ອິນໂດນີເຊຍຈຳກັດການສົ່ງອອກນໍ້າມັນພືດ

ລັດຖະບານອິນໂດນີເຊຍ ຈຳກັດການສົ່ງອອກນໍ້າມັນພືດ (ປະເພດນໍ້າມັນປາລ໌ມ) ເພື່ອເພີ່ມການຕອບສະໜອງພາຍໃນປະເທດເປັນ 30%, ຊຶ່ງແຜນນະໂຍບາຍດັ່ງກ່າວກໍສົ່ງສັນຍານໄປເຖິງຕະຫຼາດໂລກ.

ສຳນັກຂ່າວຕ່າງປະເທດໄດ້ລາຍງານໃນວັນທີ 10 ມີນາ 2022 ວ່າທ່ານ ມູຮຳໝັດ ລັຕຟີ ລັດຖະມົນຕີກະຊວງການຄ້າອິນໂດນີເຊຍ, ໄດ້ເຜີຍໃຫ້ຮູ້ແຜນຈຳກັດການສົ່ງອອກນໍ້າມັນປາລ໌ມນັບແຕ່ວັນພະຫັດນີ້ເປັນຕົ້ນໄປ, ເພື່ອເພີ່ມປະລິມານຊັພພລາຍ (ຕອບສະໜອງຄວາມຕ້ອງການ) ພາຍໃນປະເທດແນໃສ່ຄວບຄຸມລາຄານໍ້າມັນປຸງແຕ່ງອາຫານທີ່ພຸ່ງຂຶ້ນຢ່າງຕໍ່ເນື່ອງ.

ລາຍງານຂ່າວດຽວກັນໃຫ້ຮູ້ຕື່ມວ່າ: ອິນໂດນີເຊຍຖືເປັນປະເທດຜູ້ຜະລິດ ແລະສົ່ງອອກນໍ້າມັນປາລ໌ມລາຍໃຫຍ່ຂອງໂລກ, ການອອກຄຳສັ່ງໃຫ້ບໍລິສັດຕ່າງໆຕ້ອງເພີ່ມສັດສ່ວນການຈຳໜ່າຍນໍ້າມັນປາລ໌ມດິບ ແລະນໍ້າມັນປາລ໌ມໂອລີນສຳລັບປຸງອາຫານເພີ່ມອີກ 30% ຈາກສັດສ່ວນເດີມຢູ່ທີ່ 20% ເພື່ອຄຸ້ມຄອງລາຄານໍ້າມັນປາລ໌ມໃນປະເທດ, ໂດຍແຜນນະໂຍບາຍດັ່ງກ່າວຈະມີຜົນບັງຄັບໃຊ້ເປັນຢ່າງໜ້ອຍ6ເດືອນ.

ນະໂຍບາຍຍົກລະດັບການຕອບສະໜອງຄວາມຕ້ອງການນໍ້າມັນປາລ໌ມພາຍໃນປະເທດຄັ້ງນີ້, ຈະເຮັດໃຫ້ຊັພພລາຍນໍ້າມັນພືດໃນຕະຫຼາດໂລກຍິ່ງຫຼຸດໜ້ອຍລົງ. ຫຼັງຈາກທີ່ຕ້ອງຜະເຊີນກັບບັນຫາຂາດແຄນເນື່ອງຈາກວິກິດຣັສເຊຍ-ຢູເຄຣນ ຊຶ່ງເປັນຜູ້ສົ່ງອອກນໍ້າມັນດອກຕາເວັນລາຍໃຫຍ່ຂອງໂລກ.

ຢ່າງໃດກໍຕາມ, ເມື່ອທ້າຍເດືອນມັງກອນຜ່ານມາອິນໂດນີເຊຍກໍ່ມີນະໂຍບາຍຈຳກັດການສົ່ງອອກນໍ້າມັນປາລ໌ມ, ຫຼັງຈາກທີ່ລາຄານໍ້າມັນປຸງແຕ່ງອາຫານພຸ່ງຂຶ້ນກວ່າ 40% ໃນຊ່ວງຕົ້ນປີນີ້ຕາມທິດທາງລາຄານໍ້າມັນພືດທົ່ວໂລກ.

แชร์