ຫຼວງພຣະບາງ ຮັບ 4 ລາງວັນມາດຕະຖານທ່ອງທ່ຽວອາຊຽນ

ງານມະຫະກໍາການທ່ອງທ່ຽວອາຊຽນ ປະຈຳປີ 2022 ຊຶ່ງຈັດຂຶ້ນເມື່ອລະຫວ່າງວັນທີ 16-22 ມັງກອນຜ່ານມາ, ທີ່ແຂວງສີຫານຸ ປະເທດກໍາປູເຈຍ. ພິເສດໃນງານຄັ້ງນີ້, ໄດ້ມີການຈັດພິທີມອບ-ຮັບລາງວັນມາດຕະຖານການທ່ອງທ່ຽວອາຊຽນ, ຊຶ່ງແຂວງຫຼວງພຣະບາງ ກໍສາມາດຄວ້າໄດ້ລາງວັນມາດຕະຖານການທ່ອງທ່ຽວອາຊຽນ 4 ລາງວັນຄື: ລາງວັນມາດຕະຖານເມືອງທ່ອງທ່ຽວສະອາດອາຊຽນ ນະຄອນຫຼວງພຣະບາງ ເປັນຄັ້ງທີສອງ (1 ລາງວັນ), ລາງວັນການທ່ອງທ່ຽວແບບຍືນຍົງອາຊຽນ ແຫຼ່ງທ່ອງທ່ຽວນໍ້າຕົກຕາດກວາງຊີ (1 ລາງວັນ) ແລະ ລາງວັນມາດຕະຖານໂຮງແຮມຂຽວອາຊຽນ (2 ລາງວັນ) ມີ 2 ແຫ່ງຄື: ໂຮງແຮມເດິແກຣນ ແລະ ໂຮງແຮມສຸວັນນະພູມ.

ສຳລັບລາງວັນມາດຕະຖານການທ່ອງທ່ຽວອາຊຽນ ລວມມີ 4 ປະເພດຄື: 1. ມາດຕະຖານໂຮງແຮມຂຽວອາຊຽນ ປະເທດລະ 5 ລາງວັນ; 2. ມາດຕະຖານເມືອງທ່ອງທ່ຽວສະອາດອາຊຽນ ປະເທດລະ 3 ລາງວັນ; 3. ມາດຕະຖານ ສະຖານທີ່ຈັດງານອາຊຽນ ປະເພດຫ້ອງປະຊຸມ ປະເທດລະ 5 ລາງວັນ, ປະເພດສະຖານທີ່ຈັດງານວາງສະແດງ ປະເທດລະ 5 ລາງວັນ; 4. ລາງວັນການທ່ອງທ່ຽວແບບຍືນຍົງອາຊຽນ ປະເທດລະ 2 ລາງວັນ (ມີຜະລິດຕະພັນທ່ອງທ່ຽວເຂດຕົວເມືອງ 1 ລາງວັນ ແລະ ຜະລິດຕະພັນທ່ອງທ່ຽວເຂດຊົນນະບົດ 1 ລາງວັນ).

ປີ 2022 ນີ້ ລາງວັນທີ່ໄດ້ຮັບທັງໝົດຢູ່ບັນດາປະເທດອາຊຽນ ມີຈໍານວນ 145 ລາງວັນ. ໃນນັ້ນ, ລາງວັນມາດຕະຖານລວມມີ 17 ລາງວັນຄື: ມາດຕະຖານໂຮງແຮມຂຽວອາຊຽນ 5 ລາງວັນ, ມາດຕະຖານເມືອງທ່ອງທ່ຽວສະອາດອາຊຽນ 3 ລາງວັນ, ມາດຕະຖານ ສະຖານທີ່ຈັດງານອາຊຽນ, ປະເພດຫ້ອງປະຊຸມ 5 ລາງວັນ, ປະເພດສະຖານທີ່ຈັດງານວາງສະແດງ 2 ລາງວັນ ແລະ ລາງວັນການທ່ອງທ່ຽວແບບຍືນຍົງອາຊຽນ 2 ລາງວັນ. ຊຶ່ງ ສປປ ລາວ, ສາມາດຍາດໄດ້ 4 ປະເພດລາງວັນມາດຕະຖານ.

