ມອບລາງວັນຂຽນຂ່າວປະກອບພາບນິ້ງ ແລະ ວີດີໂອ ຫົວຂໍ້ “ສົ່ງເສີມການພົວພັນຮ່ວມມືລາວ-ຈີນ”

ເມື່ອວັນທີ 11 ມີນາ 2022, ສະມາຄົມນັກຂ່າວແຫ່ງ ສປປ ລາວ ຮ່ວມກັບ ວິທະຍຸສາກົນ ແຫ່ງປະເທດຈີນ (CRI) ປະຈຳລາວ, ໄດ້ຈັດພິທີມອບລາງວັນການແຂ່ງຂັນຂຽນຂ່າວອອນໄລນ໌ ປະກອບພາບນິ້ງ ແລະຂ່າວພາບວີດີໂອໃນຫົວຂໍ້ “ສົ່ງເສີມການພົວພັນຮ່ວມມື ລາວ-ຈີນ” ເປັນຕົ້ນແມ່ນໂຄງການລົດໄຟລາວ-ຈີນ, ທາງດ່ວນລາວ-ຈີນ, ການຮ່ວມມືຕ້ານໂຄວິດ-19, ການລົງທຶນຂອງຈີນຢູ່ລາວ, ການສ້າງບຸກຄະລາກອນ ແລະອື່ນໆ, ຕາງໜ້າມອບລາງວັນຄັ້ງນີ້ໂດຍທ່ານ ສະຫວັນຄອນ ຣາຊມຸນຕີຣ ປະທານສະມາຄົມນັກຂ່າວແຫ່ງ ສປປ ລາວ, ທ່ານ ນາງ ແສງແກ້ວ (MOXiaoLing) ຫົວໜ້າວິທະຍຸສາກົນແຫ່ງ ປະເທດຈີນ ປະຈຳລາວ ແລະ ທ່ານ ສູນ ທອນ ຄັນທະວົງ ຮອງປະທານສະມາຄົມນັກຂ່າວ ແຫ່ງ ສປປ ລາວ.

ລາງວັນຊະນະເລີດ ປະເພດຂ່າວອອນ ໄລນ໌ປະກອບພາບນິ້ງໄດ້ແກ່ ທ່ານ ແສງຕາເວັນ (Delin Xu) ນັກຂ່າວຈາກວິທະຍຸສາກົນແຫ່ງປະເທດຈີນ (CRI) ໃນຫົວຂໍ້ຂ່າວ “ເຖິງພູສູງຊັນ, ຫົນທາງຈະຍາວໄກແຕ່ບໍ່ໄດ້ເປັນອຸປະສັກກີດຂວາງອີກແລ້ວ”, ລາງວັນທີ 2 ໄດ້ແກ່ ທ່ານ ວິໄລ ມະນີລັດ ຈາກສຳນັກຂ່າວສານປະເທດລາວໃນຫົວຂໍ້ “ລົດໄຟ ລາວ-ຈີນພິກສະຖານະພາບໃຫ້ ສປປ ລາວ ຈາກ Lank Lock ສູ່ Lank Link” ແລະ ທ່ານ ສົມລິດ ວັນນະພົງຄຳ ຈາກໜັງສືພິມປະຊາຊົນໃນຫົວຂໍ້ “ຈີນພັດທະນາເຂື່ອນນໍ້າອູຕາມທິດສີຂຽວ, ເປັນມິດຕໍ່ສິ່ງແວດລ້ອມ, ປະຊາຊົນມີການເປັນຢູ່ທີ່ດີ”. ສຳລັບລາງວັນທີ 3 ໄດ້ແກ່ ທ່ານ ສອນປະເສີດ ສີລິວົງ ນັກຂ່າວຈາກ CRI (ລົດໄຟລາວ-ຈີນໃຫ້ປະໂຫຍດຫຍັງແດ່ໃນໄລຍະການກໍ່ສ້າງ ແລະ ຫຼັງເປີດບໍລິການ), ທ່ານ ສຸກສາຄອນ ສິມມາລາວົງ ຈາກໜັງສືພິມປະຊາຊົນ (ໂຄງການທາງລົດໄຟ ລາວ-ຈີນ ແມ່ນຄຸ້ມຄ່າທີ່ສຸດເມື່ອເບິ່ງຜົນປະໂຫຍດທີ່ໄດ້ຮັບ), ທ່ານ ມີ ພູນໄຊ ຈາກວາລະສານໂຄສະນາອົບຮົມສູນກາງພັກ (ຈີນຊ່ວຍລາວຕ້ານ ໂຄວິດ), ທ່ານ ນາງ ມະນີທອນ ແກ້ວລັງສີ ຈາກສຳນັກຂ່າວສານປະເທດລາວ (ລົດໄຟລາວ-ຈີນ ຕົວຂັບເຄື່ອນເສດຖະກິດ-ສັງຄົມລາວ ສູ່ການພັດທະນາທີ່ເຂັ້ມແຂງ) ແລະ ທ່ານນາງ ສົມຈັນ ບົວພາ ຈາກໜັງສືພິມປະຊາຊົນວັນອາທິດ (ເສັ້ນທາງສ້າງຄວາມຮັ່ງມີນຳຄວາມຈະເລີນກ້າວໜ້າມາສູ່ປະຊາຊົນລາວ).

