ລາຄານໍ້າມັນເຊື້ອໄຟໃນຕະຫຼາດໂລກ ກະທົບໂດຍກົງຕໍ່ການຊື້-ຂາຍໃນລາວ

ລາຄານໍ້າມັນເຊື້ອໄຟ ຖືກກໍານົດໂດຍກົນໄກລາຄາໃນຕະຫຼາດໂລກ, ຊຶ່ງການເໜັງຕີງ ຫຼື ປັບຂຶ້ນຂອງລາຄານໍ້າເຊື້ອໄຟ ແມ່ນຫຼີກລ່ຽງບໍ່ໄດ້ທີ່ຈະຕ້ອງກະທົບເຖິງລາຄາຂາຍຍ່ອຍພາຍໃນປະເທດເຮົາ ແລະ ບັນດາປະເທດທີ່ນຳເຂົ້ານ້ຳມັນ ຫຼື ແມ່ນແຕ່ປະເທດທີ່ຜະລິດນໍ້າມັນເອງ. ຂະນະດຽວກັນ, ລາຄາຂອງນໍ້າມັນຍັງຖືກກໍານົດດ້ວຍອັດຕາແລກປ່ຽນ ເພາະການນໍາເຂົ້າຕ້ອງໄດ້ຊື້ເປັນເງິນຕາຕ່າງປະເທດ.

ໂດຍທ່ານ ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະ ການຄ້າ, ໄດ້ຊີ້ແຈງຕໍ່ສື່ເມື່ອວັນທີ 4 ມິນາ 2022 ທີ່ນະຄອນຫຼວງວຽງຈັນ, ກ່ຽວກັບການຄຸ້ມຄອງລາຄາສິນຄ້າໃນສະພາບລາຄານໍ້າມັນເຊື້ອໄຟເໜັງຕີງຂຶ້ນສູງ. ປັດໄຈສຳຄັນກໍຄື ສປປ ລາວ ເປັນປະເທດນໍາເຂົ້ານໍ້າມັນເຊື້ອໄຟ 100%, ເຖິງວ່າປັດຈຸບັນ ລາວເຮົາຈະມີໂຮງງານກັ່ນນໍ້າມັນໃນຂັ້ນຕອນສຸດທ້າຍໄດ້ເອງແລ້ວ; ແຕ່ວັດຖຸດິບກໍແມ່ນນໍ້າມັນທີ່ເກືອບສໍາເລັດຮູບ, ອີກທັງທາດເຄມີທີ່ນໍາໃຊ້ເຂົ້າໃນຂະບວນການກັ່ນນໍ້າມັນເຊື້ອໄຟກໍຍັງນໍາເຂົ້າຈາກຕ່າງປະເທດ 100 % ພຽງແຕ່ສາມາດປະຢັດຕົ້ນທຶນລົງໃນລະດັບໃດໜຶ່ງເທົ່ານັ້ນ.

ເວົ້າລວມແລ້ວ, ການເໜັງຕີງຂອງລາຄານໍ້າມັນເຊື້ອໄຟ, ແມ່ນເປັນບັນຫາລວມຂອງໂລກເປັນຕົ້ນແມ່ນບັນດາປະເທດຜູ້ນໍາເຂົ້າ ຊຶ່ງກໍລວມທັງ ສປປ ລາວ ທີ່ຕ້ອງໄດ້ເພິ່ງພານ້ຳມັນເຊື້ອໄຟໃນຂະບວນການຜະລິດ, ການຂົນສົ່ງສິນຄ້າ; ແນ່ນອນວ່າລາຄານ້ໍາມັນເຊື້ອໄຟຂຶ້ນ, ກໍຍ່ອມເຮັດໃຫ້ຕົ້ນທຶນຂອງສິນຄ້າສູງຂຶ້ນຕາມໆກັນ.

ເລີ່ມແຕ່ຕົ້ນປີ 2022 ລາຄານໍ້າມັນເຊື້ອໄຟສໍາເລັດຮູບໃນຕະຫຼາດໂລກໄດ້ປັບຂຶ້ນສູງແຕ່ 90-110 ໂດລາສະຫະລັດຕໍ່ບາຣ໌ເຣລ, ຊຶ່ງຖືວ່າປັບສູງເປັນປະຫວັດການ ແລະ ຍັງມີທ່າອຽງຈະປັບຂຶ້ນອີກ ເນື່ອງຈາກສະພາບການຂອງໂລກໃນປັດຈຸບັນ, ອີກທັງສະຖານະການຕືງຄຽດລະຫວ່າງ ຣັສເຊຍ ແລະ ຢູເຄຣນ ເຮັດໃຫ້ມີການກັກຕຸນນ້ຳມັນໄວ້ໃຊ້ໃນຍາມສຸກເສີນ.

