ເທສະການໝາກພ້າວນາໄຊ ຕິດພັນບຸນໃຫຍ່ລະປຶບ

ເທສະການໝາກພ້າວນາໄຊ ຕິດພັນກັບບຸນໃຫຍ່ລະປຶບ ຊົນເຜົ່າກະຕາງ, ແມ່ນໜຶ່ງໃນງານບຸນປະເພນີດີງາມ ແລະສ້າງລາຍໄດ້ໃຫ້ແກ່ຊຸມຊົນບ້ານນາໄຊນ້ອຍ ເມືອງ ແລະແຂວງສາລະວັນ, ລວມທັງບັນດາເມືອງ ແລະແຂວງອ້ອມຂ້າງ. ເພື່ອເປັນການຜັນຂະຫຍາຍວາລະແຫ່ງຊາດໂດຍສະເພາະແມ່ນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ດ້ວຍການສົ່ງເສີມການຜະລິດ ແລະແປຮູບຜົນຜະລິດກະສິກຳເປັນຕົ້ນແມ່ນການແປຮູບໝາກພ້າວທີ່ເປັນທ່າແຮງບົ່ມຊ້ອນຂອງທ້ອງຖິ່ນ.

ເທສະການໝາກພ້າວນາໄຊ ຕິດພັນກັບບຸນໃຫຍ່ລະປຶບ ຈັດຂຶ້ນໃນລະຫວ່າງວັນທີ 15-19 ມີນາ 2022, ເຂົ້າຮ່ວມໃນພິທີເປີດງານໂດຍ ທ່ານ ໂພໄຊ ໄຊຍະສອນ ເຈົ້າແຂວງສາລະວັນ, ທ່ານ ຈັນສີລອນ ສີສົມບູນ ເຈົ້າເມືອງສາລະວັນ ທັງເປັນປະທານຈັດງານ, ມີຄະນະນຳຂັ້ນແຂວງ, ອະດີດຄະນະນໍາແຂວງ, ຄະນະນໍາ 8 ຕົວເມືອງ ແລະຄະນະນໍາຈາກເມືອງທ່າແຕ່ງ, ເມືອງລະມາມ ແຂວງເຊກອງ, ເມືອງບາຈຽງຈະເລີນສຸກ ແຂວງຈໍາປາສັກ ແລະພາກສ່ວນກ່ຽວຂ້ອງເຂົ້າຮ່ວມ.

ງານບຸນຄັ້ງນີ້ມີຄວາມໝາຍຄວາມສຳຄັນເພາະຕິດພັນກັບການສ້າງບ້ານພັດທະນາຕາມທິດ 3 ສ້າງ, ເຮັດໃຫ້ຊົນນະບົດກາຍເປັນບ້ານໃຫຍ່ຄ້າຍຄືຕົວເມືອງນ້ອຍ, ທັງເປັນການຊຸກຍູ້ສົ່ງເສີມການປູກໝາກພ້າວ ແລະຮັກສາຮີດຄອງປະເພນີອັນດີງາມຂອງຊົນເຜົ່າກະຕາງເພື່ອດຶງດູດນັກທ່ອງທ່ຽວດ້ວຍການສ້າງຜະລິດຕະພັນໝາກພ້າວກາຍເປັນສິນຄ້າ ແລະເປັນການເຕົ້າໂຮມຄວາມສາມັກຄີຂອງປະຊາຊົນບັນດາເຜົ່າພາຍໃນແຂວງສາລະວັນກັບບັນດາເມືອງ, ບັນດາແຂວງອ້ອມຂ້າງ.

ໂດຍເຈົ້າເມືອງສາລະວັນ, ໄດ້ຍົກໃຫ້ເຫັນການຟື້ນຟູ ແລະ ແກ້ໄຂຄວາມຫຍຸ້ງຍາກທາງດ້ານເສດຖະກິດ, ການຂຸດຄົ້ນທ່າແຮງບົ່ມຊ້ອນຂອງທ້ອງຖິ່ນສູ່ການແປຮູບຜົນຜະລິດກະສິກຳໃຫ້ມີຄວາມຫຼາກຫຼາຍ, ທັງເປັນການສ້າງບັນຍາກາດດ້ານການທ່ອງທ່ຽວຜ່ານກິດຈະກໍາ ໂດຍການເປີດນຳໃຊ້ຫໍກວນ, ປູກຕົ້ນພ້າວ, ປະກວດຮ້ອງເພງ, ໝໍລຳ, ສິລະປະພື້ນບ້ານ, ງານຕະຫຼາດນັດ, ການຈັດສະແດງຜະລິດຕະພັນສິນຄ້າຂອງພະແນກການອ້ອມຂ້າງແຂວງ ແລະ ບັນດາເມືອງ, ລັດວິສາຫະກິດ, ຜູ້ປະກອບການ ແລະ ກິດຈະກໍາການແຂ່ງຂັນກີລາເຊັ່ນ: ແລ່ນກະໂປະໝາກພ້າວ, ແກ່ກ້ານພ້າວ, ຍິງໜ້າເກັກ, ແຂ່ງຂັນກິນໝາກພ້າວ, ອົມນ້ຳໝາກພ້າວ, ກີລາບານເຕະ, ບານສົ່ງ ແລະ ອື່ນໆ.

แชร์