ເຊີນທ່ຽວງານມະຫະກໍາສົ່ງເສີມແຮງງານລາວ ທີ່ວຽງຈັນເຊັນເຕີ

ງານມະຫະກຳສົ່ງເສີມແຮງງານລາວ 2022 (LAO EMPLOYMENT EXPO 2022) ເປິດສາກຂຶ້ນໃນລະຫວ່າງວັນທີ 16-20 ມີນາ ທີ່ສູນການຄ້າວຽງຈັນເຊັນເຕີ, ຈຸດປະສົງຂອງການຈັດງານແມ່ນເພື່ອຟື້ນຟູນະໂຍບາຍດ້ານຕະຫຼາດແຮງງານ ແລະ ການພັດທະນາຊັບພະຍາກອນມະນຸດ, ເພື່ອສ້າງຄວາມເຂັ້ມແຂງໃຫ້ພາກທຸລະກິດ ແລະ ຟື້ນຟູເສດຖະກິດໄລຍະໂຄວິດ-19, ງານດັ່ງກ່າວຈັດໂດຍສະພາການຄ້າ ແລະ ອຸດສາຫະກໍາແຫ່ງຊາດລາວ.

ໂດຍການເປັນປະທານຮ່ວມຂອງ ທ່ານ ນາງ ໃບຄໍາ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ທ່ານ ພຸດ ສີມມາລາວົງ ລັດຖະມົນຕີກະຊວງສຶກສາທິການ ແລະ ກີລາ, ໃຫ້ກຽດເຂົ້າຮ່ວມໃນວາລະເປີດງານຢ່າງເປັນທາງການເມື່ອວັນທີ 16 ມີນາ 2022 ໂດຍທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ມີບັນດາຫ້າງຮ້ານ, ຜູ້ປະກອບການທັງພາກລັດ ແລະ ເອກະຊົນເຂົ້າຮ່ວມຫຼາຍກວ່າ 60 ພາກສ່ວນ.

ທັງນີ້, ທ່ານ ໄຊບັນດິດ ຣາຊະພົນ ຮອງປະທານ ສະພາການຄ້າ ແລະ ອຸດສາຫະກໍາແຫ່ງຊາດລາວໄດ້ໃຫ້ສໍາພາດຕໍ່ສື່ວ່າ: ຜູ້ປະກອບການທີ່ເຂົ້າຮ່ວມງານທັງພາກລັດ ແລະ ເອກະຊົນ, ໄດ້ພ້ອມກັນສຸມໃສ່ວຽກງານພັດທະນາແຮງງານໃຫ້ສອດຄ່ອງກັບການພັດທະນາໄວໜຸ່ມທີ່ແທດເໝາະກັບວິຊາຊີບ. ໂດຍສະເພາະແມ່ນສ້າງກົນໄກ, ລະບຽບແຜນການໃຫ້ສອດຄ່ອງເພື່ອສ້າງແຮງງານລາວໃຫ້ມີສີມື, ມີຄວາມຮູ້, ຄວາມສາມາດ, ມີຄວາມຊໍານານ,  ມີທັກສະເພື່ອກ້າວໄປສູ່ການມີວຽກເຮັດງານທໍາທີ່ເໝາະສົມ ແລະ ຍຸຕິທໍາ. ທັງເປັນການຫຼຸດຜ່ອນຊ່ອງຫວ່າງຂອງບັນຫາແຮງງານ ເພື່ອເຮັດໃຫ້ການພັດທະນາສີມືແຮງງານ ແລະ ຄວາມຮູ້ຄວາມສາມາດສອດຄ່ອງກັບຄວາມຕ້ອງການຂອງການຂະຫຍາຍຕົວດ້ານເສດຖະກິດ ແລະສັງຄົມ. ເຮັດໃຫ້ຜູ້ໃຊ້ແຮງງານໄດ້ຮັບການຄຸ້ມຄອງ ແລະ ມີສະຫວັດດີການ ເພື່ອໃຫ້ສອດຄ່ອງກັບຄວາມຕ້ອງການຂອງຕະຫຼາດແຮງງານ, ຊຶ່ງຈະເຮັດໃຫ້ຜູ້ປະກອບການມີແຮງງານທີ່ມີປະສິດທິພາບ, ມີສີມື, ມີຜົນຜະລິດທີ່ມີຄຸນນະພາບເພີ່ມຂຶ້ນ. ແນໃສ່ປະກອບສ່ວນສຳຄັນໃນການບັນລຸຕາມແຜນການພັດທະນາເສດຖະກິດຂອງລັດຖະບານໃນການຫຼຸດພົ້ນອອກຈາກປະເທດດ້ອຍພັດທະນາ ແລະ ກາຍເປັນປະເທດສີວິໄລ, ສັງຄົມຍຸຕິທໍາ, ປະຊາຊົນຮັ່ງມີ ແລະມີສຸຂະພາບແຂງແຮງ.

ພາຍໃນງານມີການສາທິດວິທີປຸງແຕ່ງອາຫານ, ການສາທິດຊ່າງໄມ້, ເຄື່ອງເຮືອນ, ການສາທິດຊ່າງລົດຍົນ, ການປຸງແຕ່ງກາເຟ ໂດຍຜ່ານເວ໊ບໄຊຕ໌ Laoexpo.la ແລະ ເຟຊບຸກ Lao Expo ງານດັ່ງກ່າວມີຫຼາຍພາກສ່ວນແຈ້ງເຈດຈຳນົງຕ້ອງການແຮງງານຫຼາຍແສນຄົນ.

แชร์