ນາຍົກລັດຖະມົນຕີ ຕ້ອນຮັບອາສາສະໝັກຍີ່ປຸ່ນ

ເມື່ອວັນທີ 10 ມີນາ 2022 ທີ່ສຳນັກງານນາຍົກລັດຖະມົນຕີ, ທ່ານ ພັນຄໍາ ວິພາວັນ ນາຍົກລັດຖະມົນຕີ ແຫ່ງ ສປປ ລາວ, ໄດ້ຕ້ອນຮັບອາສະໝັກຍີ່ປຸ່ນ. ຮ່ວມໃນພິທີຄັ້ງນີ້ ມີທ່ານ ຈຸນໂກ ນາກາໂນ (Junko NAKANO) ອຸປະທູດຢີ່ປຸ່ນ ປະຈຳ ສປປ ລາວ, ທ່ານ ໂຕຊິໂອ ນາກາເຊ (Toshio NAGASE) ຫົວໜ້າອົງການຮ່ວມມືສາກົນຍີ່ປຸ່ນ (JICA), ທ່ານ ໂພໄຊ ໄຂຄຳພິທູນ ຮອງລັດຖະມົນຕີກະຊວງການຕ່າງປະເທດ, ພ້ອມດ້ວຍອາສາສະໝັກຍີ່ປຸ່ນ ແລະພາກສ່ວນກ່ຽວຂ້ອງ.


ທ່ານ ວັນເພັງ ແສງມະໂນທອງ ຮອງຫົວໜ້າກົມຮ່ວມມືສາກົນ, ກະຊວງແຜນການ ແລະ ການລົງທຶນ ຜູ້ນໍາພາອາສາສະໝັກຍີ່ປຸ່ນໃນຄັ້ງນີ້, ໄດ້ລາຍງານໃຫ້ທ່ານນາຍົກຊາບວ່າ: ນັບແຕ່ປີ 2002 ເປັນຕົ້ນມາ, ພາຍຫຼັງທີ່ອາສາສະໝັກຍີ່ປຸ່ນຊຶ່ງປະຕິບັດໜ້າທີ່ຢູ່ ສປປ ລາວ ແຕ່ລະປີໄດ້ຈັດປະຊຸມຖອດຖອນບົດຮຽນປະຈຳ ປີແລ້ວ, ກໍໄດ້ຖືໂອກາດດັ່ງກ່າວເຂົ້າຢ້ຽມຂໍ່ານັບທ່ານນາຍົກລັດຖະມົນຕີ, ຊຶ່ງສະແດງເຖິງຄວາມເອົາໃຈໃສ່ ແລະໃຫ້ຄວາມສໍາຄັນຂອງລັດຖະບານລາວຕໍ່ອາສາສະໝັກຍີ່ປຸ່ນ ແລະ ການຊ່ວຍເຫຼືອຂອງລັດຖະບານຍີ່ປຸ່ນ. ສິ່ງສຳຄັນແມ່ນໃນໄລຍະທີ່ຜ່ານມາ, ລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອແກ່ ສປປ ລາວ ທັງການຊ່ວຍເຫຼືອລ້າ ແລະການກູ້ຢືມ. ນອກນັ້ນ, ຍີ່ປຸ່ນຍັງໃຫ້ການຊ່ວຍເຫຼືອໃນຮູບແບບອື່ນໆເຊັ່ນ: ການສົ່ງອາສາສະໝັກມາປະຕິບັດໜ້າທີ່ຢູ່ຕາມຂະແໜງການ ແລະທ້ອງຖິ່ນເກືອບທຸກແຂວງ ໃນທົ່ວປະເທດ, ການຊວ່ຍເຫຼືອຮູບແບບດັ່ງກ່າວຖືເປັນການຊ່ວຍເຫຼືອທີ່ສຳຄັນຕໍ່ດ້ານວິຊາການ ແລະການຖ່າຍທອດຄວາມຮູ້,ຄວາມສາມາດ ແລະເທຄໂນໂລຢີໃຫ້ແກ່ຂະແໜງການ ແລະ ທ້ອງຖິ່ນຊົນນະບົດຊຶ່ງເປັນການປະກອບສ່ວນເຂົ້າໃນການສ້າງສາ ແລະ ພັດທະນາເສດຖະກິດ-ສັງຄົມຂອງ ສປປ ລາວ ໃນແຕ່ລະໄລຍະ. ການສົ່ງອາສາສະໝັກ ມາປະຕິບັດໜ້າທີ່ກໍໄດ້ມີການພັດທະນາ ເປັນລຳດັບຕໍ່ເນື່ອງເຊັ່ນ: ໃນປີ 1965 ມີອາສາສະໝັກພຽງແຕ່ 5 ຄົນ, ໃນເວລາ ນັ້ນປະເທດລາວ ເປັນໜຶ່ງໃນ 4 ປະເທດ ທຳອິດທີ່ລັດຖະບານຍີ່ປຸ່ນໄດ້ສົ່ງອາສາສະໝັກຂອງຕົນມາປະຕິບັດວຽກງານ. ມາຮອດປັດຈຸບັນ ອາສາສະໝັກຍີ່ປຸ່ນ ທີ່ມາປະຕິບັດໜ້າທີ່ຢູ່ ສປປ ລາວ ລວມ ທັງໝົດມີ 1.041 ຄົນ, ສະເພາະປີ 2022 ນີ້ມີອາສາສະໝັກອາວຸໂສ ແລະອາສາສະໝັກໜຸ່ມ ຈໍານວນ 20 ຄົນ ທີ່ປະ ຈໍາຢູ່ຂະແໜງການຕ່າງໆເຊັ່ນ: ສຶກສາ ທິການ ແລະກີລາ, ສາທາລະນະສຸກ, ກະສິກຳ-ປ່າໄມ້, ພັດທະນາຊົນນະບົດ ແລະຂົງເຂດອື່ນໆ.


