ປະທານສະພາແຫ່ງຊາດ ເຫັນຄວນໃຫ້ເຂດພັດທະນາກວມລວມໄຊເສດຖາ ເອົາໃຈໃສ່ 6 ບັນຫາສຳຄັນ

ໃນໂອກາດທີ່ທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກປະທານສະພາແຫ່ງຊາດ, ພ້ອມດ້ວຍພັນລະຍາ ແລະ ຄະນະ, ເຄື່ອນໄຫວຢ້ຽມຢາມເຂດພັດທະນາກວມລວມໄຊເສດຖາ ເມື່ອວັນທີ 16 ມີນາ 2022. ໂດຍທ່ານໄດ້ໃຫ້ທິດຊີ້ນໍາຕໍ່ເຂດພັດທະນາກວມລວມໄຊເສດຖາ ຈົ່ງຖືສຳຄັນ 6 ບັນຫາໃຫຍ່; ທີໜຶ່ງແມ່ນເຂດພັດທະນາກວມລວມໄຊເສດຖາເປັນໂຄງການລົງທຶນທີ່ນໍາໃຊ້ທ່າແຮງດ້ານຊັບພະຍາກອນທໍາມະຊາດທີ່ປະເທດເຮົາມີ ຊຶ່ງກໍຄືທີ່ດິນກວ້າງຂວາງຂອງປະເທດເຮົາເພື່ອດຶງດູດນັກລົງທຶນ, ໂດຍນໍາເອົາທີ່ດິນທີ່ເຮົາມີປະກອບເປັນທຶນຮອນເຂົ້າໃນການພັດທະນາໂຄງການ, ຈິ່ງຖືວ່າເຂດພັດທະນາກວມລວມໄຊເສດຖາ ມີຄວາມສອດຄ່ອງກັບແນວທາງນະໂຍບາຍຂອງພັກ ແລະສອດຄ່ອງກັບການພັດທະນາເສດຖະກິດ-ສັງຄົມຂອງປະເທດເຮົາ.

​​ທີ່ສອງແມ່ນ ເຂດພັດທະນາກວມລວມໄຊເສດຖາ ເປັນໂຄງການທີ່ສ່ອງແສງເຖິງການພົວພັນຮ່ວມມືທາງດ້ານເສດຖະກິດຂອງສອງລັດຖະບານ ລາວ-ຈີນ, ເປັນໂຄງການທີ່ຖືກຈັດເຂົ້າໃນຂໍ້ລິເລີ່ມ “ໜຶ່ງແລວທາງ ໜຶ່ງເສັ້ນທາງ”. ເມື່ອໂຄງການລົງທຶນດັ່ງກ່າວ ໄດ້ຮັບການພັດທະນາຢ່າງເຕັມສ່ວນ, ຈະເປັນແຫຼ່ງລາຍຮັບງົບປະມານສໍາຄັນຂອງນະຄອນຫຼວງວຽງຈັນ ກໍຄືງົບປະມານແຫ່ງລັດ, ຈິ່ງສະ ເໜີໃຫ້ເພີ່ມທະວີຄວາມເອົາໃຈໃສ່ໃນການຕິດຕາມ, ຊຸກຍູ້ການພັດທະນາໂຄງການໃຫ້ມີຄວາມຄືບໜ້າ ແລະ ສໍາເລັດໂດຍໄວ. ພ້ອມນັ້ນ, ກໍໃຫ້ເອົາໃຈໃສ່ຄົ້ນຄວ້າ, ເກັບກໍາຂໍ້ມູນເນື້ອໃນຂອງສັນຍາ, ຖ້າມີບັນຫາໃດບໍ່ທັນລະອຽດ, ຈະແຈ້ງ ກໍໃຫ້ພ້ອມກັນປຶກສາຫາລື ເພື່ອມີຄວາມເປັນເອກະພາບໃນການປັບປຸງແກ້ໄຂ, ເພື່ອໃຫ້ຮັບປະກັນທັງຜົນປະໂຫຍດລວມຂອງຊາດ ແລະ ຜົນປະໂຫຍດຂອງຜູ້ລົງທຶນ.

​​ທີສາມແມ່ນ ເຂດພັດທະນາກວມລວມໄຊເສດຖາ ເປັນໂຄງການຂະໜາດໃຫຍ່, ສາມາດຮອງຮັບໂຄງການລົງທຶນຂະແໜງຕ່າງໆເປັນຈໍານວນຫຼາຍ, ມີຄວາມຕ້ອງການແຮງງານຈໍານວນຫຼາຍ.ຈິ່ງສະເໜີໃຫ້ຊ່ວຍລັດຖະບານ ໃນການສ້າງວຽກເຮັດງານທໍາໃຫ້ແກ່ແຮງງານລາວ ແລະ ສະເໜີໃຫ້ມີການພັດທະນາວິຊາຊີບຕ່າງໆຕາມຄວາມຕ້ອງການຂອງແຕ່ລະຫົວໜ່ວຍວິສາຫະກິດ.