ຢ່າງໃດກໍດີ, ໃນໄລຍະຜ່ານມາ (ນັບແຕ່ປີ 2018-2020) ແຂວງຫຼວງພຣະບາງ ກໍສາມາດຍາດໄດ້ລາງວັນມາດຕະຖານການທ່ອງທ່ຽວອາຊຽນ ເຖິງ 17 ລາງວັນຄື: ລາງວັນມາດຕະຖານເມືອງທ່ອງທ່ຽວສະອາດ ອາຊຽນ 1 ລາງວັນ ໃນ 2018 ໂດຍແມ່ນນະຄອນຫຼວງພຣະບາງ ໄດ້ຮັບລາງວັນ, ລາງວັນການທ່ອງທ່ຽວແບບຍືນຍົງອາຊຽນ 2 ລາງວັນ (ປີ 2018 ແມ່ນແຫຼ່ງທ່ອງທ່ຽວພູສີ ແລະ ປີ 2020 ແມ່ນແຫຼ່ງທ່ອງທ່ຽວວັດຊຽງທອງ), ລາງວັນມາດຕະຖານສະຖານທີ່ຈັດງານອາຊຽນ 2 ລາງວັນ (2017 ແລະ 2020), ລາງວັນມາດຕະຖານຫ້ອງນໍ້າສາທາລະນະອາຊຽນ 1 ແຫ່ງ (2018-2020), ລາງວັນມາດຕະຖານນວດແຜນບູຮານອາຊຽນ 2 ແຫ່ງ (2018 ແລະ 2020) ແລະລາງວັນມາດຕະຖານໂຮງແຮມຂຽວອາຊຽນ 9 ແຫ່ງ (2017-2020). ລວມແລ້ວນັບມາຮອດປີ 2022, ແຂວງຫຼວງພຣະບາງ ສາມາດຍາດໄດ້ລາງວັນມາດຕະຖານການທ່ອງທ່ຽວອາຊຽນ ທັງໝົດ 21 ລາງວັນ ແລະລາງວັນທີ່ໄດ້ຮັບໃນຄັ້ງນີ້ແມ່ນມີອາຍຸການ 2 ປີ, ເມື່ອຄົບກໍານົດກໍຈະໄດ້ມີການປະເມີນ ແລະສະເໜີຮັບລາງວັນຄືນໃໝ່ຕາມເປົ້າໝາຍຂອງມາດຕະຖານ ແລະ ເງື່ອນໄຂທີ່ກຳນົດໄວ້.

ພິທີມອບ-ຮັບລາງວັນມາດຕະຖານການທ່ອງທ່ຽວອາຊຽນ ປະຈຳປີ 2022 ແຂວງຫຼວງພຣະບາງ ໄດ້ຈັດຂຶ້ນທີ່ຫໍປະຊຸມພູສີ ຫໍພິພິທະພັນແຫ່ງຊາດຫຼວງພຣະບາງ ເມື່ອວັນທີ 2 ມີນາຜ່ານມາ,ໂດຍການເຂົ້າຮ່ວມຂອງ ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພຣະບາງ, ມີເຈົ້ານະຄອນຫຼວງພຣະບາງ, ຫົວໜ້າພະແນກ ຖວທ ແຂວງ, ບັນດາກົມໃນກະຊວງ ຖວທ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃຫ້ກຽດຂຶ້ນຮັບລາງວັນມາດຕະຖານເມືອງທ່ອງທ່ຽວສະອາດອາຊຽນ ຄັ້ງທີ 2 (ນະຄອນຫຼວງພຣະບາງ) ໂດຍແມ່ນທ່ານ ວຽງທອງ ຫັດສະຈັນ ເຈົ້ານະຄອນຫຼວງພຣະບາງ, ລາງວັນການທ່ອງທ່ຽວແບບຍືນຍົງອາຊຽນ (ແຫຼ່ງທ່ອງທ່ຽວສວນອຸທິຍານນໍ້າຕົກຕາດກວາງຊີ) ແມ່ນ ທ່ານ ນາງ ສຸດາພອນ ຄົມທະວົງ ຫົວໜ້າພະແນກ ຖວທ ແຂວງ, ລາງວັນມາດຕະຖານໂຮງແຮມຂຽວອາຊຽນ 2 ລາງວັນ ໂດຍແມ່ນຜູ້ອຳນວຍການໂຮງແຮມເດິແກຣນ ແລະໂຮງແຮມສຸວັນນະພູມ. ທັງນີ້, ໃຫ້ກຽດມອບລາງວັນໂດຍທ່ານ ນາງ ສວນສະຫວັນ ວິຍະເກດ.

แชร์