ອະດີດປະທານປະເທດ ຢ້ຽມຢາມຫຼວງພຣະບາງ

ທ່ານ ບຸນຍັງ ວໍລະຈິດ ອະດີດເລຂາທິການໃຫຍ່ ອະດີດປະທານປະເທດ ແຫ່ງ ສປປ ລາວ,ພ້ອມດ້ວຍພັນລະຍາ ແລະ ຄະນະນໍາກະຊວງ, ການນໍາຈາກສູນກາງ ໄດ້ເດີນທາງຢ້ຽມຢາມແຂວງຫຼວງພຣະບາງ. ໂດຍທັງຄະນະ, ໄດ້ຢ້ຽມຊົມແຫຼ່ງທ່ອງທ່ຽວສຳຄັນ ແລະ ການຜະລິດຫັດຖະກຳທີ່ມີຊື່ສຽງຂອງແຂວງ.

ໃຫ້ການຕ້ອນຮັບຄະນະເມື່ອວັນທີ 2 ມີນາ 2022, ໂດຍທ່ານ ຄໍາຂັນ ຈັນທະວີສຸກ ກໍາມະການສູນກາງພັກ, ເລຂາພັກແຂວງ ເຈົ້າແຂວງຫຼວງພຣະບາງ, ພ້ອມດ້ວຍການນໍາແຂວງ ແລະ ພະ ນັກງານໃນພະແນກການຕ່າງໆ. ຊຶ່ງໃນວາລະຢ້ຽມຢາມເມືອງມໍລະດົກໂລກຄັ້ງນີ້, ທ່ານ ບຸນຍັງ ວໍລະຈິດໄດ້ໄປທ່ຽວຊົມສວນອຸທິຍານດອກໄມ້ ແລະ ທໍາມະຊາດນໍ້າຕົກຕາດຮ້ອຍຄົວ ທີ່ເມືອງຈອມເພັດ, ໂດຍການຕ້ອນຮັບຂອງ ທ່ານ ສາຍສະໝອນ ສີລາວົງ ເຈົ້າເມືອງ, ພ້ອມດ້ວຍຄະນະນໍາຂອງເມືອງ ແລະທ່ານ ອາຄົມ ພົມມະຫານ ປະທານສະມາຄົມນັກທຸລະກິດໜຸ່ມແຂວງຫຼວງພຣະບາງ, ທັງເປັນຜູ້ອໍານວຍການສວນອຸທິຍານດອກໄມ້ນໍ້າຕົກຕາດຮ້ອຍຄົວ. ຊຶ່ງເປັນອີກໜຶ່ງແຫຼ່ງທ່ອງທ່ຽວທີ່ມີອາກາດສົດຊື່ນ, ອ້ອມຮອບດ້ວຍຕົ້ນໄມ້ໃຫຍ່ ແລະ ມີທົ່ງດອກໄມ້ຕາມລະດູການເບັ່ງບານຢ່າງສວຍງາມ ແລະ ໜ້າປະທັບໃຈ. ພ້ອມນີ້, ທັງຄະນະກໍໄດ້ໄປຢ້ຽມຢາມສູນຫັດຖະກໍາເຄື່ອງປັ້ນດິນເຜົາບ້ານຈ່ານເໜືອ ເມືອງຈອມເພັດຕື່ມອີກ.

ສໍາລັບສູນຫັດຖະກໍາເຄື່ອງປັ້ນດິນເຜົາບ້ານຈ່ານເໜືອ, ຕັ້ງຢູ່ຫ່າງຈາກຕົວເມືອງໄປທາງໃຕ້ປະມານ 3 ກິໂລແມັດ, ລຽບຕາມແຄມແມ່ນໍ້າຂອງ. ພາຍໃນປະກອບດ້ວຍສູນສາທິດການປັ້ນໝໍ້, ຫຼໍ່ໄຫ, ຫໍວາງສະແດງເຄື່ອງປັ້ນດິນເຜົາ ແລະ ເຕົາອົບເຄື່ອງປັ້ນດິນເຜົາ. ຊຶ່ງປະຊາຊົນໃນເຂດນີ້ມີມູນເຊື້ອປັ້ນໝໍ້, ຫຼໍ່ໄຫ ແລະ ເຄື່ອງໃຊ້ທີ່ເຮັດດ້ວຍດິນ ເພື່ອຊົມໃຊ້ໃນຄົວເຮືອນ ແລະ ປະດັບເຮືອນ ມາແຕ່ສະໄໝບູຮານ. ປັດຈຸບັນ, ອົງການປົກຄອງແຂວງ ກໍໄດ້ຫັນເປັນສະຖານທີ່ທ່ອງທ່ຽວ ແລະ ວາງສະແດງຂອງທີ່ລະນຶກປະເພດເຄື່ອງປັ້ນດິນເຜົາ, ພ້ອມຊຸກຍູ້ໃຫ້ປະຊາຊົນຜະລິດເປັນສິນຄ້າສົ່ງອອກ ແລະ ສູນຫັດຖະກໍາແຫ່ງນີ້, ກໍໄດ້ຮັບປ້າຍສັນຍະລັກ ສູນຫັດຖະກໍາໂອດ໊ອບ ຂອງເມືອງຕື່ມອີກ.ດັ່ງນັ້ນ, ສູນຫັດຖະກໍາດັ່ງກ່າວຈິ່ງມີຄຸນຄ່າທາງສິລະປະທີ່ຄວນຄ່າແກ່ການອະນຸຮັກ.

แชร์