ນິວຊີແລນດ໌ ຫຼຸດພາສີນໍ້າມັນ ຊ່ວຍຄ່າຄອງຊີບປະຊາຊົນ

ນິວຊີແລນດ໌ ຫຼຸດຄ່າພາສີນໍ້າມັນເຊື້ອໄຟປະມານ 1.800 ກີບ ເປັນເວລາ 3 ເດືອນ ຊຶ່ງເປັນໜຶ່ງໃນນະໂຍບາຍຫຼຸດຜ່ອນຄ່າໃຊ້ຈ່າຍໃນຄົວເຮືອນຂອງປະຊາຊົນ.

ລາຍງານຂ່າວຕ່າງປະເທດໄດ້ອ້າງການເປີດເຜີຍຂອງສຳນັກຂ່າວຊິນຫົວເມື່ອວັນທີ14ມີນາ2022ວ່າ ລັດຖະບານນິວຊີແລນດ໌ ກຽມຫຼຸດພາສີນຳເຂົ້ານໍ້າມັນເຊື້ອໄຟລົງ25ເຊນຕ໌ ຫຼື ປະມານ 1.800 ກີບ ຕໍ່ລິດ ເປັນເວລາ 3 ດືອນ.

ໂດຍທ່ານ ນາງ ຈາຊິນດາ ອາຣ໌ເດິຣ໌ນ ນາຍົກລັດຖະມົນຕີ ນິວຊີແລນດ໌, ໄດ້ຖະແຫຼງກ່ຽວກັບແຜນຫຼຸດພາສີນໍ້າມັນເຊື້ອໄຟ ແລະ ຄ່າທຳນຽມທາງລົງ 25 ເຊນຕ໌ນິວຊີແລນດ໌, ຊຶ່ງມີຜົນບັງຄັບໃຊ້ນັບແຕ່ວັນທີ 15 ມີນາ 2022 ເປັນຕົ້ນໄປເປັນໄລຍະເວລາ 3 ເດືອນ. ທັງຈະຫຼຸດຄ່າໂດຍສານໃນລະບົບການຂົນສົ່ງສາທາລະນະລົງເຄິ່ງໜຶ່ງຊຶ່ງຈະປະຕິບັດນັບຕັ້ງແຕ່ວັນທີ 1 ເມສາທີ່ຈະມາເຖິງ. ທັງນີ້, ຖືເປັນສ່ວນໜຶ່ງຂອງນະໂຍບາຍຫຼຸດພາລະຄ່າໃຊ້ຈ່າຍດ້ານການຂົນສົ່ງຂອງຄົວເຮືອນຜູ້ມີລາຍໄດ້ປານກາງ ແລະ ຜູ້ມີລາຍໄດ້ຕໍ່າ.

ການດຳເນີນນະໂຍບາຍດັ່ງກ່າວຈະຊ່ວຍໃຫ້ປະຊາຊົນຫຼຸດຜ່ອນຄ່າໃຊ້ຈ່າຍໃນການໃສ່ນໍ້າມັນລົດເຕັມຖັງຂະໜາດ 40 ລິດໄດ້ກວ່າ 11 ໂດລານິວຊີແລນດ໌ ຫຼື ປະມານ 89.000 ກີບ ແລະ ຫຼຸດລົງ 17 ໂດລານິວຊີແລນດ໌ ຫຼືປະມານ 138.000ກີບ ສຳລັບຖັງນໍ້າມັນຂະໜາດ 60 ລິດ.

ພ້ອມນັ້ນ ນາຍົກລັດຖະມົນຕີ ອາຣ໌ເດິຣ໌ນ ຍັງລະບຸຕື່ມວ່າການປັບຫຼຸດຄ່າໂດຍສານໃນລະບົບການຂົນສົ່ງສາທາລະນະຈະເຮັດໃຫ້ຊາວນິວຊີແລນດ໌ ມີທາງເລືອກເພີ່ມຂຶ້ນນອກເໜືອຈາກການໃສ່ນ້ຳມັນລົດ.

 

แชร์