ປັບຂຶ້ນຄ່າແຮງຂັ້ນຕໍ່າ ຍັງລໍຖ້າລັດຖະບານພິຈາລະນາ

 ພາຍຫຼັງທີ່ມີຂ່າວອອກມາວ່າຈະມີການປັບຂຶ້ນຄ່າແຮງຂັ້ນຕໍ່າຈາກ 1,1 ລ້ານເປັນ 1,5 ລ້ານກີບ ຕໍ່ຄົນຕໍ່ເດືອນ ແລະຈະປະຕິບັດນັບແຕ່ວັນທີ 1 ພຶດສະພາ 2022 ເປັນຕົ້ນໄປ; ຢ່າງໃດກໍຕາມ, ເລື່ອງນີ້ຍັງຈະຕ້ອງລໍຖ້າລັດຖະບານພິຈາລະນາຄືນໃໝ່ອີກຄັ້ງຫຼັງຈາກທີ່ສະພາການຄ້າ ແລະ ອຸດສາຫະກຳແຫ່ງຊາດລາວສະເໜີຂໍເລື່ອນ.

ຈາກບັນຫາຄ່າຄອງຊີບທີ່ຖີບຕົວສູງຂຶ້ນຊຶ່ງມາຈາກຫຼາຍປັດໄຈຊຶ່ງກະທົບຕໍ່ຊີວິດການເປັນຢູ່ຂອງທົ່ວສັງຄົມຢ່າງຫຼີກລ່ຽງບໍ່ໄດ້, ຕໍ່ໜ້າສະພາບເຂົ້າຍາກໝາກແພງ; ອົງການ3ຝ່າຍ ( ສູນກາງສະຫະພັນກຳມະບານລາວ, ກະຊວງແຮງງານ ແລະ ສະຫວັດດີການສັງຄົມ, ສະພາການຄ້າ ແລະ ອຸດສາຫະກຳແຫ່ງຊາດລາວ) ທີ່ມີບົດບາດຄຸ້ມຄອງ, ປົກປ້ອງ ແລະ ພັດທະນາແຮງງານລາວ, ກໍ່ມີຄວາມເປັນຫ່ວງເປັນໃຍຈຶ່ງໄດ້ມີການຫາລື 3 ຝ່າຍມາແລ້ວຫຼາຍຄັ້ງເພື່ອສະເໜີປັບຂຶ້ນຄ່າແຮງຂັ້ນຕໍ່າ. ຫຼ້າສຸດ, ເລື່ອງນີ້ກໍ່ເປັນໜຶ່ງໃນຫົວຂໍ້ສຳຄັນຂອງກອງປະຊຸມ 3 ຝ່າຍກ່ຽວກັບວຽກງານສາຍພົວພັນແຮງງານ ຄັ້ງທີ 19 ຊຶ່ງຈັດຂຶ້ນເມື່ອວັນທີ 4 ມີນາ 2022 ທີ່ນະຄອນຫຼວງວຽງຈັນ. ໂດຍການເປັນປະທານຂອງທ່ານ ນາງ ໃບຄຳ ຂັດທິຍະ, ລັດຖະມົນຕີກະຊວງແຮງງານແລະສະຫວັດດີການສັງຄົມ (ຮສສ) . ທ່ານ ນາງ ອາລີ ວົງໜໍ່ບຸນທຳ, ປະທານຄະນະບໍລິຫານສູນກາງສະຫະພັນກຳມະບານລາວ ແລະທ່ານ ວັນທອງ ສິດທິກຸນ,ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ.

ທັງນີ້, ມີຫຼາຍບັນຫາທີ່ກອງປະຊຸມໄດ້ນຳຂຶ້ນປຶກສາຫາລື, ໂດຍສະເພາະກໍແມ່ນຊ່ອງທາງເພື່ອນຳໄປສູ່ການຊ່ວຍເຫຼືອແຮງງານລາວທີ່ພວມປະສົບບັນຫາຢຸດຈ້າງງານເພາະຫຼາຍກິດຈະການຕ້ອງປິດຕົວລົງຈາກຜົນກະທົບໂຄວິດ-19. ເຮັດໃຫ້ອັດຕາຫວ່າງງານເພີ່ມຂຶ້ນຈາກ 9,7% ມາເປັນ 21,8% ໃນປີ2021.

ທີ່ສຳຄັນແມ່ນລັດຖະມົນຕີ ຮສສ ກໍ່ໄດ້ກ່າວເຖິງການຄົ້ນຄວ້າພິຈາລະນາປັບປຸງຄ່າແຮງງານຂັ້ນຕໍ່າ, ໂດຍລະບຸວ່າ ໄດ້ມອບໃຫ້ແຕ່ລະຝ່າຍນຳໄປຄົ້ນຄວ້າເຖິງຄວາມເປັນໄປໄດ້. ຊຶ່ງເບື້ອງຕົ້ນກໍຄາດການວ່າຈະປັບຂຶ້ນໃນວັນທີ 1 ພຶດສະພາປີນີ້. ຢ່າງໃດກໍຕາມ, ເນື່ອງຈາກເງື່ອນໄຂ ແລະ ຄວາມພ້ອມຕ່າງໆຍັງບໍ່ທັນອຳນວຍ, ດັ່ງນັ້ນສະພາການຄ້າ ແລະ ອຸດສາຫະກຳແຫ່ງຊາດລາວຈຶ່ງສະເໜີຂໍເລື່ອນການປັບຂຶ້ນຄ່າແຮງງານໄປເປັນວັນທີ 1 ພຶດສະພາ 2023. ແຕ່ນັ້ນກໍເປັນພຽງຂໍ້ສະຫຼຸບທີ່ຍັງຕ້ອງລໍຖ້າການພິຈາລະນາຄືນອີກຄັ້ງຂອງລັດຖະບານ.

ຄ່າແຮງຂັ້ນຕໍ່າທີ່ຈ່າຍກັນຢູ່ໃນປັດຈຸບັນ, ແມ່ນປະຕິບັດມາໄດ້3ປີກວ່າແລ້ວ,ນັ ບຈາກການປັບປຸງຄັ້ງທີ 8 ເມື່ອປີ 2018 ຊຶ່ງປັບຂຶ້ນ 2ແສນກີບ ຈາກ 9 ແສນກີບເປັນ 1,1 ລ້ານກີບຕໍ່ຄົນຕໍ່ເດືອນ.

 

แชร์