ຫົວໜ້າຄະນະຈັດຕັ້ງສູນກາງພັກ ເຄື່ອນໄຫວວຽກງານທີ່ສະຫວັນນະເຂດ

ທ່ານ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ພ້ອມດ້ວຍຄະນະໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງສະຫວັນນະເຂດ. ຈຸດປະສົງຫຼັກກໍເພື່ອໃຫ້ທິດຊີ້ນໍາຕໍ່ຄະນະຈັດຕັ້ງແຂວງໃນຖານະເປັນເສນາທິການໃຫ້ຄະນະບໍລິຫານງານພັກແຂວງໃນວຽກງານພັກ-ພະນັກງານ, ວຽກງານກົງຈັກການຈັດຕັ້ງ ແລະວຽກງານຄຸ້ມຄອງພະນັກງານ. ໃຫ້ການຕ້ອນຮັບຄະນະເມື່ອວັນທີ 15 ມີນາ 2022 ໂດຍການນໍາຫຼັກແຫຼ່ງຂອງແຂວງ, ບັນດາສະມາຊິກພັກ-ພະນັກງານ ແລະປະຊາຊົນຊາວແຂວງສະຫວັນນະເຂດ.

ໃນໂອກາດດັ່ງກ່າວ, ທ່ານ ສັນຕິພາບ ພົມວິຫານ ກໍາມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ, ໄດ້ແຈ້ງໃຫ້ຊາບເຖິງສະພາບການດ້ານຕ່າງໆໃນການຈັດຕັ້ງປະຕິບັດໜ້າທີ່ການເມືອງ, ທັງຍົກໃຫ້ເຫັນຜົນສໍາເລັດພົ້ນເດັ່ນຫຼາຍດ້ານໃນການນໍາພາ-ຊີ້ນຳຂອງຄະນະພັກ;ລວມທັງບັນຫາຄົງຄ້າງທີ່ຈະສືບຕໍ່ປັບປຸງແກ້ໄຂໃນຕໍ່ໜ້າ. ໃນວາລະດຽວກັນ, ທ່ານ ບົວສອນ ມະຫາວົງ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ, ໄດ້ລາຍງານສະພາບລວມຂອງວຽກງານຈັດຕັ້ງໃນໄລຍະຜ່ານມາ ໂດຍສະເພາະແມ່ນບັນຫາການຂະຫຍາຍ ແລະ ຄຸ້ມຄອງສະມາຊິກພັກຢູ່ເຂດຫ່າງໄກສອກຫຼີກ ແລະອື່ນໆ. ພ້ອມນີ້, ກໍໄດ້ມີການແລກປ່ຽນຄໍາເຫັນທາງດ້ານວິຊາການລະຫວ່າງ ທີມງານຈາກຄະນະຈັດຕັ້ງສູນກາງພັກ ແລະຄະນະຈັດຕັ້ງແຂວງຊຶ່ງໄດ້ເຮັດໃຫ້ການພົບປະຄັ້ງນີ້ເຕັມໄປດ້ວຍເນື້ອໃນ ແລະມີຄວາມໝາຍ.

ໃນວາລະໂອ້ລົມ, ຫົວໜ້າຄະນະຈັດຕັ້ງສູນກາງພັກ, ໄດ້ຍົກໃຫ້ເຫັນຄວາມສຳຄັນໃນການກຳໄດ້ນິຕິກຳວຽກງານພັກ-ພະນັກງານ, ກົດໝາຍຂອງລັດ ແລະ ນິຕິກຳທີ່ກ່ຽວຂ້ອງກັບວຽກງານວິຊາສະເພາະ. ສິ່ງສຳຄັນພະນັກງານຈັດຕັ້ງຕ້ອງມີຄວາມທ່ຽງທຳ, ມີຈັນຍາບັນ, ມີຄຸນທາດການເມືອງໜັກແໜ້ນ, ແກ້ໄຂບັນຫາຢ່າງພາວະວິໄສທັນເຫດການ, ປະຕິບັດຕາມຫຼັກການເຮັດວຽກຂອງພັກຢ່າງເຂັ້ມງວດ, ຮັບປະກັນການເປັນເສນາທິການທາງດ້ານວຽກງານຈັດຕັ້ງໃຫ້ທ້ອງຖິ່ນຂອງຕົນນັບມື້ມີຄວາມເຂັ້ມແຂງ ແລະມີຄຸນນະພາບຈິ່ງຈະຮັກສາໄດ້ບົດບາດການນຳພາຂອງພັກ ແລະ ສາມາດເຮັດຫຼ້ອນໜ້າທີ່ການເມືອງທີ່ພັກ-ລັດມອບໝາຍໃຫ້.

ໃນຕອນບ່າຍຂອງວັນດຽວກັນ, ທ່ານ ນາງ ສີໃສ ລືເດດມູນສອນ ພ້ອມດ້ວຍຄະນະ, ກໍໄດ້ພົບປະໂອ້ລົມຕໍ່ການນໍາ ແລະ ພະນັກງານ-ສະມາຊິກພັກ, ຕະຫຼອດຮອດເລຂາພັກບ້ານຂອງນະຄອນໄກ ສອນພົມວິຫານ ແລະ ໄດ້ຮັບຟັງລາຍງານຈາກ ທ່ານ ປະສົງສິນ ຈະເລີນສຸກ ຄະນະປະຈຳພັກແຂວງ, ເລຂາພັກນະຄອນ, ເຈົ້າຄອງນະຄອນໄກສອນພົມວິຫານ; ທັງໄດ້ແລກປ່ຽນບົດຮຽນກ່ຽວກັບວຽກງານຈັດຕັ້ງ, ວຽກງານກໍ່ສ້າງພັກ-ພະນັກງານ. ໂດຍເນັ້ນໃຫ້ຄະນະພັກ-ຄະນະນຳນະຄອນໄກສອນພົມວິຫານ ແລະ ຂະແໜງການກ່ຽວຂ້ອງ, ຍົກສູງຊີ້ນຳ-ນຳພາ ແກ້ໄຂປາກົດການຫຍໍ້ທໍ້ ແລະເປັນແບບຢ່າງທີ່ດີໃຫ້ແກ່ມະຫາຊົນ, ມີຄວາມເປັນເອກະພາບພາຍໃນພັກ, ຮັກສາໄດ້ຄວາມສາມັກຄີ, ມີການຕິຊົມກໍ່ສ້າງເຊິ່ງກັນແລະກັນ, ເຮັດວຽກງານຢ່າງມີແບບແຜນເພື່ອເຮັດຫຼ້ອນໜ້າທີ່ທີ່ໄດ້ຮັບມອບໝາຍ.

• 17/03/2022