ຈີນໃຊ້ເທຄໂນໂລຢີຈະເລີນພັນ ເພີ່ມອັດຕາການເກີດຂອງພົນລະເມືອງ

ລັດຖະບານ ສປ ຈີນ ປະກາດນະໂຍບາຍໃໝ່ທີ່ຈະຊ່ວຍໃຫ້ບັນດາຄູ່ສາມີ-ພັນລະຍາ ໄດ້ມີລູກຫຼາຍຂຶ້ນ, ດ້ວຍການບັນຈຸເທຄໂນໂລຢີທີ່ຊ່ວຍໃນການຈະເລີນພັນ 16 ປະເພດໄວ້ໃນໂຄງການປະກັນສຸຂະພາບ.

ລາຍງານຂ່າວຕ່າງປະເທດໃຫ້ຮູ້ວ່າ ຂະແໜງການກ່ຽວຂ້ອງຂອງຈີນກຳລັງເຮັດວຽກຢ່າງໜັກເພື່ອເພີ່ມອັດຕາການເກີດຂອງພົນລະເມືອງທີ່ຫຼຸດລົງ, ດ້ວຍການນຳໃຊ້ເທຄໂນໂລຢີຊ່ວຍການຈະເລີນພັນ, ທັງບັນຈຸຄ່າໃຊ້ຈ່າຍໃນສ່ວນນີ້ເຂົ້າໃນໂຄງການປະກັນສຸຂະພາບພາຍໃຕ້ນະໂຍບາຍ. ຊຶ່ງໃນໄລຍະ5ປີຜ່ານມາ, ອັດຕາການເກີດຂອງຈີນຫຼຸດລົງ, ໂດຍຄາດຄະເນວ່າຈຳນວນປະຊາກອນທັງໝົດຂອງຈີນມີທ່າອຽງຫຼຸດລົງໃນຊ່ວງໃກ້ທ້າຍທົດສະວັດນີ້; ເຖິງແມ່ນຈະມີຄວາມພະຍາຍາມປ່ຽນແປງທ່າອຽງນີ້ແລ້ວກໍ່ຕາມ.

ຜົນການສຳຫຼວດປະຊາກອນຫຼ້າສຸດ ປີ 2020 ພົບວ່າ ສປ ຈີນ ມີຈຳນວນປະຊາກອນຫຼາຍກວ່າ 1.400 ລ້ານຄົນ ແລະໃນປີ 2022 ກໍພົບອັດຕາການເກີດຫຼຸດລົງນັບເປັນປີທີ 5 ຕິດຕໍ່ກັນຊຶ່ງຖືວ່າຕໍ່າເປັນປະຫວັດການ ທີ່ 7,52 ຄົນຕໍ່ຈຳນວນປະຊາກອນ 1.000 ຄົນ. ຈາກຕົວເລກດັ່ງກ່າວ, ອັດຕາການຈະເລີນພັນຂອງປະເທດ ຊຶ່ງໝາຍເຖິງຈຳນວນບຸດທີ່ບຸກຄົນໜຶ່ງຈະມີຕະຫຼອດຊ່ວງຊີວິດຈະຢູ່ທີ່ປະມານ 1,15.

ທັງນີ້, ນະຄອນຫຼວງປັກກິ່ງ ຈິ່ງໄດ້ປະກາດນະໂຍບາຍໃໝ່ທີ່ຈະຊ່ວຍໃຫ້ຄູ່ສາມີ-ພັນລະຍາມີລູກຫຼາຍຂຶ້ນ, ດ້ວຍການບັນຈຸເທຄໂນໂລຢີທີ່ຊ່ວຍໃນການຈະເລີນພັນ 16 ປະເພດໄວ້ໃນໂຄງການປະກັນສຸຂະພາບທີ່ໄດ້ຮັບການສະໜັບສະໜູນຈາກລັດຖະບານ. ສຳລັບນະໂຍບາຍໃໝ່, ຈະໄດ້ເລີ່ມຂຶ້ນໃນວັນທີ26ມີນາ2022ນີ້ເອງ.

 

แชร์