ຮອງປະທານປະເທດ ຍົກຈັນຍາບັນ ຈັນຍາທຳ ເປັນສະຕິສຳຄັນຂອງສານປະຊາຊົນ

1 ໃນ 7 ບັນຫາສຳຄັນທີ່ ທ່ານ ນາງ ປານີ ຢາທໍ່ຕູ້, ກຳມະການກົມການເມືອງສູນກາງພັກ ຮອງປະທານປະເທດ, ໄດ້ໂອ້ລົມພະນັກງານຫຼັກແຫຼ່ງຂອງສານປະຊາຊົນ ກໍຄືສຶກສາອົບຮົມການເມືອງແນວຄິດໃຫ້ພະນັກງານຂອງສານມີຈິນຕະນາການທີ່ຖືກຕ້ອງ, ມີຈິດໃຈຮັບໃຊ້ປະຊາຊົນ ແລະຮັກສາຈັນຍາບັນ-ຈັນຍາທັມ ໃນການປະຕິບັດໜ້າທີ່, ໃຫ້ພະນັກງານສານມີນໍ້າໃຈຮັກຊາດ, ຮັກປະຊາຊົນ ແລະ ຮັກຄວາມຍຸຕິທັມຢ່າງແທ້ຈິງ.

ໂດຍຮອງປະທານປະເທດ, ໄດ້ເຂົ້າຮ່ວມກອງປະຊຸມສະຫຼຸບການເຄື່ອນໄຫວວຽກງານປະຈຳປີ 2021 ແລະ ທິດທາງແຜນການປີ 2022 ຂອງສານປະຊາຊົນ, ເມື່ອວັນທີ 2 ມີນາ 2022 ທີ່ນະຄອນຫຼວງວຽງຈັນ, ພາຍໃຕ້ການເປັນປະທານຂອງ ທ່ານ ນາງ ວຽງທອງ ສີພັນດອນ ຄະນະເລຂາທິການສູນກາງພັກ, ເລຂາຄະນະບໍລິຫານງານພັກ ປະທານສານປະຊາຊົນສູງສຸດ, ຊຶ່ງມີຮອງປະທານ, ປະທານສານປະຊາຊົນແຂວງ, ສານເຂດທົ່ວປະເທດເຂົ້າຮ່ວມ.

ທັງນີ້, ທ່ານ ນາງ ປານີ ຢາທໍ່ຕູ້ ໄດ້ຊົມເຊີຍຕໍ່ຄະນະພັກ, ຄະນະນຳຂອງສານປະຊາຊົນສູງສຸດ ແລະ ສານປະຊາຊົນແຕ່ລະຂັ້ນທີ່ຍາດໄດ້ຜົນງານຫຼາຍດ້ານ, ເປັນຕົ້ນແມ່ນການສຶກສາອົບຮົມແນວຄິດຂອງຜູ້ພິພາກສາ, ພະນັກງານສານ, ການປັບປຸງແບບແຜນກົນໄກການບໍລິຫານສານໄດ້ຮັບການປັບປຸງດີຂຶ້ນ, ການເຮັດວຽກປະຕິບັດຕາມຫຼັກການລວມສູນປະຊາທິປະໄຕ, ນຳພາເປັນໝູ່ຄະນະ, ບຸກຄົນຮັບຜິດຊອບ ແລະ ສາມາດຮັກສາໄດ້ຄວາມສາມັກຄີ. ປະຕິບັດໜ້າທີ່ການເມືອງມີຜົນສຳເລັດ, ມີອັນປ່ຽນແປງໃໝ່ຢ່າງຕັ້ງໜ້າ.

