ເຄື່ອນໄຫວສົ່ງຢາບ້າພາຊາຍໄວ 16 ຈົນມູມ

ທ້າວ ລັດສະໝີ ໃນໄວພຽງ 16 ປິ ຖືກເຈົ້າໜ້າທີ່ຈັບໄດ້ໃນຂະນະຂັບລົດກະບະໂຕໂຍຕາວີໂກສີປອນ, ມາແຕ່ທາງບ້ານສາລາຄຳ ມຸ່ງໜ້າໄປທາງບ້ານນາໄຫ, ເມືອງຫາດຊາຍຟອງ, ນະຄອນຫຼວງວຽງຈັນ.

ລາຍງານຂ່າວຂອງກຳລັງ ປກສ, ອ້າງການເປີດເຜີຍໂດຍ ພັທ ທັດສະພົງ ຫວັນມະນີຈັນ, ຮອງຫົວໜ້າກອງບັນຊາການ ປກສ ເມືອງຫາດຊາຍຟອງ ຊຶ່ງໃຫ້ຮູ້ວ່າປະຕິບັດການຄັ້ງນີ້ມີຂຶ້ນເມື່ອເວລາ 11:00 ໂມງຂອງວັນທີ 2 ມີນາ 2022, ພາຍຫຼັງສືບຮູ້ການເຄື່ອນໄຫວຂອງເປົ້າໝາຍຢາເສບຕິດ. ໂດຍຕຳຫຼວດໜ່ວຍງານວິຊາສະເພາະ ປກສ ເມືອງ, ໄດ້ສັ່ງຢຸດ ແລະກວດຄົ້ນລົດກະບະວີໂກ ພົບຢາບ້າ 20.008 ເມັດ, ຢາໄອສ໌1 ຖົງນ້ອຍ, ປືນສັ້ນ 1 ກະບອກພ້ອມກະສຸນ 3 ລູກ ແລະ ກັກຕົວທ້າວລັດສະໝີ (ລັດ) ອາຍຸ16 ປີ, ຫວ່າງງານ, ຢູ່ບ້ານປາກທ້າງ, ເມືອງສີໂຄດຕະບອງ, ນະຄອນຫຼວງວຽງຈັນ.

ໂດຍເຈົ້າໜ້າທີ່ໄດ້ນຳຕົວຜູ້ຖືກຫາມາສອບສວນ ແລະຜູ້ກ່ຽວກໍ່ຊັດທອດເຖິງຜູ້ຮ່ວມຂະບວນການ, ຊຶ່ງມາຮອດເວລາ 12:10 ໂມງຂອງວັນດຽວກັນ, ຕຳຫຼວດກໍ່ສາມາດກັກຕົວທ້າວ ວໍລະກອນ (ແຊັມ) ອາຍຸ 22 ປີ, ຫວ່າງງານ, ຢູ່ບ້ານໜອງແຕ່ງ, ເມືອງສີໂຄດຕະບອງ. ໄດ້ຢູ່ປໍ້ານໍ້າມັນແຫ່ງໜຶ່ງ ແລະ ມາຮອດເວລາ 14:00 ໂມງຂອງວັນດຽວກັນນັ້ນ, ຕຳຫຼວດກໍ່ໄດ້ເຂົ້າກັກຕົວທ້າວ ວິລະກອນ (ໃຫຍ່) ອາຍຸ 21 ປີ, ຫວ່າງງານ, ຢູ່ບ້ານໜອງດ້ວງເໜືອ, ເມືອງສີໂຄດຕະບອງ, ນະຄອນຫຼວງວຽງຈັນ.

ສຳລັບຄະດີນີ້, ຍັງຢູ່ລະຫວ່າງການສອບສວນຂະຫຍາຍຜົນຫາກຸ່ມແກ້ງຮ່ວມຂະບວນການ.

แชร์