ສໍາເລັດກອງປະຊຸມການທະຫານທ້ອງຖິ່ນທົ່ວປະເທດ

​ກອງປະຊຸມວຽກງານການທະຫານທ້ອງຖິ່ນທົ່ວປະເທດ ຄັ້ງທີ 5 ຂອງກະຊວງປ້ອງກັນປະເທດ, ອັດລົງດ້ວຍຜົນສໍາເລັດ ເມື່ອຕອນເຊົ້າວັນທີ 4 ມີນາ 2022 ທີ່ສະໂມສອນໃຫຍ່ກົມໃຫຍ່ການເມືອງກອງທັບ, ພາຍຫຼັງດໍາເນີນມາເປັນເວລາ 1 ວັນເຄິ່ງ. ໂດຍການເປັນປະທານຂອງ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນ ຕີວ່າການກະຊວງປ້ອງກັນປະເທດ, ເປັນກຽດເຂົ້າຮ່ວມໂອ້ລົມໂດຍ ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານພັກ ປປ ລາວ ປະທານປະເທດ ປະທານຄະນະກໍາມະການ ປກຊ-ປກສ ຂັ້ນສູນກາງ, ມີທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດ, ພ້ອມດ້ວຍການນໍາຂັ້ນສູງພັກ-ລັດ, ບັນດາລັດຖະ ມົນຕີ, ເຈົ້າເເຂວງ, ເຈົ້າຄອງນະຄອນຫຼວງວຽງຈັນ, ນາຍທະຫານອ້ອມຂ້າງກະຊວງປ້ອງກັນປະເທດ ແລະ ພາກສ່ວນກ່ຽວຂ້ອງ.

     ​ໂອກາດນີ້, ພົນເອກ ຈັນສະໝອນ ຈັນຍາລາດ ໄດ້ລາຍງານວ່າ: ຕະຫຼອດໄລຍະດໍາເນີນກອງປະຊຸມ, ຜູ້ແທນທີ່ເຂົ້າຮ່ວມໄດ້ຮັບຟັງການສະຫຼຸບຕີລາຄາຄືນຜົນການຈັດຕັ້ງປະຕິບັດວຽກງານການທະຫານທ້ອງຖິ່ນໃນໄລຍະ 5 ປີຜ່ານມາ ແລະ ວາງທິດທາງແຜນການໃນຕໍ່ໜ້າ, ພ້ອມທັງຮັບຟັງການປະກອບຄໍາເຫັນຈາກຕາງໜ້າຄະນະກໍາມະການປ້ອງກັນຊາດ-ປ້ອງກັນຄວາມສະຫງົບ,ລວມທັງວຽກງານສຳຄັນທີ່ປິ່ນອ້ອມຂອງບັນດາກະຊວງ, ເເຂວງ ແລະ ນະຄອນຫຼວງ.

​ໃນຕອນທ້າຍກອງຊຸມ, ທ່ານ ທອງລຸນ ສີສຸລິດ ໄດ້ໂອ້ລົມ ແລະ ໃຫ້ທິດຊີ້ນຳ, ໂດຍທ່ານໄດ້ຍົກໃຫ້ເຫັນວ່າ: ວຽກງານການທະຫານທ້ອງຖິ່ນ, ມີບົດບາດສໍາຄັນໃນແນວທາງການທະຫານຂອງພັກ, ຊຶ່ງຕະຫຼອດໄລຍະຂອງການປະຕິວັດປະເທດເຮົາ, ບໍ່ວ່າໃນຍາມສົງຄາມ ກໍຄືໃນຍາມສັນຕິ ພາບ. ພັກເຮົາ ເວລາໃດກໍຍຶດໝັ້ນ ແລະ ຖືເອົາການປະຕິບັດໜ້າທີ່ ປກຊ-ປກສ ທົ່ວປວງຊົນ, ເອົາກໍາລັງແຮງຂອງມະຫາຊົນ ແລະ ກໍາລັງໃນແຕ່ລະບໍລິເວນທ້ອງຖິ່ນ ເພື່ອຕີເອົາຊະນະສັດຕູ ແລະ ເປັນກໍາລັງແກ່ນສານໃນການປົກປັກຮັກສາ ແລະ ພັດທະນາທ້ອງຖິ່ນ. ວຽກງານການທະຫານທ້ອງຖິ່ນ ມີບົດບາດສຳຄັນໃນການຈັດຕັ້ງປະຕິບັດແນວທາງປ້ອງກັນຊາດ-ປ້ອງຄວາມສະຫງົບຂອງພັກ, ເວລາໃດກໍຕິດພັນກັບການພັດທະນາເສດຖະກິດ-ສັງຄົມຢູ່ແຕ່ລະທ້ອງຖິ່ນໃນຂອບເຂດທົ່ວປະເທດ. ຢ່າງໃດກໍດີ, ຄະນະພັກ, ອຳນາດການປົກຄອງ, ຄະນະປ້ອງກັນຊາດ, ປ້ອງກັນຄວາມສະຫງົບຂັ້ນຕ່າງໆ,ຕ້ອງໄດ້ຊີ້ນໍາຢ່າງໃກ້ຊິດ, ແທດເຖິງ, ໂດຍກົງ, ຮອບດ້ານ; ຮູ້ນໍາໃຊ້ໂອກາດໃນການສ້າງກໍາລັງທະຫານທ້ອງຖິ່ນ ຊຶ່ງຕ້ອງສ້າງ 3 ດ້ານໄປພ້ອມໆກັນ ໂດຍສະເພາະການສ້າງ, ຝຶກຝົນດ້ານການເມືອງແນວຄິດປະຕິວັດ ບວກກັບຄຸນສົມບັດສິນທຳ, ນໍ້າໃຈຮັກຊາດ, ສ້າງໃຫ້ກຳລັງເຮົາຮູ້ໜ້າທີ່ຂອງຕົນ, ຮູ້ເຮັດວຽກເພື່ອຊາດ, ເພື່ອປະຊາຊົນ; ສ້າງໃຫ້ມີດ້ານສິນລະປະຍຸດ-ຍຸດທະວີທີ ຄຽງຄູ່ກັບການສ້າງໃຫ້ທະຫານທ້ອງຖິ່ນມີຄວາມຮູ້ໃໝ່ທາງດ້ານການພັດທະນາ, ຮັບເອົາວິທະຍາສາດມາພັດ ທະນາກຳລັງ, ເພື່ອເປັນກຳລັງແຮງສ້າງກົມກອງ, ຊ່ວຍປະຊາຊົນສ້າງທ້ອງຖິ່ນ, ສ້າງຄອບຄົວຕົວແບບ. ທັງນີ້, ທະຫານທ້ອງຖິ່ນຕ້ອງຕິດພັນກັບຮາກຖານ ແລະ ຕິດພັນກັບປະຊາຊົນ. 

แชร์