ລາຄານໍ້າມັນດິບພຸ່ງເຖິງ 119 ໂດລາຕໍ່ບາຣ໌ເຣລ ສິນຄ້າອື່ນກໍແລ່ນຂຶ້ນຕາມກັນ

ມີການປັບຂຶ້ນລາຄານໍ້າມັນດິບເຖິງ 119 ໂດລາສະຫະລັດຕໍ່ບາຣ໌ເຣລ, ເພາະຕະຫຼາດເກີດຄວາມກັງວົນຕໍ່ລະບົບຕ່ອງໂສ້ການສະໜອງນໍ້າມັນດິບຣັສເຊຍ. ຊຶ່ງທະນາຄານເພື່ອການລົງທຶນຂ້າມຊາດ ແລະບໍລິສັດໃຫ້ບໍລິການທາງການເງິນຂອງອະເມຣິກາ (ໂກລດ໌ແມນແຊຄສ໌) ກໍໄດ້ຄາດຄະເນວ່າ: ໂລກອາດຈະຜະເຊີນກັບພາວະເງິນເຟີ້, ສ່ວນລາຄາສິນຄ້າປະເພດອື່ນໆກໍແລ່ນຂຶ້ນຕາມລາຄານໍ້າມັນ.

ສຳນັກຂ່າວຕ່າງປະເທດຊຶ່ງລາຍງານເມື່ອວັນທີ 3 ມີນາ 2022, ໄດ້ລະບຸປັດໄຈທີ່ເຮັດໃຫ້ມີການປັບຂຶ້ນລາຄານໍ້າມັນດິບໃນຕະຫຼາດໂລກແມ່ນໄດ້ຮັບຜົນກະທົບມາຈາກວິກິດຄວາມຂັດແຍ່ງ ຣັສເຊຍ-ຢູເຄຣນ, ຊຶ່ງລາຄານໍ້າມັນເບຣນທ໌ ປັບຕົວສູງຂຶ້ນເຖິງ 119 ໂດລາຕໍ່ບາຣ໌ເຣລ ແລະ ນັບວ່າເປັນການປັບຕົວສູງຂຶ້ນເກືອບ 20% ແລ້ວໃນຮອບສັບປະດາ. ດ້ານນໍ້າມັນດິບ ດັບເບິລຢູທີໄອ ກໍປັບຕົວສູງຂຶ້ນເປັນ 116,57 ໂດລາຕໍ່ບາຣ໌ເຣລ, ຊຶ່ງນັບເປັນລາຄາສູງທີ່ສຸດຕັ້ງແຕ່ປີ 2008 ເປັນຕົ້ນມາ. ຂະນະທີ່ລາຄາຖ່ານຫິນ, ກ໊າຊທຳມະຊາດ, ໄປຈົນເຖິງອະລູມິນຽມ ກໍປັບຕົວຂຶ້ນເຊັ່ນກັນ, ອັນເປັນຜົນມາຈາກການທີ່ຊາດຕາເວັນຕົກ ປະກາດຂວໍ້າບາດທາງເສດຖະກິດຕໍ່ຣັສເຊຍ.

ຂະນະທີ່ລາຄາສິນຄ້າທຸກປະເພດ ນັບຕັ້ງແຕ່ເຂົ້າສາລີ (Triticum spp) ຊຶ່ງເປັນຈໍາພວກທັນຍະພືດ, ລວມເຖິງເຂົ້າບາຣ໌ເລຍ໌ ແລະ ປຸ໋ຍກໍປັບເພີ່ມຂຶ້ນ, ເຖິງແມ່ນວ່າປະລິມານເຂົ້າກິນໃນຕະຫຼາດໂລກຈະຍັງຄົງມີຢູ່ຫຼວງຫຼາຍ, ເນື່ອງຈາກອິນເດຍເປັນຜູ້ສົ່ງອອກເຂົ້າກິນລາຍໃຫຍ່ຂອງໂລກ ແລະ ມີການສົ່ງອອກເຂົ້າກິນຫຼາຍຂຶ້ນ, ຊຶ່ງປະລິມານເຂົ້າກິນທົ່ວໂລກຈະເພີ່ມຂຶ້ນປະມານ 4 ແສນໂຕນ, ແຕ່ຫາກວ່າລາຄາເຂົ້າກິນກໍພຸ່ງຂຶ້ນ 4,2% ແຕະທີ່ 16,89 ໂດລາຕໍ່ 100 ປອນດ໌ (ປະມານ 45,3 ກິໂລກຣາມ) ນັບເປັນລະດັບສູງສຸດນັບຕັ້ງແຕ່ເດືອນພຶດສະພາ 2020 ແລະ ຕະຫຼອດທັງສັບປະດານີ້, ຊຶ່ງເຫັນວ່າລາຄາເຂົ້າກິນມີທ່າອຽງຈະພຸ່ງຂຶ້ນອີກ 11% ທັງນີ້, ເປັນການປັບຕົວຂຶ້ນຫຼາຍທີ່ສຸດນັບຕັ້ງແຕ່ປີ 2018.

แชร์