ການຄ້າຊີ້ແຈງສາເຫດປັບລາຄານ້ຳມັນພ້ອມຮຽກຮ້ອງປະຊາຊົນໃຊ້ຢ່າງປະຢັດ

  ກໍລະນີການປັບຂຶ້ນລາຄາຂາຍຍົກ-ຂາຍຍ່ອຍນໍ້າມັນເຊື້ອໄຟຄັ້ງວັນທີ 19 ມີນາ 2019 ໃນຂອບເຂດທົ່ວປະເທດກົມການຄ້າພາຍໃນຊີ້ແຈງວ່າ, ສ່ວນໜຶ່ງເປັນເພາະລາຄານໍ້າມັນເຊື້ອໄຟສໍາເລັດຮູບຕະຫຼາດສິງກະໂປຍັງສືບຕໍ່ເໜັງຕີງເພີ່ມຂຶ້ນບວກຄ່າຂົນສົ່ງ, ຄ່າປະກັນໄພ ແລະອື່ນໆຮອດລາວຍັງສືບຕໍ່ເໜັງຕີງ ຈິ່ງສົ່ງຜົນໃຫ້ລາຄາຂາຍຍົກ-ຂາຍຍ່ອຍມີການປ່ຽນແປງ.

  ໃນວັນທີ 19 ມີນາ, ກົມການຄ້າພາຍໃນກະຊວງອຸດສາຫະກຳ ແລະການຄ້າໄດ້ຂຽນບົດຄວາມເພື່ອແຈ້ງໃຫ້ພໍ່ແມ່ປະຊາຊົນ,ພະນັກງານ, ທະຫານ, ຕໍາຫຼວດຮັບຮູ້ວ່າ: ຫຼັງຈາກການປັບລາຄານໍ້າມັນເຊື້ອໄຟໃນຂອບເຂດທົ່ວປະເທດຄັ້ງວັນທີ 26 ກຸມພາ 2019 ຜ່ານມາ, ມາຮອດປະຈຸບັນສະພາບລາຄານໍ້າມັນເຊື້ອໄຟໃນຕະຫຼາດໂລກ, ເວົ້າສະເພາະນໍ້າມັນເຊື້ອໄຟສໍາເລັດຮູບຕະຫຼາດສິງກະໂປຍັງສືບຕໍ່ເໜັງຕີງເພີ່ມຂຶ້ນໂດຍສົມທຽບລາຄາສະເລ່ຍນໍ້າມັນເຊື້ອໄຟສໍາເລັດຮູບໃນວັນທີ 20 ກຸມພາ-6 ມີນາ (15 ວັນ) ບວກຄ່າຂົນສົ່ງ,ຄ່າປະກັນໄພ ແລະອື່ນໆ ຮອດລາວກັບລາຄາ CIF ຄິດໄລ່ພາສີປະຕິບັດຄັ້ງວັນທີ 26 ກຸມພາຜ່ານມາເຫັນວ່າລາຄາສະເລ່ຍນໍ້າມັນແອັດຊັງພິເສດ, ນໍ້າມັນແອັດຊັງທໍາມະດາ ແລະນໍ້າມັນກາຊວນຢູ່ຕະຫຼາດສິງກະໂປປັບເພີ່ມຂຶ້ນຄື: ນໍ້າມັນແອັດຊັງພິເສດເພີ່ມ 251 ກີບຕໍ່ລິດ ຫຼື ຄິດເປັນ 5,72%, ແອັດຊັງທໍາມະດາເພີ່ມຂຶ້ນ 252 ກີບຕໍ່ລິດ ຫຼືຄິດເປັນ 5,93% ແລະນໍ້າມັນກາຊວນເພີ່ມ 236 ກີບຕໍ່ລິດ ຫຼື ຄິດເປັນ 4,80%.

