ຜົນງານດ້ານສາທາລະນະສຸກ ໃນໜຶ່ງປີຜ່ານມາ

ໃນໄລຍະໜຶ່ງປີຜ່ານມາ, ຂະແໜງສາທາລະນະສຸກ ສາມາດຍາດໄດ້ຜົນສໍາເລັດຕາມທິດທາງ ແລະ ຄາດໝາຍທີ່ຂະແໜງການວາງໄວ້. ເປັນຕົ້ນແມ່ນ ອັດຕາສ່ວນການຕາຍຂອງແມ່, ອັດຕາການຕາຍຂອງເດັກລຸ່ມ 1 ປີ ແລະ 5 ປີ ມີການຫຼຸດລົງ, ອັດຕາການຊົມໃຊ້ນ້ຳສະອາດ ແລະ ວິດຖ່າຍ ມີການເພີ່ມຂຶ້ນ, ຕາໜ່າງການບໍລິການສາທາລະນະສຸກ ກໍ່ໄດ້ຮັບການປັບປຸງໃຫ້ດີຂຶ້ນຢ່າງຕໍ່ເນື່ອງ ແລະ ທັນສະໄໝຂຶ້ນເທື່ອລະກ້າວ.

ໂດຍກະຊວງສາທາລະນະສຸກ, ໄດ້ຈັດກອງປະຊຸມສາທາລະນະສຸກ ທົ່ວປະເທດ ປະຈໍາປີ 2021-2022 ພາຍໃຕ້ຄໍາຂວັນ “ຫັນວິກິດໂຄວິດ-19 ເພື່ອສ້າງຄວາມເຂັ້ມແຂງວຽກງານສາທາ ລະນະສຸກ ໃຫ້ບັນລຸ 11 ຕົວຊີ້ບອກ” ວາລະປະຊຸມດຳເນີນລະຫວ່າງວັນທີ 15-16 ມີນາ 2022 ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ, ໂດຍການເປັນປະທານຂອງທ່ານ ບຸນແຝງ ພູມມະໄລສິດ ກຳມະການສູນກາງພັກເລຂາຄະນະພັກ ລັດຖະມົນຕີກະຊວງສາທາລະນະສຸກ,ມີຮອງລັດຖະມົນຕີ, ຄະນະກົມ, ອະທິການບໍດີ, ຄະນະບໍດີແຕ່ລະສາຍວິຊາ ມະຫາວິທະຍາໄລ ວິທະຍາສາດ ສຸຂະພາບ, ອຳນວຍການໂຮງໝໍສູນກາງ, ຄະນະສູນ, ພະແນກສາທາລະນະສຸກ ແລະ ໂຮງໝໍແຂວງທົ່ວປະເທດເຂົ້າຮ່ວມ.

ທ່ານ ບຸນເສີດ ແກ້ວປະເສີດ ຫົວໜ້າກົມແຜນການ ແລະການຮ່ວມມືກະຊວງສາທາລະນະສຸກ, ໄດ້ລາຍງານຜົນການຈັດຕັ້ງປະຕິບັດວຽກງານສາທາລະນະສຸກ ປະຈໍາປີ 2021 ແລະ ແຜນພັດທະນາສາທາລະນະສຸກ ປະຈຳປີ 2022, ສະຫຼຸບການຈັດຕັ້ງປະຕິບັດດ້ານງົບປະມານ ປີ 2021 ແລະ ແຜນປີ 2022, ຍຸດທະສາດປະຕິຮູບສາທາລະນະສຸກ ໄລຍະທີ III (2021-2025) ແລະ ໄລຍະທີ IV (2026-2030), ວຽກງານປ້ອງກັນໂຄວິດ-19 ແລະ ວຽກງານສາມສ້າງຂະແໜງສາທາລະນະສຸກ. ພ້ອມນັ້ນ, ຍັງມີການສະເໜີຂອງບັນດາກົມທີ່ກ່ຽວຂ້ອງຂອງກະຊວງສາທາລະນະສຸກ, ມີການປະກອບຄຳຄິດຄຳເຫັນຈາກຕາງໜ້າຂອງ 5 ແຜນງານໃສ່ບົດສະເໜີດັ່ງກ່າວ ແລະສະເໜີການເຊື່ອມສານວຽກງານຮັກສາສຸຂະພາບຂັ້ນຕົ້ນເພື່ອການບັນລຸຕົວຊີ້ບອກທີ່ທາງສະພາແຫ່ງຊາດໄດ້ຮັບຮອງ, ວຽກງານປະກັນສຸຂະພາບ, ວຽກງານເກັບກຳຂໍ້ມູນຂັ້ນບ້ານຈາກແຟ້ມຄອບຄົວ ແລະ ມີລາຍງານຄວາມຄືບໜ້າໃນການຈັດຕັ້ງປະຕິບັດ ວຽກງານແຟ້ມຄອບຄົວຂອງແຕ່ລະແຂວງ.

