4-8 ມີນາ ເຊີນທ່ຽວງານສືບສານສີມືແມ່ ທີ່ສວນເຈົ້າອານຸວົງ

ງານປະເພນີສືບສານສີມືແມ່ ຄັ້ງທີ I ຊຶ່ງຈະຈັດຂຶ້ນໃນໂອກາດສະເຫຼີມສະຫຼອງ ວັນແມ່ຍິງສາກົນ ຄົບຮອບ 112 ປີ, ພາຍໃນງານຈະມີຮ້ານຂາຍເຄື່ອງເຂົ້າຮ່ວມ 172 ຮ້ານ, ໃນນີ້ມີຮ້ານຫັດຖະກຳ 25 ຮ້ານ, ຮ້ານຂາຍອາຫານ 105 ຮ້ານ, ຮ້ານຂາຍໝາກໄມ້ສົດ 10 ຮ້ານ ແລະ ຮ້ານອື່ນໆອີກ 20 ຮ້ານ.

ໂດຍທ່ານ ນາງ ຫຼຽນຄຳ ວິລະພັນ ຄະນະບໍລິຫານງານສູນກາງແມ່ຍິງລາວ, ປະທານຄະນະບໍລິຫານງານສະຫະພັນແມ່ຍິງ ນະຄອນຫຼວງວຽງຈັນ, ໄດ້ຖະແຫຼງຂ່າວການຈັດງານດັ່ງກ່າວເມື່ອວັນທີ 2 ມີນາ 2022, ເຂົ້າຮ່ວມມີທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫຼ່ງຂ່າວ,ວັດທະນາທໍາ ແລະ ທ່ອງທ່ຽວ ນວ, ທ່ານ ນາງ ຈຳປາທອງ ອິນທະລົງແສງຈັນ ຄະນະບໍລິຫານງານສະຫະພັນແມ່ຍິງ ນວ ແລະຕາງໜ້າສະຫະພັນແມ່ຍິງ 9 ຕົວເມືອງ.

ປະທານຄະນະບໍລິຫານງານສະຫະພັນແມ່ຍິງ ນວ, ໃຫ້ຮູ້ວ່າ: ຈຸດປະສົງຂອງການຈັດງານກໍເພື່ອສ້າງຂະບວນການຂໍ່ານັບຮັບຕ້ອນ ແລະການສະເຫຼີມສະຫຼອງວັນແມ່ຍິງສາກົນ ຄົບຮອບ 112 ປີ ໃຫ້ມີຄວາມຟົດຟື້ນ, ທັງເປັນການປຸກລະດົມຂະບວນການແມ່ຍິງປະກອບສ່ວນຈັດຕັ້ງຜັນຂະຫຍາຍມະຕິກອງປະຊຸມໃຫ່ຍຕິດພັນກັບມະຕິກອງປະຊຸມໃຫ່ຍຜູ້ແທນແມ່ຍິງທົ່ວປະເທດ ແລະແມ່ຍິງ ນວ ຄັ້ງທີ VIII, ແນໃສ່ສົ່ງເສີມຮີດຄອງປະເພນີ, ວັດທະນະທຳດີງາມຂອງແມ່ຍິງລາວບັນດາເຜົ່າ. ຊຶ່ງພາຍໃນງານແມ່ນຈະໄດ້ຮັກສາມາດຕະການປ້ອງກັນ, ຄວບຄຸມການແພ່ລະບາດຂອງພະຍາດໂຄວິດ-19 ຢ່າງເຂັ້ມງວດ.

ທັງນີ້, ຈິ່ງຂໍເຊີນຊວນມວນຊົນເຂົ້າມາທ່ຽວຊົມ, ເລືອກຊິມ, ເລືອກຊື້ອາຫານ, ເຄື່ອງຫັດຖະກຳ ແລະ ຜະລິດຕະພັນຕ່າງໆ ເພື່ອເປັນການສົ່ງເສີມການທ່ອງທ່ຽວລາວ ຕາມມາດຕະຖານຄວາມປອດໄພ.

แชร์