ນະໂຍບາຍຂອງລັດຕໍ່ກັບສະພາບນໍ້າມັນແພງ

ລັດຖະບານ, ໂດຍກະຊວງອຸດສະຫະກຳ ແລະການຄ້າ,ກຳລັງຄົ້ນຄວ້າຫາວິທີທາງໃນການຫຼຸດຜ່ອນຜົນກະທົບຈາກລາຄານໍ້າມັນເຊື້ອໄຟທີ່ແພງຂຶ້ນນັບມື້. ຊຶ່ງໃນເບື້ອງຕົ້ນກໍ່ຈະມີການປັບປ່ຽນໄລຍະປັບລາຄານໍ້າມັນເຊື້ອໄຟຈາກ 15 ວັນມາເປັນ 5-7 ວັນເພື່ອໃຫ້ການຊື້ (ນຳເຂົ້າ) ສາມາດດັດປັບ ແລະ ຮັບມືທັນສະພາບຕະຫຼາດໂລກ, ເພື່ອທີ່ຈະສາມາດຕອບສະໜອງໄດ້ຄວາມຕ້ອງການຊົມໃຊ້ພາຍໃນ. ແຕ່ທັງນີ້ທັງນັ້ນ, ລາຄານໍ້າມັນທີ່ເໜັງຕີງກໍ່ຂຶ້ນກັບປັດໄຈພາຍນອກເປັນສຳຄັນ.

ໂດຍທ່ານ ຄຳແພງ ໄຊສົມແພງ ລັດຖະມົນຕີກະຊວງ ອຸດສາຫະກຳ ແລະ ການຄ້າ ໄດ້ໃຫ້ສຳພາດຕໍ່ສື່ເມື່ອວັນທີ 13 ມີນາ 2022 ທີ່ນະຄອນຫຼວງວຽງຈັນ ວ່າ”ນອກຈາກການປັບປ່ຽນໄລຍະເວລາດັດປັບລາຄານໍ້າມັນເຊື່ອໄຟແລ້ວ, ລັດຖະບານກໍ່ພວມເລັ່ງຄົ້ນຄວ້າກ່ຽວກັບການຫຼຸດກອງທຶນບູລະນະທາງຫຼວງ (ກອງທຶນທາງ), ການກຳນົດວິທີການຈັດເກັບລາຍຮັບດ້ານພັນທະພາສີ, ອາກອນເປັນອັນສະເພາະໃນໄລຍະທີ່ລາຄານໍ້າມັນເຊື້ອໄຟປັບຂຶ້ນເພື່ອເຮັດໃຫ້ການປັບຂຶ້ນລາຄານໍ້າມັນເຊື້ອໄຟເປັນລະບົບ ຫຼື ບໍ່ປັບຂຶ້ນແບບກ້າວກະໂດດ.

ຢ່າງໃດກໍຕາມ, ນໍ້າມັນເຊື້ອໄຟກໍ່ເປັນສິນຄ້ານຳເຂົ້າຕົ້ນຕໍຂອງລາວເຮົາ, ຊຶ່ງໃນໄລຍະ 2 ປີ ຜ່ານມາມູນຄ່ານຳເຂົ້ານໍ້າມັນແມ່ນສູງເຖິງ 5 ຕື້ກວ່າໂດລາສະຫະລັດ ຫຼື ເທົ່າກັບ 10% ຂອງມູນຄ່ານຳເຂົ້າທັງໝົດ ແລະຍັງມີທ່າອ່ຽງເພີ່ມຂຶ້ນທຸກປີ. ເມື່ອມີການນຳເຂົ້າຫຼາຍ, ກໍຍິ່ງຕ້ອງໃຊ້ເງິນຕາຕ່າງປະເທດຫຼາຍຂຶ້ນຈຶ່ງເປັນສາເຫດໃຫ້ເງິນກີບອ່ອນຄ່າ ແລະ ນັ້ນກໍເປັນສາເຫດທີ່ເຮັດໃຫ້ລາຄານໍ້າມັນເຊື້ອໄຟແພງ, ອີກທັງການຈ່າຍພັນທະພາສີ, ອາກອນຕ່າງໆ ກໍເປັນໜຶ່ງໃນປັດໄຈດ້ານລາຄາເຊັ່ນກັນ.

ຕໍ່ບັນຫາດັ່ງກ່າວ, ກະຊວງອຸດສາຫະກຳ ແລະ ການຄ້າ, ກໍ່ໄດ້ມີການຈັດປະຊຸມຮ່ວມກັບຫຼາຍຂະແໜງການຂອງພາກລັດ ແລະ ບັນດາບໍລິສັດທຸລະກິດນໍ້າມັນເຊື້ອໄຟ ເພື່ອປຶກສາຫາລືເລື່ອງການປັບປຸງໂຄງສ້າງລາຄານໍ້າມັນເຊື້ອໄຟ ແລະ ການຄຸ້ມຄອງລາຄາສິນຄ້າໃນໄລຍະທີ່ຕ້ອງມີການປັບຂຶ້ນລາຄານໍ້າມັນ.

 

แชร์