ເນລະຄຸນ ຂ້າແມ່ໝູ່! ຮັບເຄີຍພັກເຊົາຢູ່ກິນເຮືອນຜູ້ຕາຍເປັນປະຈຳ

ຍ້ອນໄຟການພະນັນເຜົາໃຈຈິ່ງເຮັດໃຫ້ຊາຍໜຸ່ມຂາດສະຕິຈົນເຖິງຂັ້ນເນລະຄຸນຄອບຄົວໝູ່ທີ່ຕົນເຄີຍພັກອາໄສໃນເຮືອນຫຼັງນັ້ນເປັນປະຈຳ, ການຕິດພະນັນ ແລະ ເປັນໜີ້ຈຳນວນຫຼາຍ ນຳໄປສູ່ການກໍ່ເຫດຄາຕະກຳແມ່ຂອງໝູ່; ນີ້ລະເພິ່ນວ່າຮູ້ໜ້າບໍ່ຮູ້ໃຈ!.

ລາຍງານຂ່າວຂອງກຳລັງປ້ອງກັນຄວາມສະຫງົບ ໃນວັນທີ 4 ມີນາ 2022 ຊຶ່ງອ້າງການເປີດເຜີຍຂອງເຈົ້າໜ້າທີ່ ປກສ ແຂວງຈຳປາສັກ ທີ່ລະບຸວ່າ: ເມື່ອວັນທີ 28 ກຸມພາຜ່ານມາ, ເຈົ້າໜ້າທີ່ ປກສ ແຂວງ ໄດ້ຮັບລາຍງານເຫດຄາຕະກຳຢູ່ບ້ານໜອງຫອຍ, ເມືອງຊະນະສົມບູນ ແຂວງຈຳປາສັກ. ຫຼັງຈາກນັ້ນຈິ່ງໄດ້ປະສານສົມທົບກັບພາກສ່ວນທີ່ກ່ຽວຂ້ອງລົງຊັນນະສູດສະຖານທີ່ເກີດເຫດ ຈິ່ງຮູ້ວ່າຜູ້ເຄາະຮ້າຍຊື່ນາງ ຄຳມະນີ ອາຍຸ 44 ປີ ຢູ່ບ້ານໜອງຫອຍ ເສຍຊີວິດດ້ວຍການຖືກຕີເຂົ້າທີ່ບໍລິເວນຫົວ ແລະ ໃບໜ້າ.

ຈາກນັ້ນ, ເຈົ້າໜ້າທີ່ກໍໄດ້ຂຶ້ນບັນຊີເປົ້າໝາຍ ຈິ່ງຮູ້ວ່າຜູ້ກໍ່ເຫດຊື່ ທ້າວ ເພັດສະໝອນ ຫຼື ເຟມ ຢູ່ບ້ານນາຊອນ ເມືອງຊະນະສົມບູນ ແຂວງຈຳປາສັກ, ຊຶ່ງຜູ້ກ່ຽວຖືກຈັບຕົວໄດ້ໃນວັນກໍ່ເຫດ. ຜ່ານການສອບສວນຂອງເຈົ້າໜ້າທີ່, ທ້າວ ເຟມ ຮັບສາລະພາບວ່າ: ຕົນເອງໄດ້ຮູ້ຈັກກັບ ນາງ ແປ ອາຍຸ 24 ປີ ແລະ ນາງ ພອນ ອາຍຸ 21 ປີ (ເອື້ອຍນ້ອງກັນ) ແລະ ເປັນລູກສາວຂອງຜູ້ເສຍຊີວິດ, ຄວາມລຶ້ງເຄີຍກັບສອງເອື້ອຍນ້ອງເລີ່ມມາແຕ່ປີ 2017 ໂດຍໄດ້ໄປມາຫາສູ່ກັນ ແລະ ມາພັກເຊົາຢູ່ເຮືອນຂອງຜູ້ເສຍຊີວິດເປັນປະຈຳ. ແຕ່ນັບຈາກປີ 2020 ມາຮອດປັດຈຸບັນ, ຕົນໄດ້ເປັນໜີ້ການພະນັນ ແລະ ຕິດໜີ້ໝູ່ຫຼາຍຄົນລວມເປັນເງິນ 16 ລ້ານກີບ.

ມາຮອດ ວັນທີ 27 ກຸມພາ 2022, ທ້າວ ເຟມ ໄດ້ມາຫຼິ້ນຢູ່ເຮືອນນາງ ພອນ ແລະ ສັງເກດເຫັນ ນາງ ຄຳມະນີ ໃສ່ສາຍແຂນຄຳ ຈິ່ງເກີດມີແນວຄິດຢາກໄດ້ເພື່ອເອົາໄປຂາຍນໍາເງິນມາໃຊ້ໜີ້, ຈິ່ງຄິດວາງແຜນຄາຕະກຳ; ມາຮອດວັນທີ 28 ກຸມພາ ເວລາ 10:00 ໂມງ ຜູ້ກ່ຽວໄດ້ຂີ່ລົດຈັກມາຈອດໄວ້ຢູ່ໃກ້ເຮືອນຂອງຜູ້ເສຍຊີວິດ. ຫຼັງຈາກນັ້ນກໍປີນຮົ້ວເຂົ້າໄປໃນເຮືອນ ແລະ ເຫັນນາງ ຄໍາມະນີ ນັ່ງເຂັນຝ້າຍຢູ່ໃນເຮືອນຄົນດຽວ, ຈິ່ງໄດ້ເອົາໄມ້ຄ້ອນ 4 ຫຼ່ຽມທີ່ກຽມມາພ້ອມຕີໃສ່ຫົວ ແລະ ໃບໜ້າຂອງນາງ ຄຳມະນີ ຈົນເສຍຊີວິດ. ແລ້ວປົດເອົາສາຍແຂນຄຳ 1 ເສັ້ນ ໜັກ 1 ບາດ ແລະ ຂີ່ລົດຈັກຫຼົບໜີເຂົ້ານະຄອນປາກເຊເພື່ອເອົາຄຳໄປຂາຍ ໄດ້ເງິນ 10.100.000 ກີບ, ຮອດເວລາ 16:00 ໂມງກໍຖືກເຈົ້າໜ້າທີ່ຈັບຕົວໄດ້.

ເມື່ອວັນທີ 2 ມີນາ 2022, ເຈົ້າໜ້າທີ່ຈິ່ງໄດ້ນຳຕົວທ້າວ ເຟມ ໄປທົດສະກຳເຫດການຄືນເພື່ອເປັນຫຼັກຖານປະກອບສຳນວນຄະດີ, ກ່ອນສົ່ງໄອຍະການຟ້ອງສານຕັດສິນ.

แชร์