ໂອກາດນີ້, ທ່ານ ພັນຄຳ ວິພາວັນ ກໍໄດ້ສະແດງຄວາມຂອບໃຈ ແລະ ຊົມເຊີຍຕໍ່ບັນດາອາສາສະໝັກທີ່ມາຊ່ວຍເຫຼືອເຮັດວຽກຢູ່ ສປປ ລາວ ຊຶ່ງລ້ວນເປັນຜູ້ທີ່ມີຄວາມອົດທົນ ແລະ ເສຍສະຫຼະສູງ, ເຖິງແມ່ນວ່າປະຊາຊົນທັງສອງຊາດ ຈະມີວິຖີການດຳລົງຊີວິດ ແລະ ຮີດ ຄອງປະເພນີແຕກຕ່າງກັນ; ແຕ່ອາສາສະໝັກກໍເລືອກຈະທີ່ມາເຮັດວຽກຢູ່ ສປປ ລາວ ແລະ ຍັງສະໝັກໄປເຮັດ ວຽກຢູ່ທ້ອງຖິ່ນຊົນ ນະບົດຫ່າງໄກສອກ ຫຼີກ ແລະ ໄດ້ກິ້ງເກືອກລີເລືອກັບພະນັກງານຢ່າງບໍ່ຮູ້ອິດຮູ້ເມື່ອຍ. ພ້ອມນີ້, ທ່ານນາຍົກລັດຖະມົນຕີກໍໄດ້ສະແດງຄວາມຂອບໃຈ ແລະຮູ້ບຸນຄຸນຕໍ່ການຊ່ວຍ ເຫຼືອອັນລໍ້າຄ່າຂອງລັດຖະບານ ແລະປະຊາຊົນຍີ່ປຸ່ນ. ຊຶ່ງການຊ່ວຍເຫຼືອດັ່ງກ່າວ, ແມ່ນຢູ່ໃນອັນດັບໜຶ່ງຂອງການຊ່ວຍເຫຼືອຮ່ວມມື 2 ຝ່າຍ ຂອງບັນດາຄູ່ຮ່ວມພັດທະນາ ແລະໄດ້ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ເປັນແຕ່ລະໄລຍະ.

แชร์