ສ່ວນປະເພດຂ່າວພາບວີດີໂອລາງວັນຊະນະເລີດໄດ້ແກ່ ທ່ານ ພູສີລັດ ເພັງສະຫວັດ ຈາກໂທລະພາບແຫ່ງຊາດລາວ (ລົດໄຟ ລາວ-ຈີນ ກະຕຸ້ນການທ່ອງທ່ຽວ), ລາງວັນທີ 2 ໄດ້ແກ່ທ່ານ ວັນຊະນະ ບຸດດາວົງ ນັກຂ່າວຈາກ CRI (ທາງລົດໄຟ ລາວ-ຈີນ ເລີ່ມກວດ ກາເທຄນິຄເຄື່ອນທີ່) ແລະ ລາງວັນທີ 3 ໄດ້ແກ່ ທ່ານ ນາງ ບໍ່ຄຳ ແສງມະນີ ນັກຂ່າວຈາກ CRI (ສົ່ງເສີມການພົວພັນຮ່ວມມືລາວ-ຈີນ).

ກິດຈະກຳການແຂ່ງຂັນຂຽນຂ່າວອອນໄລນ໌ປະກອບພາບນິ້ງ ແລະ ຂ່າວພາບວີດີໂອ, ໄດ້ເລີ່ມມາແຕ່ທ້າຍເດືອນສິງຫາ 2021 ຮອດ 15 ທັນວາ 2021 ໂດຍມີຜູ້ສົ່ງຂ່າວເຂົ້າຮ່ວມແຂ່ງຂັນ ທັງໝົດ 75 ຂ່າວ. ໃນນັ້ນ, ເປັນຂ່າວພາບວີດີໂອ 15 ເລື່ອງ ແລະ ຂ່າວອອນໄລນ໌ ປະກອບພາບນິ້ງ 60 ຂ່າວ. ຈາກການປະເມີນຜົນ ແລະ ຕີລາຄາປະເພດຂ່າວ ອອນໄລນ໌ປະກອບພາບນິ້ງ ແລະຂ່າວພາບວີດີໂອທີ່ສົ່ງເຂົ້າແຂ່ງຂັນ, ໂດຍຄະນະກຳມະການໄດ້ເລືອກເອົາແຕ່ບົດ-ຂ່າວທີ່ໄດ້ມາດຕະຖານມາຈັດປະເພດ, ຊຶ່ງອີງໃສ່ມາດຕະຖານຖືກຕ້ອງຕາມຫົວຂໍ້ແຂ່ງຂັນທີ່ກຳນົດໄວ້ຄື: ຂຽນຖືກຕ້ອງຕາມຫຼັກການຂອງການຂຽນຂ່າວ, ມີຮູບພາບປະກອບຕາມແຈ້ງການ, ເນື້ອ ໃນຄົບຖ້ວນ, ມີການສຳພາດ 2 ຄົນຂຶ້ນໄປ, ນຳໃຊ້ຫຼັກການຂຽນພາສາລາວຖືກຕ້ອງ, ຫົວຂໍ້, ເນື້ອໃນ ແລະຮູບພາບຖືກຕ້ອງ, ມີທີ່ມາຂອງຜູ້ຂຽນ ແລະສົ່ງຂ່າວທັນຕາມກຳນົດເວລາ.

แชร์