ເປີດເປັນທາງການ ງານວາງສະແດງລົດ ວຽງຈັນ ຄັ້ງທີ 3

​ເປີດສາກຂຶ້ນຢ່າງເປັນທາງການ, ສຳລັບງານວາງສະແດງລົດວຽງຈັນ ໂມໂຕຣ ໂຊວ໌ 2022 (Vientiane Motor Show 2022) ທີ່ສູນການຄ້າ ລາວ-ໄອເຕັກ ນະຄອນຫຼວງວຽງຈັນ, ຊຶ່ງມີຄ້າຍລົດຊື່ດັງບໍ່ວ່າຈະເປັນ HONDA, TOYOTA, MAZDA, LAND ROVER, MG, SUZUKI, FORD, NISAN ,ISUZU, GEELY, GAC,VOLKSWAGEN,MAHINDRA,GWM,HONGQI ພ້ອມບໍລິສັດສິນເຊື່ອ KOLAO KB ແລະປະກັນໄພ THIPPAYA, ພ້ອມດ້ວຍຜະລິດຕະພັນອື່ນໆເຂົ້າຮ່ວມຈັດສະແດງຢ່າງຄຶກຄື້ນ.

ເຂົ້າຮ່ວມໃນວາລະເປີດງານໃນວັນທີ 7 ມີນາ 2022 ໂດຍ ທ່ານ ຄໍາແພງ ໄຊສົມແພງ ລັດ ຖະມົນຕີກະຊວງອຸດສາຫະກຳ ແລະ ການຄ້າ, ທ່ານ ໄຊສົມເພັດ ນໍລະສິງ ຫົວໜ້າກົມສົ່ມເສີມການຄ້າ, ທ່ານ ພອນຈັນ ເພັງສຸວັນ ຜູ້ອໍານວຍການ ບໍລິສັດ ພີພີໄຊໂຍ ເອັນເຕີເທັນເມັ້ນ ແອນ ອໍແກໄນເຊີ້ຈຳກັດຜູ້ດຽວ, ພ້ອມດ້ວຍແຂກຖືກເຊີນ ແລະ ພາກສ່ວນທີ່ກ່ຽວຂ້ອງ.

ງານນີ້ຈັດໂດຍກົມສົ່ງເສີມການຄ້າ, ກະຊວງອຸດສາຫະກໍາ ແລະ ການຄ້າ ຮ່ວມກັບ ບໍລິສັດ ພີພີ ເອັນເຕີເທຣນເມັ້ນ ແອນ ອໍແກໄນເຊີ້ ຈໍາກັດຜູ້ດຽວ. ໂດຍ ທ່ານ ພອນຈັນ ເພັງສຸວັນ, ໄດ້ກ່າວເຖິງຈຸດປະສົງ, ກໍເພື່ອເພີ່ມໂອກາດໃຫ້ຜູ້ປະກອບການທາງດ້ານທຸລະກິດລົດ ແລະ ເປັນການໂຄສະນາໃຫ້ຄວາມຮູ້ກ່ຽວກັບນະວັດຕະກຳໃໝ່ໆກ່ຽວກັບພາຫະນະ, ເພື່ອຍົກລະດັບຂີດຄວາມສາມາດໃນການແຂ່ງຂັນດ້ານການຄ້າ ແລະ ເພື່ອເພີ່ມທາງເລືອກໃຫ້ຜູ້ບໍລິໂພກ. ພິເສດ, ໃນງານຍັງມີລົດໄຟຟ້າຈາກຫຼາຍຄ້າຍເຂົ້າຮ່ວມຈັດສະແດງ, ນອກນັ້ນຍັງມີໂຊນລົດມືສອງ, ມີລົດທົດລອງຂັບ, ດີຟລົດ ແລະ ໂຊນອາຫານ. ພ້ອມທັງເປັນການກະຕຸ້ນເສດຖະກິດທີ່ໄດ້ຮັບຜົນກະທົບຈາກບັນຫາໂຄວິດ-19 ໂດຍຄາດວ່າປີນີ້, ຈະມີຍອດຈອງລົດພາຍໃນງານຫຼາຍກວ່າ 500 ຄັນ.

ໃນວາລະຈັດງານລະຫວ່າງວັນທີ 5-13 ມີນາ 2022, ປະກອບມີກິດຈະກຳຈົກສະຫຼາກ ເພື່ອລຸ້ນຮັບຄຳ ນໍ້າໜັກ 1 ບາດ, ຊຶ່ງຈະຈົກສະຫຼາກໃນວັນທີ 13 ມີນາ ຊຶ່ງເປັນວັນສຸດທ້າຍຂອງງານ, ມີການແຂ່ງເຕັ້ນ cover dance ເພື່ອຊິງເງິນລາງວັນລວມກວ່າ 10 ລ້ານກີບ. ມີຄອນເສີດ (Mini Concert) ຈາກສິນລະປິນລາວເຊັ່ນ: ແບ້ ຮອນນີ່, ເທ່ ຈຳປາສັກ, ແພັດ ດາລາວອນ, ພ້ອມການສະແດງເຕັ້ນໂຊວ໌ຈາກ New Gen ຊຶ່ງເປັນທີມທີ່ໄດ້ຮັບລາງວັນລະດັບປະເທດ ແລະ ລະດັບໂລກ. ອີກທັງມີກິດຈະກຳເທິງເວທີເພື່ອຄວ້າຂອງລາງວັນ ບໍ່ວ່າຈະເປັນເສື້ອ, ບັດສ່ວນຫຼຸດ ແລະ ເບິ່ງຮູບເງົາຟຣີ ຈາກ Major Cineplex, ອີກທັງການແຂ່ງຂັນ ຄອສເພ ຖ່າຍຮູບກັບລົດ.

แชร์