ການປັບຂຶ້ນລາຄາຂາຍຍ່ອຍທີ່ເລີ່ມຈັດຕັ້ງປະຕິບັດນັບແຕ່ວັນທີ 25 ກຸມພາ 2022 ເປັນຕົ້ນມາ, ສະເພາະຈຸດນະຄອນຫຼວງວຽງຈັນ: ລາຄານໍ້າມັນແອັດຊັງພິເສດແມ່ນ16.930 ກີບຕໍ່ລິດ, ລາຄານໍ້າມັນແອັດຊັງທໍາມະດາ14.950 ກີບຕໍ່ລິດ ແລະ ລາຄານໍ້າມັນກາຊວນແມ່ນ 12.940 ກີບຕໍ່ລິດ ຊຶ່ງຖືເປັນລາຄາສູງສຸດໃນຮອບຫຼາຍປີ. ສາເຫດສໍາຄັນກໍຄືນໍ້າມັນເຊື້ອໄຟເປັນສິນຄ້ານໍາເຂົ້າຕົ້ນຕໍຂອງ ສປປ ລາວ ຊຶ່ງກວມເອົາອັດຕາສ່ວນສຳຄັນຂອງການນໍາເຂົ້າທັງໝົດ ແລະ ສາມາດເວົ້າໄດ້ວ່າ ການນໍາເຂົ້ານໍ້າມັນເຊື້ອໄຟເປັນໜຶ່ງໃນຊ່ອງທາງໄຫຼອອກຂອງເງິນຕາຕ່າງປະເທດຢູ່ ສປປ ລາວ. ຍິ່ງມີການນໍາເຂົ້າຫຼາຍເທົ່າໃດຍິ່ງຕ້ອງການນໍາໃຊ້ເງິນຕາຫຼາຍຂຶ້ນ ແລະ ຍິ່ງສົ່ງຜົນເຮັດໃຫ້ເງິນກີບອ່ອນຄ່າ.

ຂະນະທີ່ລັດຖະບານ ກໍໄດ້ມີຄວາມພະຍາຍາມເພື່ອຫຼຸດຜ່ອນຜົນກະທົບຕໍ່ເສດຖະກິດຈາກການ ເໜັງຕີງຂຶ້ນຂອງລາຄານໍ້າມັນເຊື້ອໄຟ ໂດຍຫັນສູ່ການນໍາໃຊ້ພະລັງງານທົດແທນ, ລວມທັງໄດ້ມີນະໂຍບາຍຕ່າງໆເພື່ອດຶງດູດການລົງທຶນຈາກຕ່າງປະເທດເຂົ້າໃສ່ເທຄໂນໂລຢີທີ່ນໍາໃຊ້ພະລັງງານໄຟຟ້ານໍ້າຕົກ, ພະລັງງານສະອາດ ແລະ ພະລັງງານທົດແທນອື່ນໆ. ພ້ອມນັ້ນ, ກໍຍັງລົງທຶນໃສ່ການສ້າງເສັ້ນທາງລົດໄຟຄວາມໄວສູງທີ່ຂັບເຂື່ອນດ້ວຍພະລັງງານໄຟຟ້າເພື່ອເປັນທາງເລືອກໃນການຂົນສົ່ງສິນຄ້າ ແລະ ໂດຍສານທາງບົກ. ຢ່າງໃດກໍຕາມ, ການຫັນປ່ຽນຈາກພາຫະນະທີ່ນໍາໃຊ້ນໍ້າມັນໄປສູ່ພາຫະຫະໄຟຟ້າແມ່ນຕ້ອງໃຊ້ເວລາ ແລະ ຂຶ້ນກັບຄວາມພ້ອມຂອງແຕ່ລະອົງກອນແລະບຸກຄົນ.

ລັດຖະມົນຕີກະຊວງອຸດສາຫະກຳ ແລະການຄ້າ,ໄດ້ຮຽກຮ້ອງມາຍັງທົ່ວສັງຄົມຈົ່ງມີສະຕິໃນສະພາບຄວາມຫຍຸ້ງຍາກດ້ານເສດຖະກິດດັ່ງໃນປັດຈຸບັນ,ພ້ອມທັງຕິດຕາມສະພາບການຢ່າງໃກ້ຊິດ. ທີ່ສຳຄັນຕ້ອງຊ່ວຍກັນປະຢັດມັດທະຍັດໃຊ້ຈ່າຍໃນສິ່ງທີ່ຈໍາເປັນ ແລະຫັນໄປສູ່ການຊົມໃຊ້ພະລັງງານສະອາດຫຼາຍຂຶ້ນ,ເຂົ້າຮ່ວມໃນຂະບວນການພັດທະນາແລະການດໍາລົງຊີວິດແບບຍືນຍົງ,ສົ່ງເສີມການຜະລິດສະອາດຕາມທິດສີຂຽວໂດຍນຳໃຊ້ພະລັງງານທາງເລືອກອື່ນທີ່ຍືນຍົງ.ພ້ອມນັ້ນ, ກໍຕ້ອງຕ້ານ ແລະສະກັດກັ້ນການສວຍໂອກາດຂຶ້ນລາຄາສິນຄ້າ ແລະ ກັກຕຸນສິນຄ້າກໍຄືນໍ້າມັນເຊື້ອໄຟໃນໄລຍະທີ່ລາຄານໍ້າມັນເໜັງຕີງ, ເພື່ອພ້ອມກັນກ້າວຜ່ານວິກິດໃນຄັ້ງນີ້ ແລະ ຊ່ວຍເປັນຫູເປັນຕາຫາກພົບເຫັນການສວຍໂອກາດຂຶ້ນລາຄາສິນຄ້າສາມາດໂທແຈ້ງສາຍດ່ວນ 1510 ແລະ ເວ໊ບໄຊຕ໌ປົກປ້ອງຜູ້ຊົມໃຊ້ WWW.lcp.gov.la ຊຶ່ງເຈົ້າໜ້າທີ່ກ່ຽວຂ້ອງ ຈະນຳໃຊ້ມາດຕະການທາງກົດໝາຍຕໍ່ຜູ້ລະເມີດ.

แชร์