ເຜີຍຜົນງານໂຮງໝໍມິດຕະພາບ ໃນປີຜ່ານມາ

ນອກຈາກຊື່ສຽງອັນເປັນທີ່ຍອມຮັບດ້ານການປິ່ນປົວຜູ້ບາດເຈັບຈາກອຸບັດເຫດກະທົບກະດູກ ແລະພະຍາດອື່ນໆແລ້ວ, ໂຮງໝໍມິດຕະພາບຍັງໄດ້ຮັບຄວາມໄວ້ວາງໃຈຈາກລັດຖະບານກໍຄືຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງເຊື້ອພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ 2019 (ໂຄ ວິດ-19) ໂດຍໃຫ້ເປັນບ່ອນຮອງຮັບປິ່ນປົວຜູ້ຕິດເຊື້ອທີ່ມີອາການປານກາງແລະ ກໍລະນີໜັກຫຼາຍ, ເປັນບ່ອນກັ່ນກອງ, ຊອກຄົ້ນ ແລະ ຮັບສົ່ງຄົນເຈັບປິ່ນປົວ.

ເມື່ອວັນທີ 9 ມີນາ 2022, ໂຮງໝໍມິດຕະພາບ ນະຄອນຫຼວງວຽງຈັນ ໄດ້ຈັດກອງປະຊຸມສະຫຼຸບຕີລາຄາປະເມີນຜົນການຈັດຕັ້ງປະຕິບັດແຜນພັດທະນາໂຮງໝໍປະຈໍາປີ 2021 ແລະຜ່ານທິດທາງແຜນການປີ 2022. ໂດຍການເຂົ້າຮ່ວມເປັນປະທານຂອງ ທ່ານ ບຸນແຝງ ພູມມະໄລສິດ ກໍາມະການສູນກາງພັກ, ເລຂາຄະນະພັກກະຊວງລັດຖະມົນຕີກະຊວງສາທາລະນະສຸກ, ຊຶ່ງມີຄະນະອໍານວຍການໂຮງໝໍສູນກາງອ້ອມຂ້າງກະຊວງ, ຫົວໜ້າພະແນກ, ຄະນະພະແນກ, ພະນັກງານແພດໝໍ ແລະວິຊາການພາຍໃນໂຮງໝໍເຂົ້າຮ່ວມ.

ທ່ານ ສອນໄຊ ລາດຊະວົງ ຜູ້ອໍານວຍການໂຮງໝໍມິດຕະພາບ, ໄດ້ລາຍ ງານການເຄື່ອນໄຫວຂອງໂຮງໝໍມິດຕະພາບໃນ 1 ປີທີ່ ຜ່ານມາຊຶ່ງສະແດງອອກເຖິງການຊີ້ນໍາ-ນຳພາຂອງຄະນະນຳ ແລະພະນັກງານແພດໝໍ ຊຶ່ງໄດ້ພ້ອມກັນຜ່ານຜ່າເຮັດໜ້າທີ່ການເມືອງ ແລະໜ້າທີ່ວິຊາສະເພາະຂອງຕົນຕາມການມອບໝາຍຂອງການຈັດຕັ້ງ. ຊຶ່ງໃນ 1 ປີ ຜ່ານມາ, ສາມາດກວດ ແລະປິ່ນປົວຄົນເຈັບຢູ່ຫ້ອງກວດເຂດນອກໄດ້ 125.234 ເທື່ອຄົນ ຍິງ 67.187 ເທື່ອຄົນ, ກວດເຂດນອກໂຮງໝໍພາກ ຂະຫຍາຍ 34.473 ເທື່ອຄົນ ຍິງ 19.962 ເທື່ອຄົນ, ຮັບຄົນເຈັບສຸກ ເສີນ 39.083 ຄົນ ຍິງ 17.785 ຄົນ (ໃນນັ້ນອຸບັດເຫດທ້ອງຖະໜົນ 8.542 ກໍລະນີ ຍິງ 2.743 ກໍລະນີ). ຮັບຄົນເຈັບເຂົ້ານອນ 16.757 ຄົນ ຍິງ 7.771 ຄົນ. ເດັກເກີດໃໝ່ 1.458 ຄົນ ຍິງ 728 ຄົນ (ໃນນັ້ນຄົນເຈັບເກີດລູກທາງຊ່ອງຄອດທີ່ຕິດເຊື້ອໂຄວິດ-19 ມີ 22 ກໍລະນີ), ຜ່າຕັດທັງໝົດ 7.461 ກໍລະນີ (ໃນນັ້ນໄດ້ຜ່າຕັດຄົນເຈັບທີ່ຕິດເຊື້ອໂຄວິດ-19 ມີ 22 ກໍລະນີ), ຟອກໄຂ່ຫຼັງ5.145 ເທື່ອຄົນ (ໃນນັ້ນໄດ້ຟອກໄຂ່ຫຼັງໃຫ້ຄົນເຈັບທີ່ຕິດເຊື້ອໂຄວິດ-19 ມີ 50 ເທື່ອກໍລະນີ), ອັດຕາການໝູນໃຊ້ຕຽງ 96,68%, ຄົນ ເຈັບສາຍແສງປິ່ນປົວມະເຮັງ 6.805 ເທື່ອຄົນ.

