ງານກີລາແຫ່ງຊາດ ຄັ້ງທີ XI ທີຊຽງຂວາງ ຈະຈັດຂຶ້ນລະຫວ່າງ 13-22 ທັນວານີ້

ທີ່ປະຊຸມປຶກສາຫາລືການກະກຽມຄວາມພ້ອມໃຫ້ແກ່ການຈັດງານມະຫາກຳກີລາແຫ່ງຊາດ ຄັ້ງທີ XI ໄດ້ຕົກລົງເຫັນດີ ກໍານົດພິທີເປີດ-ປິດງານດັ່ງກ່າວຄື (ມື້ເປີດວັນທີ 13 ທັນວາ ແລະ ມື້ປິດ ວັນທີ 22 ທັນວາ 2022), ເຫັນດີໃຫ້ຈັດງານແຂ່ງຂັນກີລາຄົນພິການທົ່ວປະເທດ ຄັ້ງທີ III; ແຕ່ໃຫ້ໂຈະການເຄື່ອນໄຫວກິດຈະກຳເຍົາວະຊົນທັນວາ ໃນງານມະຫາກໍາກີລາແຫ່ງຊາດ ຄັ້ງທີ XI ເພື່ອຮັກສາສຸຂະພາບເດັກ ແລະ ຫຼີກລ່ຽງການຕິດເຊື້ອພະຍາດໂຄວິດ-19.

 ກອງປະຊຸມຄັ້ງນີ້ ຈັດຂຶ້ນເມື່ອວັນທີ 7 ມີນາ 2022 ທີ່ຫ້ອງປະຊຸມພະແນກສຶກສາທິການ ແລະ ກີລາແຂວງຊຽງຂວາງ, ພາຍໃຕ້ການເປັນປະທານຂອງ ທ່ານ ສີວິໄລ ແສງຈະເລີນ ຮອງເຈົ້າແຂວງຊຽງຂວາງ, ໃຫ້ກຽດເຂົ້າຮ່ວມໂດຍ ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ກະຊວງສຶກສາທິການ ແລະ ກີລາ ແລະ ທ່ານ ແສງພອນ ພົນອາມາດ ຫົວໜ້າກົມກີລາລະດັບສູງ ກະຊວງສຶກສາທິການ ແລະ ກີລາ ພ້ອມດ້ວຍຄະນະກຳມະການຮັບຜິດຊອບຝ່າຍຕ່າງໆ ຈາກຂັ້ນສູນກາງ ແລະ ຂັ້ນແຂວງ.

ຄະນະຜູ້ແທນໄດ້ຄົ້ນຄວ້າປຶກສາຫາລື ແລະ ເອກະພາບກັນຕໍ່ກັບໜ້າວຽກທີ່ສໍາຄັນ, ເປັນຕົ້ນແມ່ນ ໄດ້ຮັບຮອງເອົາຮ່າງວາລະກະກຽມກອງປະຊຸມຄະນະລະດັບຊາດ ຄັ້ງທີ V; ເນື້ອໃນ ແລະ ເປົ້າໝາຍແຂກເຂົ້າຮ່ວມ: ກໍານົດພິທີເປີດ-ປິດງານມະຫາກຳກີລາແຫ່ງຊາດ ຄັ້ງທີ XI ຊຶ່ງຮູບແບບການແຂ່ງຂັນກີລາແຕ່ລະປະເພດແບ່ງອອກເປັນ 5 ໝວດ ໂດຍເລີ່ມ ແຂ່ງຂັນແຕ່ຕົ້ນເດືອນພະຈິກ ຫາ ທ້າຍເດືອນທັນວາ 2022 ແລະ ຈັດການແຂ່ງຂັນບາງປະເພດກີລາ ໃນວາລະເປີດ-ປິດງານ; ເຫັນດີໃຫ້ຈັດງານແຂ່ງຂັນກີລາຄົນພິການທົ່ວປະເທດ ຄັ້ງທີ III ໂດຍມອບໝາຍໃຫ້ກົມກີລາມວນຊົນ, ພະລະ ແລະ ສິລະປະສຶກສາ ຮີບຮ້ອນປັບປຸງແຜນເຄື່ອນໄຫວໃຫ້ທັນຕາມກໍານົດເວລາ; ເຫັນດີໃຫ້ໂຈະການເຄື່ອນໄຫວກິດຈະກຳເຍົາວະຊົນທັນວາ ໃນງານມະຫາກໍາກີລາແຫ່ງຊາດ ຄັ້ງທີ XI; ເຫັນດີປັບປຸງບາງກໍາມະການ ແລະ ອະນຸກໍາມະການຝ່າຍຕ່າງໆຄືນໃໝ່ ຕາມຄວາມເໝາະສົມ; ເຫັນດີປັບປຸງແຜນການເຄື່ອນໄຫວ ແລະ ແຜນດໍາເນີນງານຈັດງານມະຫາກໍາກີລາແຫ່ງຊາດ ຄັ້ງທີ XI ຄືນ ເພື່ອໃຫ້ແທດເໝາະກັບສະພາບຕົວຈິງ; ຄະນະກໍາມະການຝ່າຍຕ່າງໆຮີບຮ້ອນຈັດສັນງົບປະມານຮັບໃຊ້ຄືນໃໝ່ ເພື່ອໃຫ້ແທດເໝາະກັບໜ້າວຽກທີ່ຈໍາເປັນ ບົນພື້ນຖານການປະຢັດ-ມັດທະຍັດ.

 

แชร์