ຫາລືຜັນຂະຫຍາຍຂໍ້ສະເໜີ ສປຊ ຕໍ່ວຽກແມ່ຍິງ ແລະ ເດັກນ້ອຍ

  ເມື່ອວັນທີ 19 ມີນາຜ່ານມາທີ່ນະຄອນຫຼວງວຽງຈັນ ໄດ້ດຳເນີນກອງປະຊຸມປຶກສາຫາລືການຈັດຕັ້ງຜັນຂະຫຍາຍບັນດາຂໍ້ສະເໜີແນະຂອງສະຫະປະຊາຊາດຕໍ່ວຽກງານຂອງຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກຮ່ວມກັບຄູ່ຮ່ວມພັດທະນາປີ 2019 ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີປະທານຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະແມ່-ເດັກ ພ້ອມນີ້ກໍມີບັນດາທ່ານເອກອັກຄະລັດທະທູດ ແລະບັນດາຄູ່ຮ່ວມພັດທະນາ; ບັນດາທ່ານປະທານຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແລະແມ່-ເດັກກະຊວງ/ອົງການເຂົ້າຮ່ວມ.

 ກອງປະຊຸມຄັ້ງນີ້ໄດ້ຮັບຟັງການລາຍງານຜົນສຳເລັດໃນການເຂົ້າຮ່ວມປ້ອງກັນບົດລາຍງານແຫ່ງຊາດ 2 ສະບັບພາຍໃຕ້ສົນທິສັນຍາທີ່ ສປປ ລາວ ເຮົາເປັນພາຄີຄື: ບົດລາຍງານແຫ່ງຊາດສະບັບທີ 3-6 ກ່ຽວກັບການຈັດຕັ້ງປະຕິບັດສົນທິສັນຍາວ່າດ້ວຍສິດທິເດັກ ແລະ ບົດລາຍງານແຫ່ງຊາດປະຈຳໄລຍະທີ 8 ແລະ 9 ໃນການຈັດຕັ້ງປະຕິບັດສົນທິສັນຍາວ່າດ້ວຍການລຶບລ້າງທຸກຮູບການຈຳແນກຕໍ່ແມ່ຍິງ (ຊີດໍ) ລວມທັງບັນດາຂໍ້ສະເໜີແນະຂອງສະຫະປະຊາຊາດຕໍ່ ການຈັດຕັ້ງປະຕິບັດວຽກງານຄວາມສະເໝີພາບຍິງ-ຊາຍແລະວຽກແມ່-ເດັກ ແລະທິດທາງແຜນວຽກຈຸດສຸມການຈັດ ຕັ້ງຜັນຂະຫຍາຍບັນດາຂໍ້ສະເໜີແນະ ຂອງສະຫະປະຊາຊາດທັງໃນວຽກສິດທິເດັກ ແລະວຽກຊີດໍໃນໄລຍະປີ 2019-2023

  ສະຫຼຸບລາຍງານ ແລະປຶກສາຫາລືກັນໃນຫຼາຍຫົວຂໍ້ທີ່ສຳຄັນເພື່ອປັບປຸງວຽກງານຄວາມກ້າວໜ້າຂອງແມ່ຍິງ, ການປົກປ້ອງສິດ ແລະຜົນປະໂຫຍດຂອງແມ່ ແລະເດັກເປັນຕົ້ນ: ໄດ້ຮັບຟັງການສະຫຼຸບລາຍງານການຈັດຕັ້ງປະຕິບັດວຽກງານຂອງ ຄຊກມດ ປີ 2018 ແລະທິດທາງແຜນການປີ 2019; ບົດ ປະກອບຄຳເຫັນມ້ວນທ້າຍຂອງຄະນະກຳມະການຊີດໍສາກົນຕໍ່ບົດລາຍງານປະຈຳໄລຍະທີ 8 ແລະ 9 ໃນການຈັດຕັ້ງປະຕິບັດສົນທິສັນຍາຊີດໍໃນ ສປປ ລາວ ແລະ ຂໍ້ສະເໜີແນະຂອງອົງການ ສປຊ ຕໍ່ບົດລາຍງານແຫ່ງຊາດປະຈຳໄລຍະທີ 3-6 ກ່ຽວກັບການຈັດຕັ້ງປະຕິບັດສົນທິສັນຍາວ່າດ້ວຍສິດທິເດັກ;

 ກອງປະຊຸມຍັງໄດ້ຮັບຟັງການສະໜັບສະໜູນຂອງຄູ່ຮ່ວມພັດທະນາເຂົ້າໃນການຈັດຕັ້ງຜັນຂະຫຍາຍບັນດາຂໍ້ສະເຫນີແນະຂອງສະຫະປະຊາຊາດຕໍ່ການຈັດຕັ້ງປະຕິບັດວຽກງານສົ່ງເສີມຄວາມກ້າວໜ້າຂອງແມ່ຍິງ, ຄວາມສະເໝີພາບຍິງ-ຊາຍກໍຄືການສົ່ງເສີມ, ປົກປ້ອງສິດ ແລະ ຜົນປະໂຫຍດຂອງແມ່ ແລະ ເດັກ, ການລຶບລ້າງທຸກຮູບການຈຳແນກຕໍ່ແມ່ຍິງ ແລະສິດທິເດັກຕິດພັນກັບການສຶກສາອົບຮົມ ແລະພັດທະນາເດັກຢ່າງຮອບດ້ານ.

  ເພື່ອຜັນຂະຫຍາຍເນື້ອໃນຈິດໃຈຂອງກອງປະຊຸມຄັ້ງນີ້ໃຫ້ບັນລຸຜົນຕາມຈຸດປະສົງ ແລະຄາດໝາຍທີ່ວາງໄວ້ທ່ານຮອງນາຍົກຍັງໄດ້ຮຽກຮ້ອງໃຫ້ພາກສ່ວນທີ່ກ່ຽວຂ້ອງຈົ່ງໄດ້ເພີ່ມຄວາມເອົາໃຈໃສ່ ປະຕິບັດ 19 ວຽກງານຈຸດສຸມຕື່ມອີກ.

ຂ່າວ: ນສພ ເສດຖະກິດ-ສັງຄົມ

แชร์