ສະຕາໂທລະຄົມ ຄົບຮອບ 13 ປີ ປະກອບສ່ວນສຳຄັນໃນການພັດທະນາ

ນັບເປັນເວລາ 13 ປີທີ່ ບໍລິສັດ ສະຕາໂທລະຄົມ ຈຳກັດ (ຢູນີເທວ) ໄດ້ສະໜອງບໍລິການທາງດ້ານໂທລະຄົມ ແລະ ການສື່ສານໃຫ້ກັບປະຊາຊົນລາວ ໂດຍຍຶດໝັ້ນວິໄສທັດຮັບໃຊ້ປະຊາຊົນ, ຍົກສູງຊີວິດການເປັນຢູ່ຂອງປະຊາຊົນນັບມື້ດີຂຶ້ນ ແລະ ປະຊາຊົນມີສ່ວນຮ່ວມ.

ທັງນີ້, ພົນຈັດຕະວາ ບີ ມົວໄຟດາເຢຍຈ່າ ຮອງຜູ້ອໍານວຍການໃຫຍ່ ຈັດຕັ້ງບໍລິຫານ ບໍລິສັດ ສະຕາ ໂທລະຄົມ ໄດ້ກ່າວໃນງານພົບປະສື່ມວນຊົນ ໂດຍມີ ທ່ານ ລິວ ເມັ໋ງ ຮ່າ ຜູ້ອໍານວຍການໃຫ່ຍ ບໍລິສັດ ສະຕາໂທລະຄົມ ຈໍາກັດ, ພ້ອມຄະນະອໍານວຍການ, ມີຜູ້ອໍານວຍການໃຫຍ່ສຳນັກຂ່າວສານປະເທດລາວ, ຫົວໜ້າບັນນາທິການໃຫຍ່ ໜັງສືພິມປະຊາຊົນ, ຜູ້ອຳນວຍການໃຫຍ່ ສະຖານີວິທະຍຸ ແລະ ໂທລະພາບນະຄອນຫຼວງວຽງຈັນ, ຫົວໜ້າບັນນາທິການໜັງສືພິມກອງທັບ, ອໍານວຍການໃຫຍ່ໜັງສືພິມວຽງຈັນໄທມ໌, ຜູ້ບໍລິຫານສະຖານີວິທະຍຸກະຈາຍສຽງຊາວໜຸ່ມລາວສິນໄຊຍຸກໃໝ່  FM90.0 Mhz, ຜູ້ຕາງໜ້າຈາກໂທລະພາບລາວສະຕາຣ໌, ໂທລະພາບກອງທັບ, ໜັງສືພິມເສດຖະກິດການຄ້າ, ໜັງສືພິມລາວພັດທະນາ, ໜັງສືພິມເສດຖະກິດ-ສັງຄົມ, ວິທະຍຸກະຈາຍສຽງແຫ່ງຊາດ, ວິທະຍຸກະຈາຍສຽງ ກອງທັບປະຊາຊົນລາວ, ຕາງໜ້າວິທະຍຸກະຈາຍສຽງ Climax radiofm 95 mhz, ຕາງໜ້າສື່ອອນໄລນ໌ຈາກ ໂທລະໂຄ່ງ ແລະ ສື່ມວນຊົນຈາກຫວຽດນາມປະຈຳລາວ ເຂົ້າຮ່ວມ.

ໃນຍຸກປະຕິວັດອຸດສະຫະກໍາ 4.0 ຢູນີເທວ ຢືນຢັນວ່າ: ໄດ້ກ້າວເຂົ້າສູ່ໄລຍະໃໝ່ຢ່າງເປັນທາງການ ແລະ ມີຄວາມກຽມພ້ອມທີ່ຈະກາຍເປັນບໍລິສັດ ເທຄໂນໂລຢີ ແລະ ການສື່ສານທີ່ນໍາໜ້າໃນການປະຕິວັດຫັນເປັນດີຈີຕອລຂອງປະເທດ, ນໍາເອົາລະບົບດີຈີຕອລເຂົ້າສູ່ການດໍາລົງຊີວິດຂອງປະຊາຊົນ. ຄຽງຄູ່ກັບຄວາມພະຍາຍາມສູ້ຊົນຖືເອົາການພົວພັນຮ່ວມມືກັບສື່ມວນຊົນໃນທຸກຂະແໜງການ ເພື່ອເຮັດໃຫ້ທັງສອງພາກສ່ວນໄດ້ຮ່ວມມືກັນຫຼາຍຂຶ້ນ, ໂດຍສະເພາະແມ່ນການສ້າງລະບົບທີ່ທັນສະໄໝນໍາໃຊ້ເຂົ້າໃນວຽກງານຂ່າວສານການເອົາຂໍ້ມູນ, ການສົ່ງຂໍ້ມູນ ຫຼື ອື່ນໆທີ່ຈໍາເປັນຕໍ່ວຽກງານຂ່າວ ສານໃນປັດຈຸບັນ ກໍຄື ອະນາຄົດ.