ນອກຈາກຜົນງານທີ່ຍົກມາຂ້າງເທິງນັ້ນແລ້ວ, ໃນຊຸມປີຜ່ານມາ ສະຖານບໍລິການສາທາ ລະນະສຸກຫຼາຍແຫ່ງທັງຢູ່ສູນກາງ ແລະ ທ້ອງຖິ່ນ ກໍໄດ້ຮັບການກໍ່ສ້າງ-ຍົກລະດັບພື້ນຖານໂຄງລ່າງ. ຄຽງຄູ່ກັນນັ້ນ, ຄຸນນະພາບການປິ່ນປົວກໍ່ໄດ້ຮັບການປັບປຸງໃຫ້ດີຂຶ້ນ ດ້ວຍການເອົາໃຈໃສ່ປັບປຸງຈັນຍາບັນ, ຈັນຍາທຳຂອງພະນັກງານແພດ, ພະຍາບານ. ທັງມີການຍົກລະດັບທາງດ້ານວິຊາສະເພາະ, ນະໂຍບາຍ 5 ດີ 1 ພໍໃຈ ໄດ້ຖືກຈັດຕັ້ງປະຕິບັດຢ່າງຕັ້ງໜ້າ, ເອົາໃຈໃສ່ວຽກງານຄຸ້ມຄອງ, ກວດກາ, ວິໄຈຄຸນນະພາບຂອງອາຫານ ແລະ ຢາ, ເຄື່ອງສຳອາງ ເພື່ອຮັບປະກັນຄວາມປອດໄພຂອງຜູ້ບໍລິໂພກ ແລະ ພັດທະນາວຽກງານສົ່ງເສີມການຜະລິດພາຍໃນ.

ສ່ວນວຽກງານປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19 ແມ່ນຄວບຄຸມໄດ້ດີສົມຄວນ. ຊຶ່ງສາມາດຂະຫຍາຍ ແລະ ສ້າງຄວາມເຂັ້ມແຂງວຽກງານກວດວິເຄາະເຊື້ອໂຄວິດ-19 ໃນຂອບເຂດທົ່ວປະເທດ; ສາມາດໃຫ້ວັຄຊີນກັນພະຍາດໂຄວິດ-19 ໄດ້ຕາມຄາດໝາຍ; ຄຸ້ມຄອງກໍລະນີແຮງງານເຂົ້າ ສປປ ລາວ, ປະຕິບັດລະບຽບກັກກັນ-ສະຖານທີ່ຈໍາກັດບໍລິເວນ; ຄຸ້ມຄອງ-ປິ່ນປົວກໍລະນີພະຍາດໂຄວິດ-19, ມີລະບົບກັ່ນກອງແຍກດ່ຽວຢູ່ສະຖານປິ່ນປົວແຕ່ລະຂັ້ນ; ສາມາດຄົ້ນຄວ້າ ແລະຜະລິດຢາພື້ນເມືອງ (Monulpiravir 200mg) ເພື່ອນຳໃຊ້ເຂົ້າໃນການປິ່ນປົວຜູ້ຕິດເຊື້ອພະຍາດໂຄວິດ-19. ໄດ້ເອົາໃຈໃສ່ໃນການໃຫ້ຄວາມຮູ້ກ່ຽວກັບພະຍາດໂຄວິດ-19 ໂດຍການເຜີຍແຜ່ໂຄສະນາທາງສື່ອອນໄລນ໌. ລວມທັງການໂຄສະນາຜ່ານສື່ມວນຊົນຂັ້ນແຂວງດ້ວຍຮູບແບບເຄື່ອນທີ່, ທາງໂທລະພາບ, ວິທະຍຸ ແລະ ສື່ສິ່ງພິມ.

แชร์