   ຕໍ່ສະພາບການດັ່ງກ່າວຖ້າລາຄານໍ້າມັນເຊື້ອໄຟໃນຕະຫຼາດໂລກຍັງສືບຕໍ່ເໜັງຕີງແຕ່ 4,24-4,90 ພັນກີບຕໍ່ລິດລາວເຮົາກໍມີຄວາມຈໍາເປັນຕ້ອງໄດ້ປັບ ລາຄານໍ້າມັນເຊື້ອໄຟພາຍໃນປະເທດຂຶ້ນຕາມການເໜັງຕີງຂອງລາຄານໍ້າມັນເຊື້ອໄຟໃນຕະຫຼາດໂລກກໍຄືພາກພື້ນ, ຊຶ່ງຈະເຮັດໃຫ້ລາຄາຂາຍຍ່ອຍນໍ້າມັນເຊື້ອ ໄຟທຸກຊະນິດປັບຂຶ້ນເຊັ່ນ: ນໍ້າມັນແອັດຊັງພິເສດເພີ່ມຂຶ້ນ 470 ກີບຕໍ່ລິດ, ນໍ້າມັນແອັດຊັງທໍາມະດາເພີ່ມ 430 ກີບຕໍ່ລິດ ແລະ ນໍ້າມັນກາຊວນເພີ່ມຂຶ້ນ 340 ກີບຕໍ່ລິດ, ພ້ອມທັງຈະສົ່ງຜົນກະທົບຕໍ່ພື້ນຖານເສດຖະກິດກໍຄືຜູ້ຊົມໃຊ້ໂດຍກົງ, ດັ່ງນັ້ນເພື່ອເຮັດໃຫ້ການປັບລາຄານໍ້າມັນເຊື້ອໄຟເປັນໄປຕາມກົນໄກຕະຫຼາດທັງບໍ່ແຕກໂຕນກັບປະເທດອ້ອມຂ້າງ ແລະ ໃຫ້ມີນໍ້າມັນເຊື້ອໄຟສະໜອງພາຍໃນໄດ້ຢ່າງພຽງພໍ, ກົມການຄ້າພາຍໃນກໍຄືກະຊວງອຸດສາຫະກໍາ ແລະການຄ້າໄດ້ປະສານສົມທົບກັບກົມພາສີ, ກົມສ່ວຍສາອາກອນກະຊວງການເງິນ ແລະ ສະມາຄົມນໍ້າມັນເຊື້ອໄຟ ແລະ ອາຍແກ໊ສຄົ້ນຄວ້າ ແລະ ຂໍທິດຊີ້ນໍາຈາກທ່ານຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຕົກມາຮອດວັນທີ 17 ມີນາຜ່ານມາ, ທ່ານຮອງນາຍົກລັດຖະມົນຕີ,ລັດຖະມົນຕີກະຊວງການເງິນຈິ່ງຊີ້ນໍາໂດຍໃຫ້ຫຼຸດການເກັບຄັງແຮນ້ຳມັນແອັດຊັງທໍາມະດາ ແລະນໍ້າມັນກາຊວນລົງ 100 ກີບຕໍ່ລິດ,ພ້ອມໃຫ້ຫຼຸດກໍາໄລຂາຍຍົກນໍ້າມັນແອັດຊັງພິເສດ, ແອັດຊັງທໍາມະດາລົງ 30 ກີບຕໍ່ລິດ, ສ່ວນນໍ້າມັນກາຊວນ 20 ກີບຕໍ່ລິດ, ຫຼຸດບໍລິການປໍ້ານໍ້າມັນແອັດຊັງພິເສດ, ແອັດຊັງທໍາມະດາລົງ 30 ກີບຕໍ່ລິດ ແລະນໍ້າມັນກາຊວນລົງ 20 ກີບຕໍ່ລິດ.

  ຈາກການປ່ຽນແປງດັ່ງກ່າວຈິ່ງເຮັດໃຫ້ລາຄາຂາຍຍ່ອຍນໍ້າມັນເຊື້ອໄຟທີ່ປະຕິບັດຄັ້ງວັນທີ 19 ມີນາ ສະເພາະນໍ້າມັນແອັດຊັງພິເສດເພີ່ມຂຶ້ນ 400 ກີບຕໍ່ລິດ ຫຼື ຄິດເປັນ 4,09% (ຈາກ 9,76 ພັນເປັນ 10,16 ພັນກີບຕໍ່ລິດ), ນໍ້າມັນແອັດຊັງທໍາມະດາເພີ່ມຂຶ້ນ 260 ກີບຕໍ່ລິດ ຫຼື ຄິດເປັນ 2,97% (ຈາກ 8,73 ເປັນ 8,99 ພັນກີບຕໍ່ລິດ), ລາຄານໍ້າມັນກາຊວນເພີ່ມ 190 ກີບຕໍ່ລິດ ຫຼື ຄິດເປັນ 2,25% (ຈາກ 8,41 ພັນເປັນ 8,60 ພັນກີບຕໍ່ລິດ).

  ພ້ອມດຽວກັນນັ້ນ, ກົມການຄ້າພາຍໃນກະຊວງອຸດສາຫະກໍາ ແລະ ການຄ້າຍັງໄດ້ຮຽກຮ້ອງໃຫ້ປວງຊົນລາວບັນດາເຜົ່າຈົ່ງເຂົ້າໃຈ ແລະ ຊ່ວຍກັນປະຢັດມັດທະຍັດໃນການຊົມໃຊ້ ໂດຍສະເພາະແມ່ນການຊົມໃຊ້ຍານພາຫະນະ, ລວມທັງຮຽກຮ້ອງມາຍັງບັນດາຜູ້ປະກອບການທຸລະກິດຕ່າງໆຈົ່ງຢ່າໄດ້ສວຍໂອກາດຂຶ້ນລາຄາສິນຄ້າຕາມລໍາພັງໃຈ ແລະກັກຕຸນສິນຄ້າກໍຄືນໍ້າມັນເຊື້ອໄຟໃນໄລຍະລາຄານໍ້າມັນເຊື້ອໄຟເໜັງຕີງຂຶ້ນສູງ, ຫາກພົບເຫັນການສວຍໂອກາດຂຶ້ນລາຄາສິນຄ້າ ແມ່ນຈະໄດ້ໃຊ້ມາດຕະການຕາມລະບຽບການ ຫຼື ຫາກຜູ້ຊົມໃຊ້ພົບເຫັນການສວຍໂອກາດຂຶ້ນລາຄາສິນຄ້າກໍສາມາດໂທແຈ້ງສາຍດ່ວນ 1510 ແລະເວັບໄຊປົກປ້ອງຜູ້ຊົມ ໃຊ້ WWW.lcp.gov.la ໄດ້.

ຂ່າວ: ພິມພອນ

แชร์