ໃນໄລຍະຜ່ານມາ, ບໍລິສັດ ສະຕາ ໂທລະຄົມ ໄດ້ເຊັນສັນຍາຮ່ວມກັບ ພາກລັດຖະບານ ໃນຫຼາຍໆໂຄງການເຊັ່ນ: ລະບົບ Smart city ຂອງນະຄອນຫຼວງພຣະບາງ ແລະ ນະຄອນປາກເຊ; ລະບົບຄຸ້ມຄອງຖານຂໍ້ມູນຄຸນນະພາບການສຶກສາ ຂອງສູນປະກັນຄຸນນະພາບການສຶກສາ, ກະຊວງສຶກສາທິການ ແລະ ກີລາ ປີ 2016; ລະບົບ Font (ຟອນ) ເພັດສະລາດ ແລະ ແປ້ນພິມພາສາລາວ ໃນລະບົບຄອມພິວເຕີຣ໌ ແລະ ໂທລະສັບມືຖື ຂອງສູນບໍລິຫານລັດເອເລັກໂທຣນິຄ, ກະຊວງເຕັກໂນໂລຊີ ແລະ ການສື່ສານ ປີ 2017; ລະບົບຄຸ້ມຄອງພົນລະເມືອງໄລຍະທີ 1 ໃຫ້ກັບກະຊວງພາຍໃນ ປີ 2019; ການຮ່ວມມືກັບ ກະຊວງກະສິກຳ ແລະ ປ່າໄມ້ ເພື່ອການພັດທະນາຫັນເປັນດິຈີຕອລ 4.0 ປີ 2020; ລະບົບ Smart city ເຊື່ອມຕໍ່ກັບສັງຄົມ ເພື່ອຂັບເຄື່ອນເສດຖະກິດຜ່ານເທຄໂນໂລຢີ (GNSS and CORS) 4.0 ປີ 2020; ການຮ່ວມມືກັບ ລັດວິສາຫະກິດ ເພື່ອສຶກສາຄວາມເປັນໄປໄດ້ທາງດ້ານເສດຖະກິດ-ເທຄນິຄ ປີ 2020; ການຮ່ວມມືກັບ ກົມຊົນລະປະທານ ເພື່ອຫັນເປັນລັດຖະບານດິຈີຕອລ ປີ 2020; ການຮ່ວມມືກັບ ກະຊວງວິທະຍາສາດ ແລະ ເຕັກໂນໂລຊີ ສຶກສາຄວາມເປັນໄປໄດ້ໂຄງການຫັນເປັນດິຈີຕອລ ຢູ່ລາວ ປີ 2020; ຮ່ວມມືກັບ ລັດວິາຫະກິດໄຟຟ້າລາວ (ຟຟລ) ດ້ານໂທລະຄົມມະນາຄົມ ແລະ ເທຄໂນໂລຢີຂໍ້ມູນຂ່າວສານ ປີ 2022.

ນອກນັ້ນ, ການບໍລິການຂອງ ຢູນີເທວ ໃນບໍລິສັດລູກ ທີ່ໃຫ້ບໍລິການດ້ານຟິນເທັກ ທີ່ມີເຄື່ອງໝາຍການຄ້າ ຢູມັນນີ, ກໍໄດ້ຕອບສະໜອງຄວາມສະດວກແກ່ລູກຄ້າ ໃນການຊໍາລະດ້ວຍມືຖື, ຊຶ່ງຢູມັນນີ ໄດ້ກາຍເປັນຊ່ອງທາງໃນການເບີກຈ່າຍເງິນເດືອນແກ່ພະນັກງານໃນຕ່າງແຂວງທີ່ບໍ່ມີທະນາຄານ, ເບີກຈ່າຍເງິນອຸດໜູນຂອງອົງການຈັດຕັ້ງສາກົນ ແລະ ສືບຕໍ່ພັດທະນາໃຫ້ບໍລິການໄດ້ເຊື່ອມຕໍ່ຢ່າງກ້ວາງຂວາງ ເພື່ອສ້າງໃຫ້ ຢູມັນນີ ກາຍເປັນສູນກາງທີ່ໃຫຍ່ໃນການເລືອກຈ່າຍ, ເລືອກຊໍາລະໄດ້ທັນເວລາ ໂດຍຜ່ານ ຢູມັນນີ ທັງພາຍໃນ ລວມເຖິງຕ່າງປະເທດ ແລະ ໃຫ້ບໍລິການລວມໄດ້ 3 ປີ ໂດຍຜ່ານຊ່ອງທາງຂອງຢູມັນນີ ແລະ ບໍລິການອື່ນໆຊຶ່ງເຮັດໃຫ້ທຸລະກຳທາງການເງິນ ແລະ ການບໍລິການອື່ນໆທີ່ມີຄວາມສະດວກ, ປອດໄພ ແລະ ທັນສະໄໝຍິ່ງຂຶ້ນ.

แชร์