ຮອງນາຍົກລັດຖະມົນຕີ ຊຸກຍູ້ການພັດທະນາເມືອງນອງ

ເມື່ອວັນທີ 9 ມີນາ 2022 ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ເຄື່ອນໄຫວຊຸກຍູ້ ການພັດທະນາເສດຖະກິດ-ສັງຄົມ ແຂວງສະຫວັນນະເຂດ ໂດຍມີທ່ານ ສັນຕິພາບ ພົມວິຫານ, ເຈົ້າແຂວງໆສະຫວັນນະເຂດ ພ້ອມດ້ວຍຄະນະນຳ, ພະແນກການ ແລະ ຄະນະນຳຂອງເມືອງ ໃຫ້ການຕ້ອນຮັບ.

ໂດຍທ່ານ ລຳແກ້ວ ແສງໜູທອງ, ເຈົ້າເມືອງໆນອງ ໄດ້ລາຍງານໃຫ້ຊາບວ່າ: ທົ່ວເມືອງ ມີ 69 ບ້ານ, ພົນລະເມືອງ 32.000 ກວ່າຄົນ, ຍິງ 16.000 ກວ່າຄົນ, ມີ 5.221 ຫຼັງຄາເຮືອນ, 6.447 ຄອບຄົວ. ສໍາລັບການຜະລິດເປັນສິນຄ້າທີ່ພົ້ນເດັ່ນ ມີກ້ວຍ 5.344 ເຮັກຕາ, ມັນຕົ້ນ 1.200 ເຮັກຕາ ແລະ ຕົ້ນໄມ້ອຸດສາຫະກໍາ ປະມານ 2.000 ເຮັກຕາ; ລາຍຮັບສະເລ່ຍຕໍ່ຫົວຄົນ 7.150.000 ກີບຕໍ່ຄົນຕໍ່ປີ; ຕາໜ່າງໂທລະຄົມມະນາຄົມ ກວມ 88%; ຕາຂ່າຍໄຟຟ້າ ເຂົ້າເຖິງບ້ານ ກວມ 84,5%, ປະຊາຊົນໄດ້ຊົມໃຊ້ໄຟຟ້າ ໃນຄົວເຮືອນ ກວມ 65,28%; ເດັກໃນເກນອາຍຸ 3-5 ປີ ໄດ້ເຂົ້າຮຽນ 43,7%, ອັດຕາການເຂົ້າຮຽນ ຊັ້ນປະຖົມ 99%, ຊັ້ນມັດທະຍົມຕົ້ນ 48,5%, ມັດທະຍົມປາຍ 23,7%; ບ້ານວັດທະນະທຳ ກວມ 50,1%.

ໃນໂອກາດນີ້, ທ່ານ ຮອງນາຍົກລັດຖະມົນຕີ ໄດ້ສະແດງຄວາມຊົມເຊີຍຕໍ່ອົງການປົກຄອງເມືອງນອງ ທີ່ສາມາດປະຕິບັດວຽກງານມີຜົນສຳເລັດສຳເລັດໃໝ່ຫຼາຍດ້ານ, ໂດຍສະເພາະແມ່ນຫຼາຍໂຄງການໄດ້ເຂົ້າມາລົງທຶນພັດທະນາຢູ່ເມືອງນອງ. ຢ່າງໃດກໍດີ, ເມືອງນອງກໍຍັງຕ້ອງເອົາໃຈໃສ່ຕື່ມບາງດ້ານ, ເປັນຕົ້ນແມ່ນສືບຕໍ່ສ້າງເງື່ອນໄຂໃຫ້ປະຊາຊົນມີລາຍຮັບຕົວຈິງສູງຂຶ້ນຢ່າງຕໍ່ເນື່ອງໂດຍນຳໃຊ້ທ່າແຮງບົ່ມຊ້ອນຂອງທ້ອງຖິ່ນໃຫ້ເກີດປະໂຫຍດສູງສຸດ. ໂດຍສະເພາະ ແມ່ນການຈັັດສັນນຳໃຊ້ທີ່ດິນ,ແຫຼ່ງນໍ້າແລະອື່ນໆເຂົ້າໃນການຜະລິດກະສິກຳຢ່າງເໝາະສົມ, ເພື່ອຍົກສະມາດຖະພາບການຜະລິດ ຕິດພັນກັບການປຸງແຕ່ງແລະມີຕະຫຼາດຮອງຮັບຄັກແນ່; ຈັດສັນທີ່ຢູ່ອາໃສແກ່ປະຊາຊົນຕາມທິດສາມສ້າງ ກວດກາ ແລະ ປັບປຸງຄືນກົງຈັກການຈັດຕັ້ງຂັ້ນບ້ານ ໃຫ້ຖືກຕ້ອງ ແລະ ສອດຄ່ອງກວ່າເກົ່າ; ຈັດສັນການລົງທຶນພັດທະນາພາຍໃນເມືອງໃຫ້ມີປະສິດທິພາບ ແລະ ປະສິດທິຜົນ ບົນພື້ນຖານຈັດລຽງບູລິມະສິດ ແລະ ມີຈຸດສຸມ; ພ້ອມທັງເອົາໃຈໃສ່ ຕ້ານ, ສະກັດກັ້ນ ແລະ ແກ້ໄຂບັນຫາຢາເສບຕິດ ໃຫ້ຫຼຸດໜ້ອຍຖອຍລົງ ເປັນກ້າວໆ;

ໃນຕອນບ່າຍຂອງວັນດຽວກັນ, ຄະນະຮອງນາຍົກລັດຖະມົນຕີ ກໍໄດ້ເດີນທາງໄປເບິ່ງພື້ນທີ່ທຳການຜະລິດ ຂອງປະຊາຊົນ ທີ່ໄດ້ຮັບການຊຸກຍູ້ສົ່ງເສີມ ຈາກໂຄງການ ຮ່ວມໃຈ ສາຍໃຍໂລມາຄຳ ທີ່ບ້ານປະແນະ, ເມືອງນອງ ແລະ ເດີນທາງໄປກວດກາເບິ່ງສະພາບການຂຸດຄົ້ນແຮ່ເຫຼັກ ຂອງບໍລິສັດ ພົງຊັບທະວີ ທຣີບີ ຈຳກັດຜູ້ດຽວ, ຢູ່ທີ່ບ້ານປ່າກ້ວຍ, ເມືອງບົວລະພາ, ແຂວງຄຳມ່ວນ. ໂດຍມີທ່ານ ວັນໄຊ ພອງສະຫວັນ, ເຈົ້າແຂວງໆຄຳມ່ວນ ພ້ອມດ້ວຍຄະນະ ໃຫ້ການຕ້ອນຮັບ ແລະ ຮ່ວມຕິດຕາມ.

แชร์