ລາວ-ຈີນ ຈັດສຳມະນາ ຍົກລະດັບສື່ເຊື່ອມໂຍງແບບໃໝ່

ສະມາຄົມນັກຂ່າວແຫ່ງ ສປປ ລາວ ຮ່ວມກັບ ວິທະຍຸສາກົນແຫ່ງ ສປ ຈີນ ໄດ້ຈັດເວທີສໍາມະນາ ກ່ຽວກັບ ການເຊື່ອມໂຍງສື່ແບບເກົ່າ-ແບບໃໝ່ ໃນຮູບແບບອອນໄລນ໌ ແກ່ສື່ມວນຊົນ,ທັງຈາກສູນກາງ ແລະ ທ້ອງຖິ່ນ ທົ່ວປະເທດ. ເວທີສໍາມະນາດັ່ງກ່າວ ຈັດຂຶ້ນລະຫວ່າງ ວັນທີ 10-11 ມີນາ 2022 ໂດຍມີ ທ່ານ ສະຫວັນຄອນ ຣາຊມຸນຕີ ປະທານສະມາຄົມນັກຂ່າວແຫ່ງ ສປປ ລາວ, ມີວິທະຍາກອນ ແລະ ນັກຂ່າວຈາກທຸກຂະແໜງການອ້ອມຂ້າງສູນກາງ ແລະ ທ້ອງຖິ່ນ ເຂົ້າຮ່ວມ.

ເວທີສຳມະນາຄັ້ງນີ້ແນໃສ່ຍົກລະດັບຄວາມຮູ້, ຄວາມສາມາດດ້ານວິຊາການສື່ແກ່ນັກຂ່າວ, ນັກຜະລິດລາຍການທັງມືອາຊີບ ແລະ ສະໝັກຫຼິ້ນ ເພື່ອສ້າງຜະລິດຕະພັນ ຂ່າວ-ບົດ ແລະ ຮູບການ ໃຫ້ດຶງດູດໃຈຍິ່ງຂຶ້ນ,ທັງໃຫ້ສອດຄ່ອງຕາມຍຸກສະໄໝ.ພ້ອມນັ້ນ ຍັງເປັນໂອກາດຊອກຫາຄວາມອາດສາມາດບົ່ມຊ້ອນໃນການຊອກຫາລູກຄ້າຜ່ານສື່ສັງຄົມອອນໄລນ໌ ເພື່ອສ້າງລາຍຮັບໃຫ້ອົງການສື່ຂອງຕົນ.

ໂດຍປະທານສະມາຄົມນັກຂ່າວແຫ່ງ ສປປ ລາວ ໄດ້ກ່າວວ່າ: ການສໍາມະນາຄັ້ງນີ້ມີຄວາມສໍາຄັນທີ່ສຸດຕໍ່ນັກຂ່າວລາວຂອງພວກເຮົາ, ເພາະເປັນການຊ່ວຍຍົກລະດັບ ແລະ ພັດທະນາສື່ແບບໃໝ່.ຊຶ່ງໄດ້ຮຽນຮູ້ໃນຫົວຂໍ້ສໍາຄັນຕ່າງໆທີ່ປິ່ນອ້ອມວຽກງານສື່ມວນຊົນໃນໄລຍະໃໝ່. ເປັນຕົ້ນແມ່ນວິທີການເລືອກເຫດການທີ່ຈະນຳສະເໜີເປັນຂ່າວ ເພື່ອດຶງດູດຜູ້ບໍລິໂພກ, ຄວາມແຕກຕ່າງກັນ ລະຫວ່າງສື່ເກົ່າ ແລະ ສື່ໃໝ່ ທາງດ້ານເນື້ອໃນ ແລະ ຮູບການ, ອົງປະກອບ-ປັດໄຈໃນການຂຽນຂ່າວໃສ່ສື່ເກົ່າ-ສື່ໃໝ່, ຄວາມແຕກຕ່າງລະຫວ່າງຂໍ້ມູນ ແລະ ຂ່າວ, ການນໍາໃຊ້ຂໍ້ມູນມາຂຽນເປັນບົດຄວາມ, ການນໍາໃຊ້ພາສາໃນການຂຽນຂ່າວ, ການອອກແບບ ແລະ ຂຽນໂຄງສ້າງສໍາລັບການຖ່າຍທໍາຂ່າວ ແລະ ສາລະຄະດີ (Video Clip), ມຸມມອງ ແລະ ວິທີການຖ່າຍທໍາ, ການສ້າງ ແລະ ໃຊ້ Info graphic ໃນຂ່າວ, ຮູບແບບການນໍາສະເໜີໜ້າຂ່າວຂອງສື່ອອນໄລນ໌, ກົດໝາຍສື່ມວນຊົນ, ຈັນຍາບັນ, ຈັນຍາທໍາຂອງນັກຂ່າວ, ການຄຸ້ມຄອງ-ປ້ອງກັນ-ແກ້ໄຂຂໍ້ມູນຂ່າວສານທີ່ເຂົ້າມາທໍາລາຍສື່ອອນໄລນ໌ຂອງອົງການ, ຫັນການນໍາໃຊ້ຂໍ້ມູນຂ່າວສານ-ສື່ສານເປັນທັນສະໄໝ, ມີຄວາມປອດໄພ ແລະ ການຊອກແຫຼ່ງລາຍຮັບຜ່ານສື່ອອນໄລນ໌.

ທ່ານ ສະຫວັນຄອນ ຣາຊມຸນຕີໄດ້ຕີລາຄາສູງ ຕໍ່ການພົວພັນຮ່ວມມື ລະຫວ່າງ ສະມາຄົມນັກຂ່າວ ແຫ່ງ ສປປ ລາວ ກັບ ວິທະຍຸສາກົນ ແຫ່ງປະເທດຈີນ ປະຈຳລາວ. ທີ່ໄດ້ມີການພົວພັນຮ່ວມມືກັນດ້ວຍດີຕະຫຼອດມາ. ຊຶ່ງໄດ້ປະກອບສ່ວນເຂົ້າໃນວຽກງານໂຄສະນາ, ເຜີຍແຜ່ແນວທາງນະໂຍບາຍຂອງພັກ-ລັດ ໃນພາລະກິດປົກປັກຮັກສາ ແລະ ສ້າງສາພັດທະນາ ສປປ ລາວ ແລະ ສປ ຈີນ, ເສີມຂະຫຍາຍສາຍພົວພັນມິດຕະພາບ, ການຮ່ວມມືທີ່ດີກັບບັນດາປະເທດໃນພາກພື້ນ ແລະ ໃນໂລກ.

แชร์