດຕັ້ງສາກົນທີ່ໄດ້ຮັບອະພິສິດ ແລະເອກະສິດທາງການທູດ, ລວມທັງສະມາຊິກຄອບຄົວ ທີ່ຕ້ອງການເຂົ້າມາປະຕິບັດໜ້າທີ່ທັງໄລຍະສັ້ນ ແລະໄລຍະຍາວຢູ່ ສປປ ລາວ, ໃຫ້ສະເໜີເຖິງກົມກ່ຽວຂ້ອງຂອງກະຊວງການຕ່າງປະເທດຕາມກົນໄກປົກກະຕິທີ່ເຄີຍປະຕິບັດມາ.

ສ່ວນກະຊວງ ແລະ ອົງການທຽບເທົ່າທີ່ມີຄວາມຈໍາເປັນຮັບເອົາຄົນຕ່າງປະເທດເຊັ່ນ: ຊ່ຽວຊານ, ວິຊາການ, ອາສາສະໝັກ ແລະນັກສຶກສາ (ໂຄງການຮ່ວມມືສອງຝ່າຍ) ໃຫ້ສະເໜີເຖິງກົມກ່ຽວຂ້ອງຂອງກະຊວງການຕ່າງປະເທດຕາມກົນໄກປົກກະຕິທີ່ເຄີຍປະຕິບັດມາ. ສໍາລັບອົງການຈັດຕັ້ງສາກົນບໍ່ຂຶ້ນກັບລັດຖະບານທີ່ຕ້ອງການເຂົ້າມາປະຕິບັດໜ້າທີ່ທັງໄລຍະສັ້ນ ແລະໄລຍະຍາວຢູ່ ສປປ ລາວ ຕ້ອງໄດ້ລົງທະບຽນໃນເວ໊ບໄຊຕ໌: laogreenpass.gov.la ເພື່ອຂໍເອົາ QR-Code.ຫຼັງຈາກນັ້ນ, ໃຫ້ສະເໜີເຖິງກົມກ່ຽວຂ້ອງຂອງກະຊວງການຕ່າງປະເທດຕາມກົນໄກປົກກະຕິທີ່ເຄີຍປະຕິບັດມາ.

ບຸກຄົນ ຫຼືນິຕິບຸກຄົນທີ່ດໍາເນີນທຸລະກິດຢ່າງຖືກຕ້ອງຢູ່ ສປປ ລາວ ທີ່ມີຄວາມຕ້ອງການເອົານັກລົງທຶນ ແລະ ນັກທຸລະກິດເຂົ້າມາ ເພື່ອດໍາເນີນການສຶກສາການລົງທຶນ, ເຊັນສັນຍາ ຫຼື ເຊັນບົດບັນທຶກຄວາມເຂົ້າໃຈ (MOU) ໃຫ້ສະເໜີເຖິງກົມກົງສູນກະຊວງການຕ່າງປະເທດຕາມກົນໄກປົກກະຕິທີ່ເຄີຍປະຕິບັດມາ, ກ່ອນການເດີນທາງເຂົ້າມາ ສປປ ລາວ ຕ້ອງລົງທະບຽນໃນເວ໊ບໄຊຕ໌: laogreenpass.gov.la ເພື່ອຂໍເອົາ QR-Code ຈິ່ງສາມາດເຂົ້າມາ ສປປ ລາວ ໄດ້ ຫຼືສາມາດລົງທະບຽນເພື່ອຂໍເອົາ QR-Code ພາຍຫຼັງເດີນທາງມາຮອດດ່ານສາກົນ.

