ໂຄວິດ ແຜງລິດທຳລາຍເນື້ອສະໝອງ

ຜົນວິໄຈໃໝ່ພົບໂຄວິດ-19 ຈະເຮັດໃຫ້ຜູ້ຕິດເຊື້ອສູນເສຍເນື້ອສະໝອງສີເທົາ ແລະເນື້ອເຍື່ອໃນສະໝອງກໍເສຍຫາຍຫຼາຍກວ່າທີ່ເກີດຂຶ້ນຕາມທຳມະຊາດໃນຄົນທີ່ບໍ່ຕິດເຊື້ອ.

ຜົນວິໄຈຊຶ່ງຕີພິມໃນວາລະສານ Nature ຊຶ່ງເປັນງານວິໄຈທຳອິດທີ່ກ່ຽວຂ້ອງກັບຜູ້ໄດ້ຮັບການສະແກນສະໝອງທັງກ່ອນຕິດເຊື້ອໂຄວິດ ແລະ ໃນຫຼາຍເດືອນຕໍ່ມາ, ການວິໄຈນີ້ກ່ຽວຂ້ອງກັບຄົນທີ່ມີອາຍຸລະຫວ່າງ51-81ປີ. ໂດຍພົບການຫົດຕົວ ແລະ ພົບວ່າເນື້ອເຍື່ອຖືກທຳລາຍເປັນສ່ວນໃຫຍ່ໃນພື້ນທີ່ສະໝອງທີ່ກ່ຽວຂ້ອງກັບການໄດ້ກິ່ນ, ຊຶ່ງບາງສ່ວນຂອງພື້ນທີ່ສະໝອງເຫຼົ່ານີ້ຍັງກ່ຽວຂ້ອງກັບການເຮັດວຽກອື່ນໆຂອງສະໝອງອີກດ້ວຍ.

ລາຍງານຂ່າວຕ່າງປະເທດເມື່ອວັນທີ 8 ມີນາ 2022 ລະບຸວ່າການວິໄຈໄດ້ເຮັດກັບອາສາສະໝັກ 785 ຄົນ ໃນ Biobank ຊຶ່ງເປັນຄັງເກັບຂໍ້ມູນທາງການແພດ ແລະ ຂໍ້ມູນອື່ນໆຈາກຜູ້ຄົນໃນອັງກິດເກືອບ 5 ແສນຄົນ, ໂດຍຜູ້ເຂົ້າຮ່ວມແຕ່ລະຄົນໄດ້ເຂົ້າຮ່ວມສະແກນສະໝອງ 2 ຄັ້ງ, ແຕ່ລະຄັ້ງຫ່າງກັນປະມານ 3 ປີ. ທັງນີ້, ກໍລວມທັງການທົດສອບຄວາມຈຳພື້ນຖານ.

ລະຫວ່າງການສະແກນ 2 ຄັ້ງນັ້ນ, ຜູ້ເຂົ້າຮ່ວມ 401 ຄົນຕິດ Covid-19. ຊຶ່ງທັງໝົດຕິດເຊື້ອໃນລະຫວ່າງເດືອນມີນາ 2022 - ເມສາ 2021, ສ່ວນຜູ້ເຂົ້າຮ່ວມອີກ 384 ຄົນ ແມ່ນຢູ່ໃນກຸ່ມຄວບຄຸມເພາະເຂົາເຈົ້າບໍ່ໄດ້ຕິດໂຄວິດ-19 ແລະ ມີລັກສະນະຄ້າຍກັບກຸ່ມຜູ້ເຂົ້າຮ່ວມທີ່ຕິດເຊື້ອເຊັ່ນ ອາຍຸ, ເພດ, ປະຫວັດຜູ້ປ່ວຍ ແລະສະຖານະທາງເສດຖະກິດ-ສັງຄົມ.

ໂດຍປົກກະຕິເມື່ອອາຍຸຫຼາຍຂຶ້ນ, ຄົນເຮົາຈະສູນເສຍເນື້ອສະໝອງສີເທົາໄປເລັກໜ້ອຍໃນແຕ່ລະປີເຊັ່ນໃນພື້ນທີ່ສ່ວນທີ່ກ່ຽວຂ້ອງກັບຄວາມຊົງຈຳ, ການສູນເສຍເນື້ອສະໝອງສີເທົາໂດຍທົ່ວໄປໃນແຕ່ລະປີຈະຢູ່ລະຫວ່າງ 0,2-0,3%; ແຕ່ຫາກວ່າຄົນປ່ວຍໂຄວິດ-19 ທີ່ເຂົ້າຮ່ວມການວິໄຈຊຶ່ງເຂົ້າຮັບການສະແກນສະໝອງຄັ້ງທີ 2 ຫຼັງຈາກຕິດເຊື້ອໃນເວລາສະເລ່ຍ 4 ເດືອນເຄິ່ງ, ພົບວ່າສູນເສຍເນື້ອເຍື່ອສະໝອງສີເທົາຫຼາຍກວ່າຜູ້ເຂົ້າຮ່ວມວິໄຈທີ່ບໍ່ຕິດເຊື້ອ.

ທັງນີ້, ຜູ້ຕິດເຊື້ອໂຄວິດ-19 ສູນເສຍເນື້ອສະໝອງສີເທົາເພີ່ມຂຶ້ນ 0,2-2% ໃນພື້ນທີ່ສະໝອງສ່ວນຕ່າງໆໃນຊ່ວງ 3 ປີ ທີ່ສະແກນສະໝອງ, ທັງຍັງສູນເສຍບໍລິມາດສະໝອງໂດຍລວມ ແລະ ພົບຄວາມເສຍຫາຍຂອງເນື້ອເຍື່ອໃນບາງພື້ນທີ່ຫຼາຍຂຶ້ນ.

ຜົນກະທົບນີ້ໂດດເດັ່ນເປັນພິເສດ, ເນື່ອງຈາກການສຶກສາດັ່ງກ່າວກ່ຽວຂ້ອງກັບຜູ້ປ່ວຍສ່ວນໃຫຍ່ທີ່ບໍ່ປ່ວຍເຖິງຂັ້ນຕ້ອງເຂົ້າປິ່ນປົວໃນໂຮງໝໍ, ເຊັ່ນດຽວກັບຜູ້ປ່ວຍໂຄວິດ-19 ສ່ວນໃຫຍ່ໃນປະຊາກອນທົ່ວໄປທີ່ໄດ້ຮັບຜົນກະທົບພຽງເລັກໜ້ອຍຈາກການຕິດໂຄວິດ-19ຄັ້ງທຳອິດ, ສ່ວນການທົດສອບຄວາມຈື່ຈຳທີ່ກ່ຽວຂ້ອງກັບສະມາທິ ແລະ ປະສິດທິພາບໃນການເຮັດວຽກທີ່ສັບຊ້ອນຍັງພົບວ່າຜູ້ປ່ວຍໂຄວິດ-19 ມີພາວະຈື່ຈຳຫຼຸດລົງກວ່າຜູ້ທີ່ບໍ່ຕິດເຊື້ອ.

แชร์