ສານຕັດສິນປະຫານຊີວິດພໍ່ຄ້າຢາເສບຕິດລາຍໃຫຍ່ ສີສຸກ ດາວເຮືອງ

ຈາກຄະດີດັງທີ່ຕຳຫຼວດໜ່ວຍງານປາບປາມຢາເສບຕິດ, ໄດ້ບຸກຈັບເປົ້າໝາຍຄ້າຂາຍຢາເສບຕິດລາຍໃຫຍ່ ໃນເວລາ 1:00 ໂມງຂອງວັນທີ 1 ເມສາ 2017. ຫຼ້າສຸດ, ສານປະຊາຊົນນະຄອນ ຫຼວງວຽງຈັນ, ໄດ້ຕັດສິນຄະດີ ທ້າວ ສີສຸກ ດາວເຮືອງ (ຈຳເລີຍ 1) ອາຍຸ 45 ປີ, ນັກທຸລະກິດ ຢູ່ບ້ານຂຸນຕາທົ່ງ ເມືອງສີໂຄດຕະບອງ ນະຄອນຫຼວງວຽງຈັນ, ໃນສະຖານການຄ້າຂາຍຢາເສບຕິດ, ການຟອກເງິນ ແລະ ການຊື້ຂາຍອາວຸດເສິກໂດຍບໍ່ຖືກຕ້ອງຕາມກົດໝາຍ ດ້ວຍການປະຫານຊີວິດ ແລະ ຮິບຊັບທີ່ກ່ຽວກັບການກະທຳຜິດ.

ພ້ອມນັ້ນ, ສານກໍໄດ້ຕັດສິນຈຳຄຸກພັກພວກທີ່ຮ່ວມຂະບວນການອີກ 4 ຄົນຄື: ທ້າວ ຜ່ອງສີ ນວນນີວົງ (ຈຳເລີຍ 2) ອາຍຸ 44 ປີ, ນັກທຸລະກິດ ບ້ານນາ ເມືອງໄຊທານີ ນະຄອນຫຼວງວຽງຈັນໃນສະຖານ: ມີຢາເສບຕິດໄວ້ໃນຄອບຄອງ ( ຢາໄອສ໌ ), ການຟອກເງິນ, ການຊື້ຊັບພົນລະເມືອງຜິດກົດໝາຍ ແລະ ການໃຊ້ເອກະສານປອມ, ຖືກຕັດສິນຈໍາຄຸກ 7 ປີ 3 ເດືອນ; ນາງ ອຸໄລວັນ ພາວິວົງກອນ (ຈຳເລີຍ 3) ອາຍຸ 60 ປີ, ຄ້າຂາຍ ບ້ານປາກກະດິງເໜຶອ ເມືອງປາກກະດິງ ແຂວງບໍລິຄຳໄຊ, ຄ້າຂາຍຢາເສບຕິດ ແລະ ການຟອກເງິນ ຕັດສິນຈຳຄຸກຕະຫຼອດຊີວິດ; ທ້າວ ທົງໄຊ (ຈຳເລີຍ 4) ອາຍຸ 27 ປີ, ກຳມະກອນ ບ້ານໜອງປາໄນ ເມືອງສີໂຄດຕະບອງ, ມີຢາເສບຕິດໄວ້ໃນຄອບຄອງ (ຢາອີ) ແລະ ມີອາວຸດເສິກໄວ້ໃນຄອບຄອງບໍ່ຖືກຕ້ອງຕາມກົດໝາຍ ຕັດສິນ 7 ປີ ແລະ ທ້າວ ວິປະກອນ ບຸນຜາປະເສີດ (ຈຳເລີຍ 5) ອາຍຸ 28 ປີ, ພະນັກງານ ບ້ານໂພນທັນ ເມືອງໄຊເສດຖາ ນະຄອນຫຼວງວຽງຈັນ, ຊື້-ຂາຍອາວຸດເສິກໂດຍບໍ່ຖືກຕ້ອງຕາມກົດໝາຍ ຕັດສິນຈຳຄຸກ 4 ປີ 11 ເດືອນ 11 ວັນ ພ້ອມຮິບຊັບສິນຈໍານວນໜຶ່ງ.

ໂດຍກຳລັງປ້ອງກັນຄວາມສະຫງົບ ໄດ້ລາຍງານກ່ຽວກັບເລື່ອງນີ້ເມື່ອວັນທີ 3 ມີນາ 2022, ພ້ອມລະບຸເນື້ອໃນສຳນວນຄະດີທີ່ກ່ຽວຂ້ອງກັບການກະທຳຜິດຂອງຈຳເລີຍທັງ 5.

แชร์