2021 ໂຄວິດປິດຈ້າງງານໃນອາຊຽນ 9,3 ລ້ານອັດຕາ ປະຊາຊົນ 4,7 ລ້ານຄົນທຸກຍາກ

 

ການລະບາດຂອງພະຍາດໂຄວິດ-19 ເຮັດໃຫ້ຜູ້ຄົນທີ່ດຳລົງຊີວິດຢູ່ໃນພູມີພາກເອເຊຍຕາເວັນອອກສຽງໃຕ້ (ອາຊຽນ) ຈຳນວນ 4,7 ລ້ານຄົນຕົກຢູ່ໃນຄວາມທຸກຍາກສຸດຂີດເມື່ອປີ 2021,ຂະນະທີ່ການຈ້າງງານໃນປີດຽວກັນກໍ່ຫາຍໄປເຖິງ 9,3 ລ້ານອັດຕາ ເມື່ອທຽບກັບສະພາບປົກກະຕິທີ່ບໍ່ທັນມີໂຄວິດ.

ລາຍງານຂ່າວຕ່າງປະເທດລະບຸວ່າ: ທະນາຄານພັດທະນາເອເຊຍ ຫຼື ເອດີບີ ໄດ້ເຜີຍແຜ່ລາຍງານ “ການຟື້ນຕົວຈາກໂຣກລະບາດຂອງເອເຊຍຕາເວັນອອກສຽງໃຕ້” ໃນວາລະປະຊຸມສຳມະນາ ການພັດທະນາເອເຊຍຕາເວັນອອກສຽງໃຕ້ (SEADS) ໃນວັນທີ 16 ມີນາ, ໂດຍ ເອດີບີໄດ້ລາຍງານວ່າ: ການລະບາດຂອງເຊື້ອກາຍພັນ ໂອມິຄຣອນ ຍັງຈະສົ່ງຜົນຕໍ່ການເຕີບໂຕທາງເສດຖະກິດຂອງພູມີພາກນີ້ໃນປີ 2022 ຊຶ່ງຈະປັບຫຼຸດລົງ 0,8%. ຂະນະດຽວກັນກໍຄາດວ່າ: ຜົນຜະລິດທາງເສດຖະກິດຂອງພູມີພາກອາຊຽນຈະຍັງຄົງມີຕໍ່າກວ່າ 10% ທຽບໃສ່ສະຖານະການປົກກະຕິທີ່ບໍ່ທັນມີໂຄວິດ, ຊຶ່ງກຸ່ມທີ່ໄດ້ຮັບຜົນກະທົບຫຼາຍທີ່ສຸດກໍຄືແຮງງານທີ່ບໍ່ມີທັກສະ ແລະ ແຮງງານໃນກຸ່ມທຸລະກິດຄ້າຍ່ອຍ, ລວມທັງເສດຖະກິດນອກລະບົບ, ໄປຈົນເຖິງທຸລະກິດຂະໜາດນ້ອຍທີ່ບໍ່ມີຕົວຕົນໃນໂລກດິຈີຕອລ.

ໂດຍທ່ານ ມາຊາສຶກຸ ອາຊາກາວາ ປະທານ ເອດີບີ, ໄດ້ກ່າວວ່າ “ໂຣກລະບາດໃຫຍ່ໄດ້ນຳໄປສູ່ໄພຫວ່າງງານເປັນວົງກວ້າງ, ຄວາມຫຼຸດໂຕນ ແລະ ຄວາມທຸກຍາກໃຫ້ຍິ່ງໜັກເຂົ້າໄປຕື່ມໃນປະຊາກອນເພດຍິງ, ແຮງງານອາຍຸນ້ອຍ ແລະ ກຸ່ມຄົນອາຍຸສູງໃນເອເຊຍຕາເວັນອອກສຽງໃຕ້”.

ທັງນີ້, ເອດີບີ ຈະສືບຕໍ່ເຮັດວຽກຮ່ວມກັບຜູ້ກຳນົດນະໂຍບາຍ,ໃນຂະນະດຽວກັນກໍ່ຈະພະຍາຍາມຟື້ນຟູ, ປັບປຸງລະບົບສາທາລະນະສຸກແຫ່ງຊາດ ແລະ ປັບປຸງກົດລະບຽບພາຍໃນປະເທດໃຫ້ມີປະສິດທິພາບຫຼາຍຂຶ້ນ. ເພື່ອເສີມສ້າງຄວາມສາມາດໃນການແຂ່ງຂັນທາງທຸລະກິດ. ຊຶ່ງ ເອດີບີ ໄດ້ສະໜັບສະໜູນລັດຖະບານໃນເອເຊຍຕາເວັນອອກສຽງໃຕ້ໃຫ້ລົງທຶນໃນໂຄງລ່າງພື້ນຖານທີ່ທັນສະໄໝ ແລະ ເປັນມິດກັບສິ່ງແວດລ້ອມ, ທັງຮັບເອົານະວັດຕະກຳທາງເທຄໂນໂລຢີມາໃຊ້ໃນການຟື້ນຟູເສດຖະກິດ.

ໂດຍ ເອດີບີ ໄດ້ຊີ້ວ່າ: ທ່າອຽງການເຕີບໂຕທາງເສດຖະກິດຈະສົດໃສຂຶ້ນດ້ວຍການໃຊ້ເທຄໂນໂລຢີຢ່າງແພ່ຫຼາຍ, ການຟື້ນຕົວຂຶ້ນຂອງການສົ່ງອອກສິນຄ້າ ແລະ ຊັບພະຍາກອນທຳມະຊາດ, ຊຶ່ງ ເອດີບີ ໄດ້ຮຽກຮ້ອງໃຫ້ລັດຖະບານຂອງບັນດາປະເທດໃນອາຊຽນຈັດສັນຊັບພະຍາກອນເພີ່ມຂຶ້ນເພື່ອສະໜັບສະໜູນລະບົບສາທາລະນະສຸກ, ປັບປຸງການເຝົ້າລະວັງພະຍາດ ແລະກຽມພ້ອມເພື່ອຕອບສະໜອງຕໍ່ໂຣກລະບາດໃຫຍ່ທີ່ອາດຈະເກີດຂຶ້ນໃນອະນາຄົດ. ນອກນັ້ນ, ເອດີບີ ຍັງໄດ້ແນະນຳໃຫ້ປະເທດຕ່າງໆດຳເນີນການປະຕິຮູບໂຄງສ້າງເພື່ອສົ່ງເສີມຄວາມສາມາດໃນການແຂ່ງຂັນ ແລະ ການຜະລິດ, ລວມເຖິງການຫຼຸດອຸປະສັກທາງການຄ້າ-ການລົງທຶນ ແລະການສະໜັບສະໜູນທຸລະກິດລາຍຍ່ອຍໃຫ້ເກີດການນຳໃຊ້ເທຄໂນໂລຢີໃໝ່ໆ, ຄຽງຄູ່ກັບການຝຶກອົບຮົມທັກສະແກ່ແຮງງານເພື່ອໃຫ້ມີຄວາມຊຳນານງານຫຼາຍຂຶ້ນ.

แชร์