​​ທີ່ສີ່ແມ່ນ ການພັດທະນາໂຄງການລົງທຶນຂະໜາດໃຫຍ່ຄືກັບເຂດພັດທະນາກວມລວມໄຊເສດຖາ ຢູ່ປະເທດເຮົາກໍຍັງບໍ່ທັນຫຼາຍ. ດັ່ງນັ້ນ, ບົດຮຽນ, ປະສົບການໃນການສ້າງກົດໝາຍ, ນິຕິກໍາໃຕ້ກົດໝາຍ ຈິ່ງຍັງບໍ່ທັນສູງ, ຊຶ່ງເຮັດໃຫ້ນິຕິກໍາຈໍານວນໜຶ່ງອາດບໍ່ທັນຮັດກຸມ, ບໍ່ທັນສອດຄ່ອງກັບສະພາບເງື່ອນໄຂຕົວຈິງຂອງການພັດທະນາໂຄງການລົງທຶນຕ່າງໆ. ທັງນີ້, ຈິ່ງສະເໜີໃຫ້ມີການເກັບກໍາ, ສັງລວມ ແລະ ສະໜອງຂໍ້ມູນໃຫ້ແກ່ຄະນະເຄື່ອນໄຫວຢ້ຽມຢາມຄັ້ງນີ້ ເພື່ອນໍາໄປຄົ້ນຄວ້າ, ປະສານສົມທົບກັບພາກສ່ວນກ່ຽວຂ້ອງ ເພື່ອດຳເນີນການປັບປຸງແກ້ໄຂໃຫ້ມີຄວາມສອດຄ່ອງກັບການດໍາເນີນທຸລະກິດຕົວຈິງ.

​​ສໍາລັບຂໍ້ສະເໜີຂອງບັນດາທ່ານກ່ຽວກັບການຈັດຕັ້ງປະຕິບັດກົດໝາຍ, ນິຕິກໍາໃຕ້ກົດໝາຍ,ໂດຍສະເພາະແມ່ນນະໂຍບາຍສົ່ງເສີມການລົງທຶນດ້ານຕ່າງໆນັ້ນ ເຫັນວ່າເປັນບັນຫາທີ່ຈະຕ້ອງໄດ້ຄົ້ນຄວ້າຢ່າງເລິກເຊິ່ງ, ຊອກຫາເຫດຜົນດ້ານຕ່າງໆເພື່ອກ້າວໄປສູ່ການປັບປຸງແກ້ໄຂ. ໂດຍມອບໃຫ້ພາກສ່ວນທີ່ກ່ຽວຂ້ອງຂອງສະພາແຫ່ງຊາດ ຄົ້ນຄວ້າຢ່າງລະອຽດ, ພາຍຫຼັງທີ່ໄດ້ຄົ້ນຄວ້າຢ່າງເລິກເຊິ່ງແລ້ວ, ໃຫ້ລາຍງານຕໍ່ຄະນະປະຈໍາສະພາແຫ່ງຊາດ ເພື່ອມີທິດຊີ້ນໍາໃນການແກ້ໄຂ.

​​ທີຫ້າແມ່ນ ເຂດພັດທະນາກວມລວມໄຊເສດຖາ ເປັນເຂດທີ່ຮອງຮັບການລົງທຶນເປັນຈໍານວນຫຼາຍ ແລະ ມີນັກລົງທຶນ, ຜູ້ຊ່ຽວຊານທີ່ມາຈາກຫຼາຍປະເທດ. ຈິ່ງສະເໜີໃຫ້ເອົາໃຈໃສ່ວຽກງານປ້ອງກັນຄວາມສະຫງົບ, ແນໃສ່ສະກັດກັ້ນກຸ່ມຄົນບໍ່ດີສວຍໃຊ້ການລົງທຶນເພື່ອແອບແຝງເຄື່ອນໄຫວໃນທາງບໍ່ຖືກຕ້ອງຕາມກົດໝາຍ. ຈິ່ງສະເໜີໃຫ້ເອົາໃຈໃສ່ຈັດຕັ້ງຜັນຂະຫຍາຍວຽກງານປ້ອງກັນຄວາມສະຫງົບຢ່າງໜັກແໜ້ນ, ເຂັ້ມແຂງ, ສາມາດແກ້ໄຂສະພາບການໄດ້ທັນເວລາ.

​​ທີ່ຫົກແມ່ນ ການປະຕິບັດພັນທະເຂົ້າງົບປະມານຂອງລັດ, ການປະກອບສ່ວນທຶນຮອນເຂົ້າໃນການພັດທະນາທ້ອງຖິ່ນ, ຊຶ່ງການປົກປັກຮັກສາສິ່ງແວດລ້ອມກໍເປັນວຽກໜຶ່ງທີ່ສໍາຄັນ. ຈິ່ງສະເໜີໃຫ້ເອົາໃຈໃສ່ເພື່ອເຮັດໃຫ້ປະຊາຊົນຢູ່ຂອບເຂດທີ່ຕັ້ງຂອງໂຄງການເຫັນໄດ້ຄວາມສໍາຄັນຂອງພາກທຸລະກິດຕໍ່ກັບການພັດທະນາທ້ອງຖິ່ນໃຫ້ມີໃບໜ້າໃໝ່, ຊ່ວຍປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ຊຶ່ງຈະເປັນການດຶງດູດປະຊາຊົນໄດ້ປະກອບສ່ວນເຂົ້າໃນການພັດທະນາໂຄງການໃຫ້ມີບັນຍາກາດທີ່ດີ ແລະ ມີຄວາມຍືນຍົງ.

แชร์