ວິກິດຢູເຄຣນ ດຶງລາຄານໍ້າມັນປັ່ນປ່ວນ ເງິນເຟີ້ ຫຸ້ນຕົກ

ມີສັນຍານທີ່ດີອອກມາບໍ່ເຖິງ 24 ຊົ່ວໂມງຈາກມື້ວານນີ້, ຫຼັງຈາກທີ່ມີຂ່າວວ່າ ຢູເຄຣນ ແລະ ຣັສເຊຍ ຍັງຄົງມີແຜນເຈລະຈາຕໍ່ເນື່ອງເພື່ອຢຸດຕິຄວາມຂັດແຍ່ງ. ຢ່າງໃດກໍຕາມ ຜ່ານການເຈລະຈາທີ່ປະເທດຕຸຣະກີ ຊຶ່ງບໍ່ມີຄວາມຄືບໜ້າກໍເຮັດໃຫ້ຕະຫຼາດໂລກສັ່ນຄອນ, ຊ້ຳເຕີມສະຖານະການເງິນເຟີ້ເຮັດໃຫ້ຫຸ້ນຕົກ ສ່ວນລາຄານ້ຳມັນໂລກກໍຍັງຄົງຜັນຜວນ.

ສະພາວະຕຶງຄຽດລະຫວ່າງຣັສເຊຍ ກັບ ຢູເຄຣນ ຍັງສົ່ງຜົນກະທົບຕໍ່ຕະຫຼາດໂລກຢ່າງຕໍ່ເນືອງ,ບວກກັບຕົວເລກເງິນເຟີ້ໃນອະເມຣິກາເມື່ອເດືອນກຸມພາຜ່ານມາທີ່ພຸ່ງສູງເຖິງ 7,9% ສ້າງສະຖິຕິສູງສຸດໃນຮອບ 40 ປີ,ສົ່ງຜົນໃຫ້ທະນາແຫ່ງຊາດສະຫະລັດ(ເຟດ)ຈະປະກາດຂຶ້ນອັດຕາດອກເບ້ຍຫຼັງການປະຊຸມໃນອາທິດໜ້າຂ້ອນຂ້າງຈະແນ່ນອນ.ຂະນະທີ່ທະນາຄານກາງ ຢຸໂຣປ(ອີຊີບີ)ກໍ່ກຽມທີ່ຈະຢຸດການອັດສີດເງິນເຂົ້າສູ່ລະບົບເສດຖະກິດເພື່ອແກ້ບັນຫາເງິນເຟີ້ເຊັ່ນກັນ.

ລາຍງານຂ່າວຕ່າງປະເທດໃນວັນທີ 11 ມີນາ 2022 ລະບຸວ່າ ສະຖານະການທີ່ຍົກມາສົ່ງຜົນໃຫ້ຕະຫຼາດຫຸ້ນສະຫະລັດປັບຕົວຫຼຸດລົງທັງໝົດ,ບໍ່ວ່າຈະເປັນດັດຊະນີອຸດສາຫະກຳດາວໂຈນສ໌ ແລະ ເອສແອນດ໌ພີ 500, ລວມເຖິງແນສແດຄ.

ສ່ວນຕະຫຼາດຫຸ້ນເອເຊຍທີ່ເປີດຕະຫຼາດໃນເຊົ້າວັນທີ11ມີນາ ກໍ່ປັບຕົວຫຼຸດລົງເຊັ່ນກັນ,ນັບຕັ້ງແຕ່ດັດຊະນີເອັມເອສຊີໄອ ດັດຊະນີຫຸ້ນເອເຊຍແປຊິຟິກນອກປະເທດຍີ່ປຸ່ນ,ດັດຊະນີຮ່ອງກົງ ຮັ່ງເສັງ.ເຊັ່ນດຽວກັບນິຄເຄອິ 225 ຂອງຍີ່ປຸ່ນ ແລະ ຕະຫຼາດຊີເອສໄອຂອງຈີນ.

ດ້ານລາຄານ້ຳມັນໂລກກໍຍັງຄົງມີຄວາມຜັນຜວນ ຫຼັງຈາກສະຫະລັດອາຣັບເອມິເຣຕສ໌,ອອກມາປະຕິເສດຖະແຫຼງການທີ່ລະບຸວ່າຈະຊຸກຍູ້ໃຫ້ອົງການກຸ່ມປະເທດຜູ້ສົ່ງນ້ຳມັນອອກ(ໂອເປຄ)ເພີ່ມກຳລັງການຜະລິດນ້ຳມັນເຊື້ອໄຟເພື່ອທົດແທນການຂວ້ຳບາດຂອງຊາດຕາເວັນຕົກຕໍ່ການສົ່ງອອກນ້ຳມັນຣັສເຊຍ.ຊຶ່ງນັ້ນກໍສົ່ງຜົນໃຫ້ນ້ຳມັນດິບເວສຕ໌ເທ໊ກຊັສ ສະຫະລັດອະເມຣິກາ ປັບຕົວລົງ 0,4% ມາຢູ່ທີ່ 105,6 ໂດລາຕໍ່ບາຣ໌ເຣລ,ຂະນະທີ່ລາຄານ້ຳມັນດິບເບຣນດ໌ ກໍ່ປັບຕົວລົງ 1% ມາຢູ່ທີ່ 108,15 ໂດລາຕໍ່ບາຣ໌ເຣລ.ທາງດ້ານສິນຊັບປອດໄພຢ່າງອັນຍະມະນີແຮ່ຄຳໃນຕະຫຼາດໂລກວັນນີ້,ກໍ່ຊື້-ຂາຍກັນຢູ່ທີ່ 1.995,65 ໂດລາສະຫະລັດຕໍ່ອອນຊ໌.

 

แชร์