ຢ່າງໃດກໍດີ, ເພື່ອເຮັດໃຫ້ການແກ້ໄຂຄະດີມີຄວາມວ່ອງໄວ, ໂປ່ງໃສ, ຖືກຕ້ອງ ແລະ ຮັບປະກັນຄວາມຍຸຕິທັມໃນສັງຄົມ. ເພື່ອຮັກສາຜົນງານ ແລະ ຜົນສຳເລັດດັ່ງກ່າວໃຫ້ມີລັກສະນະຍືນຍົງ, ຊຶ່ງຮອບປະທານປະເທດ ກໍໄດ້ມີທິດຊີ້ນຳໃຫ້ເອົາໃຈໃສ່ 7 ບັນຫາສຳຄັນຄື: 1. ສຶກສາອົບຮົມການເມືອງແນວຄິດ. 2. ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ກ່ຽວກັບການດຳເນີນຄະດີຕາມຂະ ບວນການຍຸຕິທຳ ກໍຄືມະຕິ 112/ກມສພ ລົງວັນທີ 2 ມິຖຸນາ 2021 ວ່າດ້ວຍການຍົກສູງປະສິດທິພາບໃນການດໍາເນີນຄະດີຕາມຂະບວນຍຸຕິທໍາ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ກໍຄືແຜນພັດທະນາລະບົບສານປະຊາຊົນໃຫ້ປະກົດຜົນເປັນຈິງ. 3. ສຸມໃສ່ສ້າງພະນັກງານຂອງສານໃຫ້ມີຄວາມຮູ້, ຄວາມສາມາດ, ມີຄວາມເປັນຊ່ຽວຊານ ແລະ ເປັນມືອາຊີບສະເພາະດ້ານ, ຫັນພະນັກງານລົງຮາກຖານ, ຄົ້ນຄວ້າສັບຊ້ອນໃຫ້ຖືກຕ້ອງ ແລະເໝາະສົມກັບພາລະບົດບາດ, ຄວາມຮູ້ຄວາມສາມາດ ແລະ ຕໍາແໜ່ງງານ. 4. ເອົາໃຈໃສ່ຄຸ້ມຄອງນຳໃຊ້ຊັບສົມບັດຂອງລັດຢູ່ສານປະຊາຊົນໃຫ້ມີປະສິດທິພາບ, ເກີດຜົນປະໂຫຍດສູງສຸດແກ່ປະເທດຊາດ ແລະ ປະຊາຊົນ, ຄຸ້ມຄອງລາຍຈ່າຍງົບປະມານ, ຮັບປະກັນການເບີກຈ່າຍ, ການສະຫຼຸບໃຫ້ມີຄວາມໂປ່ງໃສ ແລະ ຖືກຕ້ອງ. 5) ເອົາໃຈໃສ່ປັບປຸງແບບແຜນ, ກົນໄກການດຳເນີນຄະດີໃຫ້ໂປ່ງໃສໃນທຸກຂັ້ນຕອນ ແລະສາມາດກວດສອບໄດ້. 6) ເອົາໃຈໃສ່ຄົ້ນຄວ້າ, ໂຄສະນາເຜີຍແຜ່ກົດໝາຍໃຫ້ສັງຄົມເຂົ້າໃຈຕໍ່ກົດໝາຍ, ຍົກສູງສະຕິກົດໝາຍໃຫ້ສູງຂຶ້ນ ແລະ 7) ເອົາໃຈໃສ່ປະສານສົມທົບກັບຄະນະພັກ, ອຳນາດການປົກຄອງຂັ້ນຂອງຕົນເພື່ອຂໍຄຳຄິດຄຳເຫັນ, ຂໍທິດຊີ້ນຳ ແລະ ອຳນວຍຄວາມສະດວກໃນການເຄື່ອນໄຫວວຽກງານຂອງສານ. ໂດຍສະເພາະການເກັບກຳຂໍ້ມູນຫຼັກຖານ, ຊີ້ແຈງ ແລະ ສະໜອງຂໍ້ມູນຫຼັກຖານໃຫ້ແກ່ສານເພື່ອເຮັດໃຫ້ຄະດີມີຄວາມແຈ້ງຂາວ.

ຢ່າງໃດກໍຕາມ, ທ່າມກາງເງື່ອນໄຂແຫ່ງການປະຕິບັດກົນໄກເສດຖະກິດຕະຫຼາດ, ຄວາມຫຍຸ້ງຍາກທາງດ້ານເສດຖະກິດການເຊື່ອມໂຍງກັບສາກົນ, ບວກກັບກຸ່ມຄົນບໍ່ດີ ແລະ ກຳລັງປໍລະປັກໄດ້ດຳເນີນສົງຄາມຫັນປ່ຽນໂດຍສັນຕິ; ຊຶ່ງຮອງປະທານປະເທດໄດ້ຮຽກຮ້ອງໃຫ້ສະມາຊິກພັກ-ພະນັກງານສານປະຊາຊົນຈົ່ງມີການວາງມາດຕະການລະອຽດ, ເຂັ້ມງວດ, ເອົາໃຈໃສ່ຕິດຕາມ ແລະ ກວດກາເປັນປົກກະຕິເພື່ອຮັບປະກັນໃຫ້ວຽກງານດຳເນີນໄປຕາມລະບຽບຫຼັກການ ແລະ ກົດໝາຍ.

แชร์