ຍົກສູງຄວາມອາດສາມາດ ແກ່ ສສຂ 4 ແຂວງພາກໃຕ້

ສະຖາບັນຄົ້ນຄວ້ານິຕິກຳ ສະພາແຫ່ງຊາດ, ໄດ້ຈັດຝຶກອົບຮົມເພື່ອຍົກສູງການສ້າງຄວາມອາດສາມາດໃຫ້ແກ່ສະມາຊິກສະພາປະຊາຊົນຂັ້ນແຂວງ (ສສຂ) 4 ແຂວງ (ສາລະວັນ, ຈຳປາສັກ, ເຊກອງ ແລະ ອັດຕະປື) ໂດຍການເປັນປະທານຂອງ ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ມີທ່ານ ຢາງກູ້ ຢາງລືໄຊ ຫົວໜ້າສະຖາບັນຄົ້ນຄວ້ານິຕິກໍາສະພາແຫ່ງຊາດ, ແລະ ພາກສ່ວນກ່ຽວຂ້ອງເຂົ້າຮ່ວມ.

ການຝຶກອົບຮົມຄັ້ງນີ້ຈັດຂຶ້ນເມື່ອລະຫວ່າງວັນທີ 14-15 ມີນາ 2022 ທີ່ແຂວງຈໍາປາສັກ,ໂດຍການສະໜັບສະໜູນຈາກແຜນງານການມີສ່ວນຮ່ວມຂອງປະຊາຊົນຕໍ່ວຽກງານການປົກຄອງທີ່ດີ ແລະການສ້າງລັດ ທີ່ປົກຄອງດ້ວຍກົດໝາຍ (ແຜນການເຊກາ) ແລະ ງົບປະມານຈາກຄະນະເລຂາທິການສະພາແຫ່ງຊາດ.

ການຍົກລະດັບຄວາມຮັບຮູ້ກ່ຽວກັບພາລະບົດບາດຂອງສະມາຊິກສະພາແຫ່ງຊາດ ແລະ ສະພາປະຊາຊົນແຂວງ, ແນໃສ່ເຮັດໃຫ້ສາມາດປະຕິບັດໜ້າທີ່ການເມືອງຂອງ ສສຂ ໃຫ້ມີຄວາມຮັບຮູ້, ເຂົ້າໃຈ ແລະ ສາມາດນຳໄປຈັດຕັ້ງປະຕິບັດ ກ່ຽວກັບການສ້າງນິຕິກຳ, ການແກ້ໄຂຄຳຮ້ອງຂໍຄວາມເປັນທັມຂອງປະຊາຊົນ ແລະ ທັກສະດ້ານຕ່າງໆຕາມພາລະບົດບາດ. ພ້ອມນັ້ນ, ຜູ້ເຂົ້າຮ່ວມຍັງໄດ້ຮັບຟັງກ່ຽວກັບພາລະບົດບາດ, ສິດ ແລະໜ້າທີ່ຂອງ ສພຂ ແລະ ສສຂ, ບົດຮຽນການສ້າງນິຕິກຳໃຕ້ກົດໝາຍຂັ້ນທ້ອງຖິ່ນ, ບົດຮຽນວຽກງານແກ້ໄຂຄຳຮ້ອງຂໍຄວາມເປັນທຳຂອງພົນລະເມືອງ, ທັກສະການຊັກຖາມ ແລະ ການປະກອບຄຳເຫັນໂດຍວິທະຍາກອນທີ່ມີປະສົບການຕົວຈິງ, ເປັນຕົ້ນແມ່ນອະດີດການນຳຂອງສະພາແຫ່ງຊາດ ຊຸດທີ VIII, ປະທານກຳມາທິການ ແລະ ຄະນະກົມທີ່ກ່ຽວຂ້ອງ.

ໂດຍທ່ານ ນາງ ສູນທອນ ໄຊຍະຈັກ ໄດ້ກ່າວວ່າ: ການຍົກສູງຂີດຄວາມສາມາດໃຫ້ແກ່ ສສຂ ຄັ້ງນີ້, ແມ່ນສືບຕໍ່ປະຕິບັດຕາມແຜນການເພື່ອເຮັດໃຫ້ ສສຂ ຜູ້ໃໝ່ ຊຶ່ງມາຈາກຫຼາຍສາຂາອາຊີບທີ່ແຕກຕ່າງກັນ ໄດ້ມີໂອກາດເຊື່ອມຊຶມ, ມີຄວາມຮັບຮູ້, ເຂົ້າໃຈ ແລະ ກຳແໜ້ນເນື້ອໃນບັນຫາທີ່ຈຳເປັນ ໃນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ກໍຄືຂອງສະພາປະຊາຊົນຂັ້ນແຂວງ ໃຫ້ມີປະສິດທິພາບ ແລະ ປະສິດທິຜົນ.

• 16/03/2022