ໄດ້ເກັບຕົວຢ່າງສັ່ງກວດຫາເຊື້ອ ໂຄວິດ 19.164 ກໍລະນີ, ເຂົ້ານອນ ປິ່ນປົວ 984 ກໍລະນີ ຍິງ 524 ກໍລະນີ (ໃນນັ້ນເປັນເດັກ 80 ກໍລະນີ ແລະຄົນຕ່າງປະເທດ 34 ກໍລະນີ), ປິ່ນປົວດີ ແລະ ອອກໂຮງໝໍໄດ້ 778 ກໍລະນີ, ຍິງ 419 ກໍລະນີ, ເສຍຊີວິດ 93 ກໍລະນີ ຍິງ 46 ກໍລະນີ ແລະ ໄດ້ນໍາໃຊ້ໂຮງ ໝໍໃໝ່ພາກຂະຫຍາຍເປັນສູນປິ່ນປົວ ຄົນເຈັບທີ່ເປັນພະຍາດໂຄວິດ-19 ແລະ ໂຮງໝໍກໍ່ໄດ້ເປີດກວ້າງໃນການສັກວັຄ ຊີນປ້ອງກັນພະຍາດໂຄວິດ-19 ຊຶ່ງມີ ຜູ້ມາຮັບສັກວັກຊີນທັງໝົດ 108.452 ຄົນ (ໃນນັ້ນເຂັມ1 ໄດ້ 52.304 ຄົນ, ເຂັ້ມ 2 ໄດ້ 47.348 ຄົນ ແລະ ເຂັມ 3 ໄດ້8.800 ຄົນ).

ໃນ 1 ປີມານີ້ ໄດ້ປະຕິບັດນະໂຍບາຍວຽກງານປະກັນສຸຂະພາບຊຶ່ງມີຜູ້ປະກັນຕົນເຂົ້າຮັບບໍລິການທັງໝົດ 52.697 ຄົນ ແລະ ໄດ້ປະຕິບັດນະໂຍບາຍການປິ່ນປົວໂດຍບໍ່ເສຍຄ່າແກ່ ຜູ້ທຸກຍາກອະນາຖາ, ນັກບວດ, ນັກ ຮຽນ-ນັກສຶກສາ ແລະ ນະໂຍບາຍຫຼຸດ ຄ່າຟອກເລືອດໃຫ້ຄົນເຈັບຜູ້ທຸກຍາກ ຊຶ່ງຄິດໄລ່ເປັນເງິນນະໂຍບາຍທັງໝົດ 480.096.638 ກີບ. ພ້ອມນັ້ນ, ໂຮງໝໍມິດຕະພາບຍັງໄດ້ເຮັດໜ້າທີ່ໂຄສະນາສຸຂະສຶກສາ, ໂພຊະນາການ, ກວດສຸຂະພາບແມ່ ແລະ ເດັກ, ສັກຢາກັນພະຍາດ, ສິດສອນນັກສຶກສາແພດ-ພະຍາບານ, ບຳລຸງສ້າງພະນັກງານ,ຄົ້ນຄວ້າວິທະຍາສາດ ແລະພົວພັນຮ່ວມມືດ້ານວິຊາການກັບຄະນະແພດຈາກຕ່າງປະເທດເພື່ອພັດທະນາໂຮງໝໍ. ຄຽງຄູ່ກັນນັ້ນ, ໂຮງໝໍຍັງໄດ້ຖືສຳຄັນການສຶກສາອົບຮົມແນວຄິດຂອງພະນັກງານ, ຈັນຍາບັນແພດ, ຈັນຍາບັນພະຍາບານ, ໄດ້ປຸກລະດົມຂະບວນການ ແຂ່ງຂັນຮັກຊາດ-ພັດທະນາ, ປະຕິບັດ ວິໄສທັດຂອງໂຮງໝໍ ແລະນະໂຍບາຍ 5 ດີ 1 ພໍໃຈ ທີ່ກະຊວງສາທາລະນະສຸກວາງອອກເຂົ້າໃນວຽກງານຕົວຈິງ.

ໃນພິທີຍັງໄດ້ມີການມອບໃບຍ້ອງຍໍຂອງກະຊວງສາທາລະນະສຸກໃຫ້ພະແນກດີເດັ່ນ: ປະເພດ I, II, III ແລະ ບຸກຄົນດີເດັ່ນ: ປະເພດ I, II, III ແລະ ໄດ້ຮັບຟັງການໂອ້ລົມຂອງລັດຖະມົນຕີກະຊວງສາທາລະນະສຸກ, ຊຶ່ງທ່ານໄດ້ໃຫ້ທິດຊີ້ນຳຄະນະອຳນວຍການ ແລະພະນັກງານແພດໝໍທຸກຄົນເອົາໃຈໃສ່ການຈັດຕັ້ງປະຕິບັດແຜນງານສາທາລະນະສຸກ, ການຫັນໂຮງໝໍໃຫ້ກຸ້ມຕົນເອງ, ໂດຍສະເພາະແມ່ນວຽກພັດທະນາການບໍລິການຂອງໂຮງໝໍໃຫ້ດີຂຶ້ນ ແລະເປັນທີ່ຍອມຮັບຂອງສັງຄົມ.

 

แชร์