ປະທານສະພາແຫ່ງຊາດ ຢ້ຽມຢາມ ແລະ ຊຸກຍູ້ການຜະລິດທີ່ສັງທອງ

​ເມື່ອວັນທີ 15 ມີນາ 2022, ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກປະທານສະພາແຫ່ງຊາດ, ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ຊຸກຍູ້ການຜະລິດ ທີ່ເມືອງສັງທອງ. ໂດຍການຕ້ອນຮັບຂອງ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ພ້ອມດ້ວຍຄະນະນໍາເມືອງ, ຫົວໜ້າພະແນກການ, ຕະຫຼອດຮອດພະນັກງານຫຼັກແຫຼ່ງ ແລະ ພາກສ່ວນກ່ຽວຂ້ອງ. 

ທັງນີ້, ທ່ານ ພົງສະຫວັນ ສີສຸພັນ ເຈົ້າເມືອງສັງທອງ, ໄດ້ລາຍງານໂດຍຍົກໃຫ້ເຫັນຜົນສໍາເລັດໃນໄລຍະຜ່ານມາກໍຄືການພັດທະນາເສດຖະກິດທີ່ມີການຂະຫຍາຍຕົວໃນລະດັບດີ, ການນໍາພາປະຊາຊົນສ້າງເສດຖະກິດຄອບຄົວດ້ວຍການຜະລິດເປັນສິນຄ້າ ແລະ ການພັດທະນາພື້ນຖານໂຄງລ່າງພາຍໃນເມືອງ, ພ້ອມກັບການປະຕິບັດມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດ.

ຈາກນັ້ນ, ທ່ານ ຂັນທອງ ພິນນະກຳ ຫົວໜ້າກອງທຶນບ້ານສາມັກຄີແນວລາວສ້າງຊາດ ບ້ານປາກແຖບ, ກໍໄດ້ລາຍງານກ່ຽວກັບໂຄງການກອງທຶນ ຊຶ່ງສ້າງຕັ້ງຂຶ້ນເມື່ອວັນທີ 27 ພຶດສະພາ 2020 ໂດຍການອະນຸຍາດຈາກທ່ານເຈົ້າເມືອງໆສັງທອງ, ການດໍາເນີນກິດຈະກໍາຂອງກອງທຶນບ້ານປາກແຖບ ແມ່ນຕິດພັນກັບແຜນພັດທະນາເສດຖະກິດຂອງລັດ ກໍຄືສູນກາງແນວລາວສ້າງຊາດ, ເປັນຕົ້ນແມ່ນໂຄງການສ້າງຄອບຄົວ ແລະ ບ້ານສາມັກຄີປອງດອງ ທີ່ຕິດພັນກັບການແກ້ໄຂຄວາມທຸກຍາກ ເພື່ອໃຫ້ປະຊາຊົນຢູ່ເຂດຫ່າງໄກສອກຫຼີກສາມາດເຂົ້າເຖິງແຫຼ່ງທຶນໄດ້ງ່າຍຂຶ້ນ. ໂດຍເນັ້ນສ້າງຄອບຄົວຕົວແບບ ແລະ ໃຫ້ປະຊາຊົນໄດ້ຮຽນຮູ້, ໄດ້ຮັບການຝຶກອົບຮົມ ເພື່ອຍົກສູງຄຸນນະພາບຂອງຜົນຜະລິດກະສິກໍາ ໃຫ້ສາມາດແຂ່ງຂັນໃນຕະຫຼາດໄດ້.

ໃນໂອກາດດັ່ງກ່າວ, ທ່ານປະທານສະພາແຫ່ງຊາດ ກໍໄດ້ມີຄໍາເຫັນໂອ້ລົມ ແລະ ສະແດງຄວາມຊົມເຊີຍຕໍ່ຄະນະນຳເມືອງ ທີ່ໄດ້ເອົາໃຈໃສ່ພັດທະນາເມືອງສັງທອງ ຊຶ່ງເປັນເມືອງທີ່ມີທ່າແຮງດ້ານກະສິກໍາ, ປູກຝັງ-ລ້ຽງສັດ ແລະ ອື່ນໆ ເຫັນໄດ້ວ່າມີການພັດທະນານັບມື້ດີຂຶ້ນ ແລະ ເພື່ອໃຫ້ເສດຖະກິດຂອງເມືອງຂະຫຍາຍຕົວຕໍ່ເນື່ອງ ກໍຮຽກຮ້ອງໃຫ້ຄະນະນຳເມືອງຈົ່ງນໍາໃຊ້ທ່າແຮງຂອງເມືອງໃຫ້ເປັນປະໂຫຍດເຊັ່ນ: ການກະສິກຳ, ປູກຝັງ-ລ້ຽງສັດ, ການບໍລິການ, ການທ່ອງທ່ຽວ,ສ້າງຜະ ລິດຕະພັນຂອງເມືອງໃຫ້ກາຍເປັນສິນຄ້າຫຼາຍຂຶ້ນ ເຮັດໃຫ້ປະຊາຊົນຮັ່ງມີ, ທີ່ສຳຄັນຕ້ອງນຳພາສ້າງເມືອງໃຫ້ເຂັ້ມແຂງ ຮັບປະກັນໄດ້ຄວາມສະຫງົບ, ປອດໄພ, ເປັນລະບຽບຮຽບຮ້ອຍ ຕິດພັນກັບ 2 ວາລະແຫ່ງຊາດ ໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ ແລະ ແກ້ໄຂບັນຫາຢາເສບຕິດໃຫ້ໄດ້ຢ່າງຂາດຕົວ.

ໃນໂອກາດເຄື່ອນໄຫວຢ້ຽມຢາມຄັ້ງນີ້, ຄະນະປະທານສະພາແຫ່ງຊາດ ກໍໄດ້ມອບເງິນສົດຈໍານວນ 20 ລ້ານກີບ ແລະ ອຸປະກອນປ້ອງກັນພະຍາດໂຄວິດ-19 ໃຫ້ເມືອງສັງທອງອີກດ້ວຍ. ຈາກນັ້ນ, ກໍໄດ້ໄປຢ້ຽມຢາມຕົວຈິງສູນໂຄງການຂອງແນວລາວສ້າງຊາດ ຊຶ່ງເປັນສູນການຜະລິດກະສິກຳທີ່ຈະສ້າງໃຫ້ເປັນຕົວແບບໃນການປູກພຶດເປັນສິນຄ້າຢູ່ເມືອງສັງທອງ, ເປັນຕົ້ນແມ່ນ ໝາກແຕງເມລອນ ແລະ ໝາກເລັ່ນພັນຕ່າງປະເທດ ເພື່ອສະໜອງໃຫ້ບໍລິສັດຄູ່ຮ່ວມສັນຍາ ໃນເນື້ອທີ່ 18 ເຮັກຕາ ແລະ ປູກໃນເຮືອນຮົ່ມ 20 ຫຼັງ ທີ່ຮັບປະກັນມາດຕະຖານປອດສານພິດ.

แชร์