ສໍາລັບຄົນເຊື້ອຊາດລາວສັນຊາດຕ່າງປະເທດທີ່ຕ້ອງການເດີນທາງເຂົ້າມາ ສປປ ລາວ ໃຫ້ສະເໜີຜ່ານສະຖານເອກອັກຄະລັດຖະທູດ ຫຼືສະຖານກົງສຸນໃຫຍ່ແຫ່ງ ສປປ ລາວ ຢູ່ປະເທດທີ່ຕົນອາໄສຢູ່ ແລະ ຕ້ອງໄດ້ລົງທະບຽນໃນເວ໊ບໄຊຕ໌: laogreenpass.gov.la ເພື່ອຂໍເອົາ QR-Code.ຫຼັງຈາກນັ້ນ, ຈິ່ງສະເໜີເຖິງກົມກົງສຸນ ກະຊວງການຕ່າງປະເທດໂດຍມີເອກະສານຢັ້ງຢືນຄວາມຖືກຕ້ອງຂອງ QR-Code ເພື່ອພິຈາລະນາອະນຸມັດວີຊາເຂົ້າມາ ສປປ ລາວ.

ສໍາລັບການທ່ອງທ່ຽວລາວ (Lao Greern Travel Zone) ໃຫ້ປະຕິບັດຕາມແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ, ສະບັບເລກທີ 258/ຫສນຍ. ສໍາລັບພົນລະເມືອງລາວ, ຄົນຕ່າງດ້າວ ແລະ ພົນລະເມືອງຕ່າງປະເທດ ທີ່ເປັນຄອບຄົວຂອງພົນລະເມືອງລາວຢ່າງຖືກຕ້ອງ,ເມື່ອໄດ້ລົງທະບຽນໃນເວ໊ບໄຊຕ໌: laogreenass.gov.la ເພື່ອຂໍເອົາ QR-Code (Vaccin ID) ແລະມີຄວາມຕ້ອງການເດີນທາງກັບຄືນປະເທດແມ່ນສາມາດເດີນທາງກັບຄືນປະເທດໂດຍບໍ່ຈໍາເປັນສະເໜີຜ່ານສະຖານທູດ ຫຼືສະຖານກົງສຸນ ແລະກົມກົງສຸນກະຊວງການຕ່າງປະເທດ; ພົນລະເມືອງຕ່າງປະເທດທີ່ເປັນຄອບຄົວຂອງພົນລະເມືອງລາວຢ່າງຖືກຕ້ອງທີ່ມີວີຊາຄອບຄົວ (SP-B3) ສາມາດເດີນທາງກັບຄືນປະເທດໂດຍບໍ່ຈໍາເປັນສະເໜີຜ່ານສະຖານທູດ ຫຼື ສະຖານກົງສຸນ ແລະກົມກົງສຸນກະຊວງການຕ່າງປະເທດ. ໃນກໍລະນີ້ທີ່ຍັງບໍ່ມີວີຊາ, ແມ່ນໃຫ້ສະເໜີ ຂໍວີຊາຢູ່ສະຖານທູດ ຫຼືສະຖານກົງສຸນລາວປະຈໍາປະເທດທີ່ຕົນອາໄສຢູ່ກ່ອນເດີນທາງເຂົ້າມາ ສປປ ລາວ.

