ພັດທະນາສື່ໃຫ້ເປັນທັນສະໄໝ

“ສື່ທັນສະໄໝໝາຍເຖິງສື່ທີ່ມີຄຸນນະພາບ  ແລະ ມາດຕະຖານ,ການນຳສະເໜີຂອງສື່ມວນຊົນຈະຕ້ອງຄິດເຖິງຜົນປະໂຫຍດທີ່ສັງຄົມ ແລະ ປະເທດຊາດຈະໄດ້ຮັບ.ທຸກຜະລິດຕະພັນຕ້ອງປຸງແຕ່ງຈາກວັດຖຸດິບ(ຂໍ້ມູນ)ທີ່ຖືກຕ້ອງຄົບອົງປະກອບ,ຊຶ່ງນັ້ນມັນກໍຮຽກຮ້ອງໃຫ້ມີການຍົກລະດັບ ແລະ ພັດທະນາສື່ຢ່າງຕໍ່ເນື່ອງ”

ໂດຍທ່ານ ສະຫວັນຄອນ ຣາຊມຸນຕຣີ ປະທານສະມາຄົມນັກຂ່າວແຫ່ງ ສປປລາວ ໄດ້ກ່າວໃນໂອກາດ ປິດງານສຳມະນາພາຍໃຕ້ຫົວຂໍ້”ການເຊື່ອມໂຍງສື່ແບບເກົ່າ-ແບບໃໝ່”ຊຶ່ງຈັດຂຶ້ນໃນລະຫວ່າງວັນທີ10-11ມີນາ2022 ທີ່ສຳນັກງານໜັງສືພິມ ວຽງຈັນໄທມ໌ ນະຄອນຫຼວງວຽງຈັນ.

ການສຳມະນາຄັ້ງນີ້ຮ່ວມຈັດໂດຍ ສະມາຄົມນັກຂ່າວແຫ່ງ ສປປ ລາວ ແລະ ວິທະຍຸສາກົນແຫ່ງ ສປ ຈີນ(CRI)ຊຶ່ງດຳເນີນເປັນເວລາສອງວັນ,ຈັດຂຶ່ນທັງແບບເຊິ່ງໜ້າ ແລະ ລະບົບທາງໄກ ໂດຍມີສື່ມວນຊົນຈາກທັງສູນກາງ, ແລະ ທ້ອງຖິ່ນ(ຫ້ອງການ ຖວທ ເມືອງ)ຈາກບັນດາແຂວງເຂົ້າຮ່ວມ.

ທັງນີ້,ທ່ານ ສະຫວັນຄອນ ຣາຊມຸນຕີ ໄດ້ຍົກເຫັນຄວາມສຳຄັນຂອງການພັດທະນາສື່,ທີ່ຈະຕ້ອງຍົກລະດັບຄວາມຮູ້ຄວາມສາມາດຢ່າງຕໍ່ເນື່ອງເພື່ອໃຫ້ຕອບສະໜອງໄດ້ການພັດທະນາເສດຖະກິດ-ສັງຄົມຍຸກໃໝ່ ທີ່ມີທັງໂອກາດ ແລະ ສິ່ງທ້າທາຍຫຼາຍດ້ານ.ຍິ່ງໃນຍຸກທີ່ມະນຸດເກືອບທຸກຄົນມີເຄື່ອງມືສື່ສານຢູ່ໃນມື,ຊຶ່ງສື່ມວນຊົນຕ້ອງຫ້າວຫັນເຮັດໜ້າທີ່ຮັບໃຊ້ປະເທດຊາດ, ແລະ ປະຊາຊົນ,ຄຽງຄູ່ກັບການຄົ້ນຄວ້າຮ່ຳຮຽນເພື່ອຍົກລະດັບການເຮັດວຽກຢ່າງມືອາຊີບ,ຈຶ່ງຈະສາມາດຕອບຕ້ານທຸກການນຳສະເໜີທີ່ບິດເບືອນ,ທີ່ສ້າງຄວາມແຕກແຍກ ແລະ ສ້າງຄວາມວຸ້ນວາຍ.ໂດຍປະທານສະມາຄົມນັກຂ່າວໄດ້ກ່າວຢ້ຳວ່າ”ທຸກຢ່າງທີ່ສື່ມວນຊົນນຳສະເໜີອອກໄປຕ້ອງເປັນຂໍ້ມູນທີ່ຖືກຕ້ອງ ແລະ ຊັດເຈນ,ຕ້ອງປຸງແຕ່ງຂໍ້ມູນທີ່ມີ”ທີ່ມາທີ່ໄປ”ຈາກແຫຼ່ງທີ່ໜ້າເຊື່ອຖື ໂດຍອີງໃສ່ຈັນຍາບັນ,ລະບຽບການ ແລະ ກົດໝາຍໃນການລາຍງານ.ທຸກການນຳສະເໜີບໍ່ວ່າຈະເປັນຂ່າວ ຫຼື ບົດ ຕ້ອງຕອບໂຈດການພັດທະນາໃນຍຸກໃໝ່;ຂຽນສັ້ນ,ເນື້ອໃນຄົບ,ຍົກໃຫ້ເຫັນປະເດັນສຳຄັນ,ຖືກຕ້ອງ  ແລະ ທັນສະຖານະການ”.

แชร์