ຈຳປາສັກ ຄວ້າ 4 ລາງວັນມາດຕະຖານທ່ອງທ່ຽວອາຊຽນ

ແຂວງຈໍາປາສັກ ໄດ້ຮັບ 3 ມາດຕະຖານ ແລະລາງວັນການທ່ອງທ່ຽວແບບຍືນຍົງອາຊຽນ, ລວມ 4 ລາງວັນຄື:  ນະຄອນປາກເຊ ໄດ້ຮັບລາງວັນມາດຕະຖານເມືອງທ່ອງທ່ຽວອາຊຽນ, ສະຖານທີ່ທ່ອງທ່ຽວນໍ້າຕົກຕາດເຍືອງ ໄດ້ຮັບລາງວັນການທ່ອງທ່ຽວແບບຍືນຍົງອາຊຽນ, ໂຮງແຮມ ປອນອາລີນາ ໄດ້ຮັບລາງວັນມາດຕະຖານໂຮງແຮມຂຽວອາຊຽນ ແລະໂຮງແຮມ ເອລາວັນ ໄດ້ຮັບລາງວັນມາດຕະຖານສະຖານທີ່ຈັດງານອາຊຽນ.

ພິທີມອບ-ຮັບລາງວັນມາດຕະຖານການທ່ອງທ່ຽວອາຊຽນປະຈຳປີ 2022 ສະເພາະແຂວງຈໍາປາສັກ ຈັດຂຶ້ນໃນວັນທີ 17 ມີນາ 2022, ເປັນກຽດມອບລາງວັນໂດຍ ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນາທໍາ ແລະ ທ່ອງທ່ຽວ (ຖວທ), ເຂົ້າຮ່ວມໂດຍທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ແລະພາກສ່ວນກ່ຽວຂ້ອງ.

ທ່ານ ນາງ ດາລານີ ພົມມະວົງສາ ຫົວໜ້າກົມຄຸ້ມຄອງທຸລະກິດການທ່ອງທ່ຽວກະຊວງ ຖວທ, ໃຫ້ຮູ້ວ່າ: ລາງວັນມາດຕະຖານການທ່ອງທ່ຽວອາຊຽນ ປະຈໍາປີ 2022 ຢູ່ບັນດາປະເທດອາຊຽນ ມີ 145 ລາງວັນ. ໃນນັ້ນ, ສປປ ລາວ ໄດ້ຮັບທັງ 4 ປະເພດລາງວັນມາດຕະຖານ ລວມມີ 17 ລາງວັນຄື: ມາດຕະຖານໂຮງແຮມຂຽວອາຊຽນ 5 ລາງວັນ, ມາດຕະຖານເມືອງທ່ອງທ່ຽວສະອາດອາຊຽນ 3 ລາງວັນ, ມາດຕະຖານສະຖານທີ່ຈັດງານອາຊຽນ ປະເພດຫ້ອງປະຊຸມ 5 ລາງວັນ, ປະເພດສະຖານທີ່ຈັດງານວາງສະແດງ 2 ລາງວັນ ແລະລາງວັນການທ່ອງທ່ຽວແບບຍືນຍົງອາຊຽນ 2 ລາງວັນ.

ໃນວາລະດຽວກັນ, ທ່ານ ສຸລິນ ເພັດທານີ ຮອງຫົວໜ້າພະແນກ ຖວທ ແຂວງຈຳປາສັກ, ກໍໄດ້ລາຍງານຜົນການຈັດຕັ້ງປະຕິບັດມາດຕະຖານການທ່ອງທ່ຽວອາຊຽນ ທີ່ໄດ້ຜ່ານການປະເມີນ ແລະ ສະເໜີຂໍຮັບລາງວັນຈາກກອງເລຂາອາຊຽນຂອງແຂວງຈຳປາສັກ. ຜ່ານການປະເມີນໄດ້ສະເໜີນະຄອນປາກເຊຮັບລາງວັນມາດຕະຖານເມືອງທ່ອງທ່ຽວສະອາດອາຊຽນ ໄດ້ 91 ຄະແນນ ເທົ່າກັບ 84.25%, ສະເໜີສະຖານທີ່ທ່ອງທ່ຽວນໍ້າຕົກຕາດເຍືອງ ຮັບລາງວັນທ່ອງທ່ຽວແບບຍືນຍົງອາຊຽນ ໄດ້ 110 ຄະແນນ ເທົ່າກັບ95%, ສະເໜີ ໂຮງແຮມປອນອາລີນາ ຮັບລາງວັນມາດຕະຖານໂຮງແຮມຂຽວອາຊຽນ ໄດ້68 ຄະແນນ ເທົ່າກັບ 85% ແລະ ສະເໜີໂຮງແຮມເອລະວັນ ຮັບລາງວັນມາດຕະຖານສະຖານທີ່ຈັດງານອາຊຽນ ໄດ້ 142 ຄະແນນ ເທົ່າກັບ 86,06%.

ລາງວັນມາດຕະຖານການທ່ອງທ່ຽວອາຊຽນປະຈຳປີ 2022, ໄດ້ຮັບການຊຸກຍູ້ ແລະເປັນເຈົ້າການຈັດຕັ້ງປະຕິບັດໂດຍກະຊວງ ຖວທ, ອົງການປົກຄອງແຂວງຈໍາປາສັກ, ພາກທຸລະກິດ ແລະປະຊາຊົນທ້ອງຖິ່ນ. ໂດຍໄດ້ຮັບການສະໜັບສະໜູນດ້ານງົບປະມານຈາກລັດຖະບານ, ໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວອະນຸພາກພື້ນແມ່ນໍ້າຂອງໄລຍະ 2 ຈາກທະນາຄານພັດທະນາເອເຊຍ ຫຼືເອດີບີ, ລວມເຖິງອົງການຈັດຕັ້ງຕ່າງໆ ແລະພາກທຸລະກິດທີ່ກ່ຽວຂ້ອງ.

 

แชร์