ສຳລັບຄົນຕ່າງປະເທດ ແລະ ຜູ້ທີ່ບໍ່ມີສັນຊາດທີ່ມີວີຊາເຂົ້າ-ອອກຫຼາຍເທື່ອ ແລະ ບັດພັກເຊົາຊົ່ວຄາວຢູ່ ສປປ ລາວ ທີ່ຍັງມີອາຍຸການນໍາໃຊ້ຢ່າງຖືກຕ້ອງເຊັ່ນ: ນັກການທູດ, ພະນັກງານຂອງສະຖານທູດ ແລະ ສະຖານກົງສຸນຕ່າງປະເທດ, ພະນັກງານຜູ້ຕາງໜ້າອົງການຈັດຕັ້ງສາກົນທີ່ນອນຢູ່ໃນເຄືອຂ່າຍຂອງອົງການສະຫະປະຊາຊາດ, ອົງການຈັດຕັ້ງສາກົນ ທີ່ໄດ້ຮັບອະພິສິດ ແລະເອກະສິດທາງການທູດ ລວມທັງສະມາຊິກຄອບຄົວ, ແມ່ນສາມາດເດີນທາງເຂົ້າມາ ສປປ ລາວ ໂດຍບໍ່ຈໍາເປັນສະເໜີຜ່ານກົມກົງສຸນ ກະຊວງການຕ່າງປະເທດ, ລວມເຖິງຊ່ຽວຊານ, ນັກລົງທຶນ, ນັກທຸລະກິດ, ວິຊາການ, ແຮງງານຂອງບໍລິສັດ ຫຼື ໂຄງການ ແລະນັກສຶກສາຕ່າງປະເທດເມື່ອໄດ້ລົງທະບຽນໃນເວ໊ບໄຊຕ໌: laogreenpass.gov.la ເພື່ອຂໍເອົາ QR-Code ແລະຄົບເງື່ອນໄຂຂ້າງເທິງກໍ່ສາມາດເດີນທາງເຂົ້າມາ ສປປ ລາວ ໂດຍບໍ່ຈໍາເປັນສະເໜີຜ່ານກົມກົງສຸນກະຊວງການຕ່າງປະເທດ.

ເມື່ອທຸກຄົນມາຮອດ ສປປ ລາວ ຕ້ອງໄດ້ເກັບຕົວຢ່າງເພື່ອກວດຫາເຊື້ອພະຍາດໂຄວິດ-19 ດ້ວຍເຄື່ອງ RT-PCR ແລະຈໍາກັດບໍລິເວນເພື່ອລໍຖ້າຜົນກວດຫາເຊື້ອພະຍາດໂຄວິດ-19 ຢ່າງໜ້ອຍ 48 ຊົ່ວໂມງ ຢູ່ສະຖານທີ່ທີ່ທາງຄະນະສະເພາະກິດກໍານົດໃຫ້ ແລະຕ້ອງໄດ້ຕິດຕັ້ງ, ລົງທະບຽນໂປຣແກຣມ (ແອພ) LaoKYC ໃນໂທລະສັບມືຖືຂອງຕົນເພື່ອໃຊ້ບໍລິການ “ລາວ ສູ້ສູ້” ເພື່ອຄວາມສະດວກໃນເວລາເຄື່ອນໄຫວຕາມສະຖານທີ່ຕ່າງໆ (ຍົກເວັ້ນນັກການທູດ, ພະນັກງານຂອງສະຖານທູດ ແລະ ສະຖານກົງສຸນຕ່າງປະເທດ, ພະນັກງານຜູ້ຕາງໜ້າອົງການຈັດຕັ້ງສາກົນ ທີ່ນອນຢູ່ໃນເຄືອຂ່າຍຂອງອົງການສະຫະປະຊາຊາດ, ອົງການຈັດຕັ້ງສາກົນທີ່ໄດ້ຮັບອະພິສິດ ແລະ ເອກະສິດທາງການທູດລວມທັງສະມາຊິກຄອບຄົວ).

ສໍາລັບພົນລະເມືອງລາວ ແລະພົນລະເມືອງຕ່າງປະເທດທີ່ຕ້ອງການເດີນທາງອອກໄປຕ່າງປະເທດ (ໃນທຸກກໍລະນີ) ສາມາດແຈ້ງອອກກັບເຈົ້າໜ້າທີ່ຕໍາຫຼວດກວດຄົນເຂົ້າ-ອອກເມືອງປະຈໍາດ່ານທີ່ຈະເດີນທາງໂດຍບໍ່ຕ້ອງຂໍອະນຸຍາດກັບຄະນະສະເພາະກິດ ແລະຕ້ອງໄດ້ກະກຽມເອກະສານຕາມເງື່ອນໄຂ ແລະມາດຕະການຂອງປະເທດປາຍທາງທີ່ກໍານົດໄວ້ຢ່າງຄົບຖ້ວນ.

แชร์